“Xhaçka”, foli dhe Venecia: Vendimet e Gjykatës Kushtetuese duhet të zbatohen!
Foli dhe Komisioni i Venecias dhe tashmë është Kryeministri Edi Rama i cili do të jap si zakonisht fjalën e fundit në mënyrë që mandati i depuetes së PS, Olta Xhaçka, të marr fund jo pse e thotë Gjykata Kushtetuese dhe Venecia, por, sepse Xhaçka si pjesë e Qeverisë Rama shkeli ligjin.
“Të gjitha autoritetet janë të detyruara t’i zbatojnë këto vendime dhe t’i zbatojnë ato në mënyrë efektive. Pajtueshmëria e të gjitha autoriteteve me vendimet e Gjykatës Kushtetuese bazohet në parimin e besnikërisë kushtetuese si element i shtetit të së drejtës.
Një pajtueshmëri e tillë nuk duhet të kushtëzohet me votën e shumicës parlamentare, por është një kërkesë thelbësore e shtetit të së drejtës. Vetë qëllimi i Gjykatës Kushtetuese është të kufizojë shkeljet e mundshme të ligjvënësit ose pushteteve të tjera shtetërore,” thekson Komisioni i Venecias me logjikë juridike që nuk të duhet të jesh pjesë e Komisionit të Venecias ose Gjykatës Kushtetuese për të kuptuar kaq gjë. Po, nuk duhet të jesh socialist në pushtet, moment ky kur ata nuk e qajnë kokën për Ligjin.
Por, Komisioni i Venecias nuk e lë me kaq, sqaron kaçakët e Edi Ramës edhe abuzimin që ata në çdo seancë bëjnë me forcën e kartonit.
“Parlamenti nuk mund t’i referohet parimit të ndarjes së pushteteve për të refuzuar respektimin dhe zbatimin e vendimeve të Gjykatës Kushtetuese në kuadrin e kompetencave që i jep Kushtetuta.
Në rastin konkret nga i cili u ngrit kjo kërkesë, Gjykata Kushtetuese ka marrë dy vendime dhe zbatimi efektiv i këtyre vendimeve nuk duhet të kushtëzohet me votim apo shumicë parlamentare.”
Pas këtij opinioni të Komisionit të Venecias ka reaguar Kryetari i Grupit Parlamentar të PD, Gazment Bardhi, duke theksuar se kjo konfirmoi edhe njëherë që qëndrimi i mazhorancës ishte puç kushtetues ndaj shtetit ligjor.
“Qartësisht Komisioni i Venecias konfirmon drejtësinë e betejës së opozitës, duke ritheksuar se nuk mund të ketë diskrecion politik për respektimin dhe zbatimin e vendimeve të Gjykatës Kushtetuese. Në rastin konkret nga i cili u ngrit kjo kërkesë, Gjykata Kushtetuese ka marrë dy vendime dhe zbatimi efektiv i këtyre vendimeve nuk duhet të kushtëzohet me votimin nga shumica parlamentare,” shprehet Gazmen Bardhi duke përfunduar:
“Edhe njëherë mashtrimi i Kryetares së Kuvendit me lajme fake të shpërndarë disa ditë më parë doli zbuluar. Komisioni i Venecias i ka dhënë shuplakën më të madhe gjatë këtyre 34 viteve një mazhorance, duke konfirmuar ndërkombëtarisht se moszbatimi i vendimeve të Gjykatës Kushtetuese me votë politike është i paprecedentë.”
Ndryshe, pas votimit të mazhorancës socialiste të Edi Ramës për të mos dërguar çështjen “Mandati Xhaçka” në Gjykatën Kushtetuese, por iu dërgua Komisionit të Venecias për ti kërkuar një mendim, Zyra e Delegacionit të BE dhe Ambasada e Shteteve të Bashkuara në Tiranë, kanë shprehur shqetësimin lidhur me vendimin e Parlamentit të Shqipërisë për të shpërfillur një vendim të Gjykatës Kushtetuese.
