9 Shkurt, vota për Kosovën, në kandar vetëm Veriu!
Pas një fushate zgjedhore të pakuptimtë, pasi qytetarët e Kosovës nuk arritën të shohin një ofertë nga 20 parti politike, pesë koalicione, dy lista qytetare dhe një kandidat i pavarur, që do ta bëjë një Arsim nga i cili nuk do të ketë turp Pisa, një Shëndetësi e cila më në fund do të shërohet, Sistem Energjetik që do të qëndroj në këmbët e veta, Ekonomi që nuk do të varet Serbia, dhe, diplomaci që nuk e kap për veshi Richard Grenell sa herë afrohen zgjedhjet, më 9 Shkurt detyrohen që votën e tyre t’a peshojnë vetëm me Veriun!
Para nisjes drejt kutive, janë munduar të analizohen shumë rrethana që e sollën votuesin e Kosovës në këtë situatë, ku nuk gjen asnjë figurë të re që Arsimin në Kosovë do ta bëjë ndryshe nga sa u qëndis për 26 vjet me radhë! Panë për katër vjet që flitet për tulla e llaç dhe paga të mësimdhënësve nga Lëvizja Vetëvendosje, dhe shohin se po flitet për më shumë tulla e llaç si oferta kryesore e opozitës ndonëse Pisa nuk e sheh si arsyet që arsimi kosovar u bë kaq shumë pis!
Dhe, ndonëse nuk ndryshoi shumë figura si LDK ashtu dhe PDK, ato jo vetëm nuk arritën të shkelin në këtë garë me një ofertë ndryshe, por dhe një Arsim që është shumë larg cilësisë edhe nga vitet ’90, kur ai zhvillohej në sistem paralel dhe kushte të mjerueshme!
Shëndetësia, si plagë e madhe e shtetit të Kosovës nuk po e merr dot veten përkundër angazhimeve serioze të Kryeministrit Albin Kurti. Kalbëzimi i saj nuk kishte shpresë të zgjidhej nga ata që e kishin sjellë në këtë gjendje, LDK-PDK, por kur kurimi i këtij sistemi shëndetësor nga këto dy parti tradicionale mendohet me godina dhe klinika të reja, atëherë i bënë qytetarët edhe më të pashpresë ndërsa ankohen te trajtimi që i bëhet nga personeli shëndetësor; Ndërkohë, ndonëse këta të fundit çdo ditë vënë gishtin në plagë te sistemi, askush në ofertën e tyre nuk do ta trazoj sistemin, askujt nuk do ti dridhet dora para kutisë së votimit!
Dhe, ndërsa shohin se ka filluar numërimi mbrapsht dhe vota e tyre mund të vendos shumëçka, pensionistët aktual dhe ata që janë më vizionarë dhe e mendojnë këtë ditë, shohin se për sistemin pensional dinë të qëndisen akuza se si Kurti nuk e bëri këtë Fond, dhe ky që nuk e bëri që akuzon se sa ishte i penguar nga Opozita!
Energjia Elektrike ka arritur të thithë buxhete pa fund, por qytetari në kohën kur perëndon dielli shumë pak është i interesuar se cilat ishin planet e qeverisë aktuale dhe atyre që dështuan ta krijojnë një sistem energjetik të qëndrueshëm. Edhe në vitin 2025 qytetarit të Kosovës i flitet për reduktim, e urren por nuk kishte një ofertë që i thotë arsyet pse më në fund reduktim të energjisë elektrike nuk do të ketë!
Lufta në Ukrainë i shërbeu shumë ekonomive të dalin zbuluar pse çmimet e shportës u rritën dhe pse ato u ulën ndonëse lufta vazhdon; Kjo ndodhi edhe në Kosovë dhe jo vetëm kaq! Përrallat mbi Serbinë si ambarin e Evropës, që sikur të mos prodhoj drith edhe 10 vjetë e ka bukën e sigurt ranë për pak muaj lufte në Ukrainë, por, propaganda e pronarëve të qendrave të mëdha tregtare në Kosovë e mbajti mitin e disa prej artikujve serbë ndër shqiptarë.
Ndalimi i dhunshëm i mallërave serbe në Kosovë nga ana e Qeverisë Kurti dha efekte pozitive për goditjen e mitit serb mbi ekonominë por jo dhe fundosjen e këtij miti! Sidoqoftë askush nuk guxoi të flas për ndalimin e mallit serb, të paktën deri në përafrimin e balancimit të importit nga Serbia me eksportin të cilin vazhdon ta pengoj shteti serb në shumë mënyra, thjeshtë sepse donatorët kryesor si të PDK ashtu dhe LDK janë tregtarët me mall serbë!
Diplomacia, e cila ka lënë shumë për të dëshiruar me përjashtim të Dialogut Kosovë-Serbi i cili ishte më i miri deri në ditët e sotme, sërish nuk ka një ofertë ndryshe nga ajo që ofroi Lëvizja Vetëvendosje dhe sërish del Richard Grenell me arrogancën e tij serbe për ti dhënë leksione Albin Kurtit mbi dashurinë për Amerikën!
Ndoshta sulmi i gërditshëm që bënë Richard Grenell mund të ngrohë ca zemra në LDK dhe PDK, dhe shumë zemra në Beograd, por Kurti për të cilin flet I dërguari amerikan për misione të veçanta vetëm sa i shton vota Lëvizjes Vetëvendosje.
Për shumë veprime gjatë kësaj fushate, Albin Kurti mund të cilësohet delirant, por jo për ato për të cilat foli dhe akuzoi Richard Grenell, aq më shumë mosrespektin ndaj Amerikës! Këtë skizofreni deri më sot nuk e ka menduar asnjëri prej liderëve shqiptarë në Kosovë, vetëm se mund të thuhet që Kurti e ka shfrytëzuar zhvlerësimin që i kanë bërë këtij respekti, Mustafa, Thaçi dhe Haradinaj!
Me këtë zhvlerësim dhe kaosin që mbretëroi në BE, Albin Kurti i tërhoqi zvarrë rivalët e tij politik edhe gjatë kësaj fushate që me batonë e buzhalë nuk arritën të prodhojnë ide më vizionare për të shmangur konfliktin me ndërkombëtarët për shkak të veprimeve të Kurtit në Veri, si dhe themelimin e Asociacionit të komunave me shumicë serbe!
Vënia në kandar vetëm e Veriut, do t’i lehtësoj më 9 shkurt vendimin para kutisë së votimit të çdo qytetari të Kosovës!
Në mes të Veriut pa bandat e Radoiçiçit dhe atij që mund të lëviz çdo njeri normal, nuk ka ndonjë hamendësim që mund t’ja ndërroj mendjen asnjë shqiptari! Sot, edhe shumë serbëve që jetojnë në Jug!
Mbyllja e strukturave paralele me një politikë ndryshe të opozitës ndoshta nuk kishte se si të përdorej nga Lëvizja Vetëvendosje dhe Albin Kurti si autor i saj! Por kur çekiçit i binë këta analfabet funskional aty ku mendon farkëtari, për këtë nuk mund të fajësohet vetëm Albin Kurti pavarësisht se çfarë mendon Rama, Vuçiç e aq më pak Grenell!
Përdorimi i Dinarit ndoshta nuk do të zinte vend në kandarin e 9 Shkurtit sikur kandidatët e PDK dhe LDK të funskiononin me logjikën e atyre që janë, ekonomistë! Por, kur këta politikanë anemikë kërkojnë koordinim nga Albin Kurti për të heq edhe valutë të huaj nga sistemi i Kosovës, kjo tejkalon dhe konceptin e vazalitetit ndërsa i jep nga ana tjetër Kurtit argumente të forta si për strukturat paralele ashtu dhe dinarin serb ti konvertoj në fitore të mëdha elektorale, që e qartësojnë dhe votuesin para kutisë votimit!
Targa serbe në Veri dhe Jug të Mitrovicës, nuk ishte vetëm çështje targe sepse automjeti me atë lloj targe nuk ndalohej fare nga Policia e Kosovës! Pra, ky privilegj që në Kosovë e kanë vetëm automjetet e KFOR-it, pandehur u bë dhe për automjete që nuk respketojnë ligjet e Kosovës dhe marrëveshjen e arritur në Bruksel!
Dhe në fund, Asociacioni i komunave me shumicë serbe! Nëse rivalët e Albin Kurtit mendojnë se Asociacioni duhet të temelohet vetëm sepse ashtu thotë Richard Grenell, mos të paragjykojnë fare lobimin që ka bërë për shtetin serb dhe dekoratën që mori për atë shërbim, mjafton të kujtojnë ditët e fundit të Presidentit Hashim Thaçi në liri!
Pse Hashim Thaçi përfundoi prapa hekurave në Hagë dhe jo në Washington për të firmosur Marrëveshjen historike sot mund të bëhen shumë hamendësime, duke përfshirë dhe “Evropën kurvë” që minoi planet e Presidentit të SHBA, Donald Trump! Por, organizator i kësaj Marrëveshje ishte pikërisht Richard Grenell në atë kohë I Dërguar për dialogun Kosovë-Serbi! Sikur të qëndronte mbrapa Presdenti Trump ai do të ishte besnik deri në fund siç ishte me Benjamin Netanyahu, kur jo një Gjykate Speciale si ajo e Kosovës, por Gjykatës Ndërkombëtare Penale i tregoi se ku e ka vendin!
Në këto rrethana, çfarë thotë kandari mëngjesin e 9 Shkurtit! Lëvizja Vetëvendosje do të dal e para por çdo votë për ta lënë në opozitë do të thotë votë për të kthyer Bandat e Radoiçiçit në Veri; Rikthimin e strukturave paralele, dinarit serb dhe targave serbe! Dhe, themelimin e Asocacionit të komunave me shumicë serbe pa një Marrëveshje për njohje të Kosovës jo nga Serbia por të paktën nga pesë shtete të BE që nuk e kanë njohur; Nëse jo, edhe më keq: Shkëmbimin e Veriut me një copë nga Lugina e Preshevës!
