Karta e Konsumatorit për pensionistë, Berisha: Rimbursim 100% TVSH-së produkteve të shportës

Ndonëse paraqiti Paketën e Emergjencës të minimumit jetik mbi 200 euro dhe llogaritjes së pensioneve mbi këtë minimum, sot Kryetari i Partisë Demokratike, Sali Berisha, tha se kjo nuk mjafton dhe duhet të vendoset me urgjencë Karta e Konsumatorit, me të cilën do rimbursohet 100 për qind TVSH-ja e produkteve të shportës çdo pensionist dhe familje në nevojë.

Duke e identifikuar si problem serioz censurimin që i bëjnë mediat qeveritare takimeve të organizuara të Partisë Demokratike në diasporë, tha se kjo nuk do ti pengojë që të takojnë diasporën në mënyrat më intensive, dhe bëri të ditur se po përgatiten takime të reja si dhe identifikimet e shqiptarëve jashtë vendit, për ti ftuar ata që të marrin pjesë në procesin e votimit.

“Unë kam paraqitur këtu para jush paketën e emergjencës të minimumit jetik mbi 200 euro dhe llogaritjes së pensioneve mbi këtë minimum, pagën minimale 500 euro, por këto përsëri nuk mjaftojnë.
Pse nuk mjaftojnë? Sepse nga këto pensione, tre pensione u merren me TVSH-në, që ata paguajnë në çdo kafshatë ushqim.
A mund ta imagjinoni ju, paguan pensionisti 500 euro TVSH për ushqimet që përdor në muaj, paguan njëlloj sa presidenti i Republikës që merr mbi 5 mijë euro apo Edi Rama që i afrohet aty, për të mos thënë Dumani me 7 mijë euro.
A ka më çnjerëzore se kjo?

Po në kuadrin e programit tonë për të përmbysur shpërndarjen e të ardhurave kombëtare, për të ngushtuar sadopak këtë hendek të frikshëm të krijuar në shoqërinë shqiptare, dal sot para jush për të informuar qytetarët se do vendoset me urgjencë karta e konsumatorit, me të cilën do rimbursohet 100 për qind TVSH-ja e produkteve bazë të shportës për çdo pensionist, për çdo familje në minimumin jetik, për çdo invalid, pa përjashtim.
Karta ka dy rrugë për të proceduar, ka një rrugë për të ulur TVSH-në ose për të hequr TVSH-në për ushqimet, por kjo përsëri barazon ata që nuk mund t’i barazosh.
Nuk mund të barazosh ti atë që merr 7 mijë euro për të fjetur mbi dosjet e krimit çdo natë, e plus sa merr nga krimi, me këtë që numëron kafshatat me 160 mijë euro.
Ndaj për të mos krijuar këtë barazi, jo, ekspertët sugjerojnë që të mbetet TVSH siç është dhe të gjithë këta, 780 mijë pensionistë, të gjitha familjet në ndihmë ekonomike, etj, se edhe ata paguajnë TVSH, TVSH-ja e produkteve bazë t’u rimbursohet 100 për qind.

Ekspertët e ekonomisë dhe fushës dixhitale kanë një skemë të shkëlqyer për të shmangur çdo lloj evazioni, pasi çdo faturë e atyre që paraqesin këtë kartë, do depozitohet në një server dhe në krye të 6 muajve do bëhet bilanci, 20-30 ditë mbrapa dhe poseduesi i kartës do marrë të gjithë pagesat që ka bërë për TVSH-në.
Pra, nuk ka bonuse, nuk ka nevojë për bonuse dhe mëshirë pensionisti, pensionisti ka nevojë të bësh një hap drejt ngushtimit të hendekut të tmerrshëm që ke krijuar.
Ky është hapi tjetër i madh që ne ndërmarrim për të lehtësuar jetën e të gjithë shqiptarëve, jo vetëm pensionistëve, por edhe familjeve në nevojë, të papunëve dhe me radhë, tha Sali Berisha duke paralajmëruar zero tolerancë krimit të organizuar.

“Plani i opozitës është zero tolerancë ndaj krimit të organizuar, zero tolerancë. Fatmirësisht për ata që kanë memorie ne e kemi faktuar. Bosët e krimit dhe ushtarët e bandave, rreth 1.050 të tillë në 18 muaj u vendosën para ligjit, kudo që ishin.
Një numër i tyre morën dënime përjetë, të cilët Edi Rama pas 2013 i nxori një e nga një nga burgjet. I garantoj nuk jam unë i taktikës, kokën të hanë, sepse kjo është nxitja më e fuqishme e krimit, hakmarrjes dhe vrasjeve. Jo. Qëndrimi ynë është, kudo që të jenë, do ti arrestojmë do ti vendosim para ligjit në Shqipëri. E kemi provuar ne këtë.
Herën e parë i kemi mbledhur nga Suedia, Ankaraja, SHBA, kudo që kanë qenë, kanë ardhur dhe do të vijnë, dhe ne do ti mbledhim nga të gjitha anët. Nuk mundet, sepse i kanë bërë dëme të tmerrshme Shqipërisë. Urdhëro çmimet e apartamenteve, nuk i prek kush dot.
Këtu çmimet janë më të shtrenjta se në Bruksel, më të shtrenjta se në një mori qytetesh evropiane.
Po si ka mundësi? Ka mundësi sepse ata vijnë dhe blejnë kate. Këto kullat që shifni ju, këto janë të gjitha pronë e tyre, shumica dërrmuese, nuk mund të them të gjitha, por në përqindjen dërrmuese dhe çmimet shkojnë në stratosferë.
Tani, po dëgjoja sot po bëhej gati të rritej dhe kafeja. Si ka mundësi që Shqipëria të ketë çmime 10 deri në 250 përqind më të larta të shportës, se në vendet e BE-së.
Droga, droga dhe vetëm droga.
Ndaj dhe ata janë një armik i egër, paraja e tyre është toksike, ata krijuan narkoeuron. Për të gjitha këto do të kenë përgjegjësi ligjore.
Sigurisht ne nuk jemi të praktikës, kokën ti hanë njëri-tjetrit. Ato i bën Edi Rama dhe Rama implikohet direkt në banditizmin e dënuar me ligj, por nuk është ky kapitulli tani.”

Vettingun, sot lideri i opozitës e cilësoi si njërin nga proceset më të korruptuara në histori ndërsa foli për personat e inkriminuar që kryen këtë proces, përmendi Valbona Sanxhaktarin

“Në bindjen time më të thellë, ky është një nga proceset më të korruptuara që historia ka njohur në Europë dhe në botë. Dhe më lejoni t’u paraqes argumente.
Vettingu filloi me lista, 100 për qind e sigurt kjo, të formulara në komitetet e PS-së, gjykatësit dhe prokurorët armiqësorë ndaj saj që duhet të largoheshin. Dhe vettingu i largoi ata me shpejtësi të rrufeshme. Kjo është e vërteta.
Janë larguar nga sistemi gjyqësor, gjyqtarë për garsioneren dhuratë e të atit.
Janë larguar nga sistemi gjyqësor, gjyqtare, e cila kishte jetuar në shtëpi me të atin, dhe pasi martohet, gjatë periudhës që ka jetuar para martesës, ka dorëzuar rrogën në familje. I ati, rrogën ia ka vendosur mënjanë, një traditë eprore e prindërve në Shqipëri dhe me rastin e martesës i ka dhënë të gjithë paratë e rrogës të kursyera për të ndihmuar vajzën e vet.
Dhe kësaj, nga këta vetorë, i është quajtur burim i paqartë dhe është nxjerrë nga sistemi.
Vettingu në Shqipëri është bërë nga persona të inkriminuar, ish-bashkëshorte e Hakmarrjes për Drejtësi, si Valbona Sanxhaktari.
Dhe duhet ta dini mirë se të gjitha të dhënat nga SHISH dhe DSIK nuk i dorëzoheshin Komisionit, i dorëzoheshin vetëm një personi, dhe ishte ky person, Valbona me një tjetër, që përcillte çfarë do nxirrte ose jo,” tha Berisha duke folur për pasojat konkrete të Vettingut.
“Vettingu u bë mbi baza krahinore, u bë mbi baza fetare dhe është procesi më i korruptuar, më i kompromentuar që mund të jetë bërë ndonjëherë.
Vettingu pati pasoja dramatike. U hoqi qytetarëve shqiptarë të drejtën për një proces ligjor të drejtë, duke krijuar një vakum vetëm e vetëm që drejtësia të vendosej nën kontroll.
Ky vakum shkon në 14 vite për çështje civile dhe 10 vite për çështje penale.
Vettingu krijoi organizatën kriminale të Skapit të partisë, një organizatë të vërtetë kriminale, e cila bën gjahun e opozitës.
Por ju mund të më thoni me të drejtë, po ja komuniteti ndërkombëtar, po ja që tre rezoluta të partive politike më serioze të planetit, të cilat përbëjnë shumicën dërrmuese të forcave politike në Europë, SHBA dhe botë, e damkosën drejtësinë shqiptare si një armë në duart e ekzekutivit.
Jo vetëm unë, por edhe mediat, analistët dhe politikanë të tjerë jemi përpjekur t’u themi shqiptarëve se kjo është një drejtësi totalisht degë e ekzekutivit më të korruptuar të kohës.
Tani, fatmirësisht, sado me vonesë, e konfirmojnë organizatat më të mëdha të partive politike të qendrës së djathtë në botë.
Kemi një damkosje përfundimtare të kësaj reforme.
Më pyetët për investitorët e huaj. Me këtë drejtësi, nuk ka investitorë të huaj që të vijë. Nuk mund të presë ai 14 vite për procesin civil.
Kjo ishte reforma e Xhorxh Sorosit, një monstër e njerëzimit.
Kjo ishte historia më e turpshme, atentati më i rëndë që iu demokracisë së një vendi, me të cilën ai donte që Edit të tij t’i dhuronte drejtësinë.
Mos harro skenën në parlament të Donald Lu me Romana Vlahutin. Mbaje dhe shihe, kujto drejtësinë e tyre pastaj.
Që të dy ushtarë të korruptuar të George Sorosit.
Por e vërteta mund të vonojë, por kurrë nuk mund të fshihet përfundimisht.
Rikthehet dhe do dalë në dritë.”

Ndërsa shpalljen nga Departamenti i Shtetit të kreut të SPAK si kampion të Antikorrupsionit kryedemokrati e vlerë si një zhvillim tjetër jashtëzakonisht negativ ndërsa, sipas tij, Antony Blinken e shpalli Altin Dumanin kampion sepse ishte autor i grushtit të shtetit që ndërmori vetë zoti Blinken kundër opozitës shqiptare.
“Kreu i një organizate kriminale, që unë shumë shpejt do nxjerr dokumentet këtu, merr në dorë për të verifikuar të tjerët, në një kohë kur ai për veprimtarinë e tij duhet të jetë në qeli.
Ai fle mbi krimin, fsheh krimin.
Ai është pronari i tre shtëpive me rrogë shteti, që të garantoj se nuk ka qytetar shqiptar që ka punuar në shtet me ndershmëri, nga president republike e poshtë, që mund të blejë jo tre, por asnjë banesë të vetme pa kredi.
Unë që po flas këtu, e shita atë që kisha, e cila ishte nja 40 metra më e vogël se kjo që mora. Pra unë bleva 40 metra.
Antony Blinken e shpalli kampion se ishte autor i grushtit të shtetit që ndërmori vetë zoti Blinken kundër opozitës shqiptare.
Dhe unë këtë e kam thënë me kohë dhe nuk ka asgjë të re.
Ajo që bëri zoti Blinken dhe Xhorxh Soros ishte një grusht shteti ndaj demokracisë, ndaj opozitë shqiptare.
Altin Dumani hyri në lojë me urdhër po të diplomatëve amerikanë dhe të Edi Ramës në një kohë kur ata dështuan me forma të tjera, me formën e gostitjes më bar të demokratëve etj.
Kështu që ajo nuk më habit fare, madje m’u duk e vonuar.
Mos harro edhe Dvoranin, është edhe Dvorani në atë listë.”

Në fund, Kryetari i Partisë Demokratike duke akuzuar mediat qeveritare se po censurojnë takimet e PD-së me diasporën, ai tha se po përgatiten takime të tjera.

“Vendimet për tu marrë me të ardhmen, sapo do të merren, do të ua komunikojmë, medieve të parën. PD ka organizuar një seri takimesh, por problemi është se mediat qeveritare ja censurojnë. Ne realisht kemi organizuar takime në vende të ndryshme, në SHBA, Itali, Greqi, Britaninë e Madhe. Natyrisht që nuk e mohoj se mundësitë tona financiare janë modeste, por këto nuk do të na pengojnë, dhe nuk mund të na pengojnë ne pa takuar diasporën në mënyrat më intensive,” tha Kryetari i Partisë Demokratke, Sali Berisha, duke paralajmëruar:
“Po përgatiten takime të tjera për të tërhequr mendimet e tyre, për të ftuar ata të marrin pjesë dhe po bëjmë një përpjekje të madhe për identifikimin e shqiptarëve jashtë vendit dhe për ti ftuar ata të marrin pjesë në procesin e votimit.