Bruksel, Kurti dhe Vuçiç më 3 dhjetor takohen me shefen e re të diplomacisë BE-së

Kryeministri i Kosovës, Albin Kurti, dhe Presidenti i Serbisë, Aleksandar Vuçiç, më 3 dhjetor do të zhvillojnë takime të ndara me shefen e re të diplomacisë së Bashkimit Evropian, Kaja Kallas.

Takimet e ndara të Kallasit me Kurtin dhe Vuçiçin u konfirmuan nga zëdhënësja e BE-së për politikë të jashtme, Anita Hipper.

Kallas është shefja e re e politikës së jashtme dhe sigurisë së BE-së dhe së bashku me pjesën tjetër të komisionerëve të KE-së nisën mandatin më 1 dhjetor.

Lidhur me sulmin në kanalin e Ibër-Lepencit më 26 dhjetor dhe për të ardhmen e dialogut Kosovë-Serbi, zëdhënësja e BE-së për politikë të jashtme përsëriti qëndrimin që Bashkimi Evropian shprehu një ditë pas sulmit në Varragë të Zubin Potokut, duke e cilësuar sulmin si terrorist ndaj infrastrukturës kritike të Kosovës dhe ftoi të gjithë që të bashkëpunojnë me autoritetet e Kosovës për të zbuluar kryesit e sulmit dhe që ata të përballen me drejtësinë.

Takimet e ndara në Bruksel me zonjën Kallas nuk do të zhvillohen në kuadër të dialogut për normalizimin e raporteve mes Kosovës dhe Serbisë, proces që ndërmjetësohet nga Bashkimi Evropian, sqaroi Hipper, nuk do të jenë në kuadër të dialogut. Kallas tani pasi ka marrë mandatin duhet të vendosë se si të vazhdohet me procesin e dialogut, i cili ka nisur më 2011.

Kurti dhe Vuçiç në Bruksel do të zhvillojnë edhe takime të ndara me Presidentin e ri të Këshillit Evropian, Antonio Kosta. Më vonë ata do të marrin pjesë në një darkë joformale që Kosta do të organizojë me të gjithë udhëheqësit e rajonit të Ballkanit Perëndimor.

Ndryshe, gjatë ditëve të fundit, Kurti dhe Vuçiç kanë këmbyer akuza për sulmin terrorist në Zubin Potok. Kosova e fajësoi Serbinë për sulmin në kanalin e ujit të Ibër-Lepencit. Serbia mohoi se qëndron prapa sulmit duke deklaruar se ka nisur hetimet e veta për këtë rast.

Autoritetet e Kosovës deri më tani kanë arrestuar disa persona të dyshuar për këtë rast dhe kanë sekuestruar armë dhe pajisje të tjera ushtarake gjatë operacioneve në veriun e Kosovës, të banuar me shumicë serbe.

Sulmi ka ndodhur në fshatin Varragë të komunës së Zubin Potokut, komunë me shumicë serbe në veri të Kosovës. Policia e Kosovës është shprehur se sulmi është kryer me lëndë shpërthyese deri në 20 kilogramë. Kanali Ibër-Lepenc furnizon me ujë nga Liqeni i Ujmanit gjithë veriun e Kosovës, rajonet e Mitrovicës, Prishtinën me rrethinë, si dhe Korporatën Energjetike të Kosovës për ftohjen e TEC-ve të saj./RFE/