Terrorizmi i sponsorizuar nga Serbia, Kurti: Radoiçiç caktoi njerëzitë për sulmet terroriste!

Kryeministri i Kosovës, Albin Kurti, shpalosi sot fakte mbi terrorizmin e sponsorizuar nga Serbia dhe përgjegjësinë e shtetit serb për sulmet në Kosovë; Fakte për sulmin me eksplozivë në kanalin e Ibër- Lepencit më 29 nëntor ku u dëmtua tërësisht kanali që kishte për qëllim paralizimin e jetës ekonomike dhe energjetike në Kosovë si dhe shkaktimin e trazirave që do të vinin si pasojë dhe ku do të rrezikohej siguria kombëtare dhe do të provokohej situata në rajon.

“Refuzimi i Beogradit zyrtarë për ta dorëzuar Milan Radoiçiçin, përgjegjësin kryesor për sulmin terrorist të 24 shtatorit 2023 që ka pasur për qëllim okupimin e pjesës veriore të shtetit tonë, ka qenë inkurajim i grupit terrorist që i prinë Radoiçiçi për të vazhduar me akte të tjera subversive, diverzive ndaj integritetit territorial dhe sovranitetit shtetëror të Republikës sonë.

Strehimi i i Radoiçiçit në Serbi, përkrahja që i ofron atij Beogradi zyrtarë me infrastrukturë për trajnim të grupit terrorist, autorizimi i përgjegjësive që i ka falur kreu i shtetit serb dhe për kontrollin faktik e politik të serbëve të Kosovës, nuk mund të quhet ndryshe përveçse koordinim i shtetit të Serbisë me Milan Radoiçiçin dhe grupin e tij terrorist për të zhvilluar më tej luftën hibride kundër Republikës së Kosovës,” tha Albin Kurti duke konstatuar se Kosova ka shtrirë sovranitetin e sigurinë në veri të vendit nëpërmjet kushtetutshmërisë e ligjshmërisë dhe tashmë nuk mund të sfidohet përmes grupeve të modelit rus “Little green man” apo “Njerëzit e vegjël të gjelbër”.

Megjithatë, sipas Kryeministrit të Kosovës, politikat agresive të Serbisë nuk po ndalen me sulme të tjera terroriste, por të organizuara në grupe më të vogla dhe në forma më të fshehta.

“Që nga qershori i vitit 2024 kur edhe kanë filluar të shpërndahen posterë me fytyrën e presidentit serb me mbishkrime që ‘komandant suprem, ju presim’, gradualisht është përshkallëzuar situata në 4 komunat në veri përmes grupeve të vogla të lidhura direkt me Radoiçiçin.

Sipas informacioneve që posedojnë institucionet e sigurisë në Kosovë, Radoiçiç ka caktuar dy persona të afërt të tij, për të realizuar sulme në veri përmes grupeve të tyre të cilët kanë marr pjesë edhe në sulmin terrorist në Banjskë të Zveçanit dhe strehohen në Serbi, dhe këta dy persona janë Nemanja Radivojeviç me nofkën ‘Gandi’ dhe Vladimir Radivojeviç me nofkën ‘Mami’,” tha Kryeministri i Kosovës, Albin Kurti.

Ndonëse faktet ishin uluritëse mbi veprimin e shtetit serb në veri të Kosovës dhe situatën kritike në të cilën ndodhet Kosova dhe kërcënimet nga Serbia, mediat e batonëve dhe buzhalëve mendjen e kishin tek Lista Srpska të cilën e pamundësoi të certifikohet në KQZ nga anëtarët e Lëvizjes Vetëvendosje.

“Ju të gjithë e dini që Lëvizja Vetëvendosje aty ka 2 nga 11 anëtarë, ndërkaq për certifikim kanë mjaftuar 8 vota. Askush nuk ka mundur të presë që mund të jetë ndryshe qëndrimi i përfaqësuesve të Lëvizjes Vetëvendosje në KQZ. Le të mos harrojmë që edhe para sulmit terrorist në Banjskë, Lista Serbe ka qenë fort problematike, dhe përshkallëzimi i situatës kur ata me urdhër nga Beogradi dhanë dorëheqje nga policia, gjyqësori, dhe nga parlamenti me 5 nëntor 2022.

Kur kësaj ia shtojmë sulmin terrorist në Banjskë i kryer nga nënkryetari i Listës Serbe i cili vazhdon edhe sot e kësaj dite të jetë de-facto shefi i Listës Serbe, sepse eksponentë në krye me Zlatan Elek që është kryetar, takohen me Radoiçiçin në Serbi, marrin instruksione, më saktë urdhra prej tij. Është e qartë se qëndrimi ynë si Lëvizje që  kemi përfaqësuesit në KQZ nuk ka mundur të jetë ndryshe.

Ne, në të njëjtën kohë kemi alarmuar edhe çfarë po ndodhë. E kemi policin e vrarë, i kemi fëmijët e tij jetimë. Qëndrimi negativ, veprimet destruktive dhe sjellja penguese e Listës Serbe ndaj Republikës së Kosovës janë të njohura për të gjithë,” tha Kryeministri i Kosovës, Albin Kurti i bindur se Lista Srpska është dega më besnike e partisë shtet në Serbi dhe bojkoti i tyre ndaj Parlamentit të Kosovës pati nisur pikërisht me urdhër nga Beogradi ndërsa përfundoi:

“Lista Serbe në pikëpamjen time, e unë besoj edhe të qytetarëve të Republikës së Kosovës, përfshirë edhe serbët këtu, nuk është shprehje e organizimit politik të serbëve në Kosovë, por është diktat i Beogradit. Lista Serbe asnjëherë nuk është distancuar nga sulmi terrorist në Banjskë. Për aq kohë sa Radoiçiq nuk dorëzohet tek autoritete e Kosovës, Lista Serbe do të jetë krahu politik i Milan Radoiçiçit dhe terrorizmit shtetar serb. Lista Serbe është pengesa e vërtetë e integrimit të serbëve.”

Ndryshe, shpalosjaj e këtyre fakteve dhe alarmi i rrezikut nga terrorizmi serb nga Kryeministri i Kosovës, Albin Kurti, vjen një ditë pasi anëtarët e Lëvizjes Vetëvendosjes në KQZ penguan certifikimin e Listës Srpska dhe deklaratës së Ambasadori amerikan në Beograd, Christopher Hill, se deri më tani nuk ka fakte që konfirmojnë lidhjen e Serbisë me sulmin terrorist në kanalin e Ibër-Lepencit.