Viti 2024, SPAK: 629 masa, 5.1% “arrest me burg” për korrupsion dhe 30.84% për krim të organizuar

Në vitin 2024, janë dhënë masa sigurimi për 629 persona gjithsej, prej të cilave “arrest me burg” për 236 persona, ka bërë të ditur sot Prokuroria e Posaçme kundër Korrupsionit dhe Krimit të Organizuar, SPAK,

“Nga vlera totale: Për Korrupsionin, masa “arrest me burg” zë 5.1% të totalit të masave. Për Krimin e Organizuar, masa e sigurisë “arrest me burg” zë 30.84% të totalit të masave të sigurimit të rregjistruara,” shprehet SPAK në reagimin e tij përmes rrjetit social Facebook.

Ky konfirmim nga Prokuroria e Posaçme kundër Krimit të Organizuar dhe Korrupsionit vjen si reagim ndaj kritikave të Kryeministrit Edi Rama, i cili akuzoi organin e akuzës për shkelje të standardeve duke abuzuar me dhënien e masës së sigurisë “arrest me burg” për personat që janë nën hetim.