Rama po manipulon me plehrat, Shefi i KRM “Pastrimi”: Betejë për tenderë!
Pas shpalljes së gjendjes së jashtëzakonshme me menaxhimin e plehrave në Prishtinë, ka reaguar Kryeshefi Ekzekutiv i Kompanisë “Pastrimi”, Petrit Reçica, duke thënë se situata e krijuar është betejë për tenderët dhe kontrollin mbi paratë publike.
Përmes një postimi në rrjetin social Facebook, Petrit Reçica ka publikuar komunikimin zyrtar me Komunën e Prishtinës, duke theksuar se kjo është përpjekje për manipulim me plehrat për t’ua dhënë tenderët miqve të Ramës.
“Komuna ka shpallur gjendjen e jashtëzakonshme për menaxhimin e mbeturinave, duke pretenduar se ‘Pastrimi’ nuk po e kryen punën si duhet. Të nderuar qytetarë, ne po punojmë pa pushim ne 24 orë për 7 ditë të javës, me gjithë këto sfida, dhe nuk dorëzohemi me të vetmin qëllim që Prishtinën do ta pastrojmë nga mbeturinat,” shprehet Kryeshefi Ekzekutiv i Kompanisë “Pastrimi” duke bërë të ditur se kompania private e përzgjedhur për pastrimin e qytetit, ka lidhje me pushtetin komunal.
“Përmes këtyre veprimeve të kundërligjshme fillimisht u fut në lojë një kompani private, pastaj u hap një tender i ndarë në pesë llote në vlerë 16.5 milionë euro, me kritere të përgatitura sipas qejfit për të favorizuar emrat e dëshiruar. Ky tender përfundoi i bllokuar në OSHP, duke dëshmuar manipulimin e procesit, favorizimet të operatorëve të caktuar si dhe tendencën për të përjashtuar dhe falimentuar KRM “Pastrimin,” Kryeshefi Ekzekutiv i Kompanisë “Pastrimi”, Petrit Reçica, i bindur se këtë herë duket qartë që synimi është hapja e një tenderi me negocim, ku edhe ekzistojnë dyshime se fituesi është i paracaktuar ndërsa përfundon:
“Pra, e gjithë kjo nuk ka të bëjë me pastërtinë e qytetit, por me një betejë për tenderët dhe kontrollin mbi paratë publike. Ne si ndërmarrje publike qëndrojmë të përkushtuar dhe zotohemi para qytetarëve se do të jemi në nivelin më të mirë të cilësisë së shërbimit në grumbullimin e mbeturinave!”
Ndryshe, sot Komuna e Prishtinës ka shpallur gjendje të jashtëzakonshme për menaxhim të plehrave në kryeqytet duke theksuar se ky Vendim bazohet në rezultatet e arritura gjatë vitit 2024 pas marrjes së masave emergjente për përmirësimin e menaxhimit të mbeturinave.
Kryetari i Komunës Prishtinë, Përparim Rama, tha se kanë angazhuar kompani private, pasi sipas tij, kompania “Pastrimi” nuk po ka kapacitet për menaxhim të mbeturinave.
