Po ngriten kulla, por 38% e shqiptarëve nuk ngrohin dot shtëpitë, rekord në Evropë

Shqipëria ka shansin që ka një mot relativisht të butë gjatë dimrit, përndryshe banorët e saj do të vuanin shumë nga i ftohti.

Eurostat ka publikuar një raport ku ka matur përqindjen e popullsisë që nuk arrin të mbajë shtëpinë mjaftueshëm ngrohtë për vitin 2023.

Shqipëria renditet e para në Evropë, ky 37.7 për qind vlerësohen që nuk ngrohin mjaftueshëm shtëpitë e tyre (të dhënat për Shqipërinë janë të vitit 2021), nga 10.6 për qind që është mesatarja europiane. Mungesa e ngrohjes qendrore si dhe përdorimi i energjisë elektrike për ngrohje, që është i shtrenjtë, e bëjnë këtë nevojë jetike një luks për familjet shqiptare.

Vendet e rajonit, për të cilat ka informacion në raport, renditen shumë më mirë se Shqipëria. Në Serbi, një shtet shumë më i ftohtë se ne, vetëm 9.5 për qind e popullatës nuk ngrohin dot shtëpitë (e dhënë e vitit 2022), më e ulët se mesatarja e BE-së. Në Mal të Zi treguesi është 13.9% (viti 2022). Në Maqedoninë e Veriut, treguesi ishte 23 për qind për vitin 2020.

Bumi i ndërtimeve i viteve të fundit nuk duket se ka ndikuar në përmirësimin e cilësisë së jetesës së familjeve. Të dhënat historike tregojnë se ky tregues është luhatur, midis 35-37 për qind për gjithë periudhën 2017-2021, kur raportohen të dhënat. Madje në 2021, treguesi erdhi në përkeqësim në raport me vitin e mëparshëm, kur kishte zbritur në 35.8 për qind.

Fatmirësisht, Shqipëria ka shumë diell. Sipas të dhënave të meteorologjisë, World Weather Online, Shqipëria ka rreth 2.400 deri në 2.600 orë diell në vit, duke e renditur si një nga vendet me më shumë ditë me diell në Europë, veçanërisht në rajonet bregdetare dhe jugore të vendit. Vendi me më shumë diell në Europë është Spanja, e ndjekur nga Franca dhe Italia.

Europa
Sipas Eurostat, në vitin 2023, 10.6 për qind e popullsisë së Bashkimit Europian nuk ishin në gjendje të mbanin shtëpitë e tyre shumë ngrohtë. Krahasuar me vitin 2022, kjo shifër u rrit me 1.3 pikë përqindje.

Pjesa më e lartë e njerëzve që nuk mundën të mbajnë shtëpitë e tyre të ngrohta u vërejt në Spanjë dhe Portugali, nga 20.8 për qind secila, pasuar nga Bullgaria 20.7 për qind, Lituania 20.0 për qind, dhe Greqia 19.2 për qind.

Nga ana tjetër përqindjet më të ulëta u regjistruar në Luksemburg 2.1 për qind, Finlandë 2.6 për qind, Slloveni 3.6 për qind, Austria 3.9 për qind, dhe Estoni 4.1 për qind./Monitor/