Shuhet Bajram Qerkini

Shuhet Bajram Qerkin! Lajmin për ndarjen nga jeta të Kryetarit të Shoqatës “Zëri i Prindërve”, Bajram Qerkini, e ka bërë me dije Familja ndërsa njofton se varrimi do të bëhet ditën e martë, 25 shkurt 2025 në orën 12:00, në varrezat e qytetit në Shipol të Mitrovicës.

“Sot i mbylle sytë për të kaluar në amshim. Vdekja të mori dhe të ngjiti në Olimpin e njerëzve që lanë gjurmë për këtë vend. Vërtet, të Zotit jemi dhe vetëm tek Ai është kthimi. Ti sot shkove te Lartmadhëria e Tij.

Sëmundja që të mbajti shtrirë tash e tre muaj ishte pushimi për një jetë plot sakrifica dhe brenga. Sot, u bashkohesh Babës Zenel dhe Babës Sadik, të cilët ndërruan jetë pa e ditur fatin e baballarëve të tyre. Ti shkove me boshllëkun për Reshatin.

Njëzet e pesë vite përpjekje për të ditur fatin e djalit dhe të personave të tjerë të pagjetur nga lufta në Kosovë. Njëzet e pesë vite me veshin dhe syrin hapur, duke pritur një lajm për ta. I mbylle sytë dhe veshët sot, pa e marrë atë lajm,” thekson Familja Qerkini përmes një njoftimi në rrjetin social Facebook.

Ndryshe, Bajram Qerkini përveç angazhimit të pakursyer me Shoqatën “Zëri i Prindërve” për të zbuluar fatin e pagjeturëve, Ai jetoi çdo ditë me dhimbje në shpirt, pasi prej më shumë se 20 vitesh nuk ka asnjë informacion për djalin e tij të zhdukur gjatë luftës në Kosovë.