Berisha: Është krijuar një frymë optimizmi, besimi dhe vendosmërie, që nuk është parë nga viti 1991

Duke konstatuar krijimin e një frymë optimizmi, vendosmërie dhe besimi ndër demokrat, që nuk është parë që nga viti 1991, Kryetari i Partisë Demokratike, Sali Berisha, sot para Grupit Parlamentar të PD paralajmëroi se të këqijat e Edi Ramës dhe Partisë Socialiste do numërohen, nuk do injorohen, por me to nuk do merren në fushatë elektorale.

Ndërsa Kryeministri Edi Rama vazhdon dhe paralajmëron fishkëllima për arritjen e marrëveshjes me PD-në për të shkrirë SPAK-un, sot Kryetari i Partisë Demokratike e bëri të qartë se PD nuk do bashkojë votat me Edi Ramën për asnjë lloj mase ndaj sistemit të drejtësisë!
Në fund, Kryetari i Partisë Demokratike, Sali Berisha bëri dhe një zoim solemn, se pas datës 11 maj, Edi Rama do të ekstradohet në SHBA për t’u rigjykuar me McGonigalin.

“Përshëndetje të përzemërta, falënderime dhe mirënjohje për të gjithë angazhimin tuaj. Për të gjithë angazhimin e drejtuesve qëndrorë dhe lokalë të PD në takime intensive, të frytshme me emigracionin dhe diasporën në Europë dhe në botë. Si dhe për punën që po bëhet me strukturat e PD në të gjitha qarqet e vendit për fushatën elektorale të zgjedhjeve të 11 majit 2025.
Mendoj se puna që keni bërë dhe po bëni është shumë e vlefshme, shumë e rëndësishme për fitoren e PD. Është arritur të krijohet një frymë optimizmi, vendosmërie dhe besimi, e cila nuk është parë ndonjëherë që nga viti 1991.

Disa kohë më parë, duke bërë analizën e disa elementëve, unë krijova bindjen se ka disa ngjashmëri, sado që Shqipëria e vitit 2025 me Shqipërinë e vitit 1991 është vite drite larg, përsëri ka ngjashmëri të dhimbshme midis asaj periudhe dhe kësaj periudhe.
Ngjashmëritë janë thjesht, së pari ka kërcënim të lirisë.
Ka një agresion ndaj opozitës, arrestime, burgosje, marrje mandatesh. Këto nuk ishin në vitin 1991. Nuk na burgosnin drejtuesit kryesorë, pavarësisht se i kishin të gjitha mundësitë, por këtë nuk e bënë.
Kurse Edi Rama në traditën e diktaturës së etërve të tij, nuk ndalet para asgjëje.
Po kështu marrja e mandateve, burgosja e deputetit.
Pra, të gjitha këto kanë zgjuar në mendjen e njerëzve të shkuarën e hidhur të atyre që e kanë përjetuar.
Tek të tjerët, jetojnë në vende të lira dhe e shohin që nuk ka. Imagjinoni emigrantët në Itali, sikur të shihnin tre liderët e opozitës, dy në arrest, tjetri në ndjekje penale. Apo në Gjermani apo në vendet e tjera.
Dhe së dyti, varfëria ekstreme. Shumë herë më e madhe se ç’ishte, çka përbën një barrë edhe shpirtërore, edhe materiale, edhe ekonomike për të gjithë emigracionin dhe diasporën tonë.
Në qoftë se Shqipëria nga viti 2013 deri në vitin 2025 do kishte ndjekur trendin e rritjes së rrogave, sot pensionisti nuk do merrte në Mal të Zi 450 euro, do merrte në Shqipëri 450 euro.
Sot rroga minimale në Shqipëri nuk do ishte 400 euro, por do ishte sa ç’është në Rumani, 800 euro.
Pra, mirëpo kjo është një barrë, sepse këta njerëz detyrohen të çojnë njerëzve të tyre në shtëpi për të blerë kafshatën, për të blerë ilaçet.
Pra, janë këto dy faktorë, mendoj unë, që kemi konstatuar këtë frymë të fuqishme vullneti për ndryshim në Shqipëri,” tha Sali Berisha ndërsa kishte një mesazh për deputetët të lënë çdo gjë dhe të merren me regjistrimet e diasporës!

“Unë, megjithëse thashë keni bërë punë të jashtëzakonshme, u bëj thirrje këto ditë, të lëmë çdo gjë dhe deri më datën 2 t’u përkushtohemi regjistrimeve, numrit më të madh të mundshëm të emigrantëve tanë për të votuar.
Tani, ky është një zhvillim shumë pozitiv, kjo frymë, ky optimizëm, ky vullnet që pasqyrohet në emigracion dhe diasporë, ka një ndikim të fuqishëm edhe në Shqipëri, ku njerëzit janë në kushte më të vështira, përballojnë të gjitha pasojat e narkoregjimit, po përsëri është mesazh shprese, mesazh besimi se do çlirohemi dhe është gjë shumë pozitive.
Programi, përsëri unë theksoj, programi ynë duhet të jetë libri ynë, Kushtetuta jonë në këto zgjedhje, në kuptimin e komunikimit me ta. Ne, mbi të gjitha do paraqesim programin. Kemi këtu 3 libra, një libër është për arritjet e PD-së. Ne, pse e përdorim këtë libër? Jo për glorifikim, por thjesht si një bazë që na lejon ne të shohim tek Shqipëria Madhështore.
Se kur thua Shqipëria Madhështore, tingëllon joreale. Se më tha një gazetar, ku e kishe madhështoren në vitet 2005-2013. Po, i thashë unë, se dolëm nga grupi i vendeve me të ardhura të ulëta në grupin e vendeve me të ardhura të mesme të larta. Nuk ka më madhështore. Kjo quhet quantum leap.
Ishim me atë infrastrukturë, e përmbysëm. U anëtarësuam në NATO, bëmë vizat.
Pra, thjesht për të argumentuar pse na shërben ne ky libri i punëve të mira. Na shërben thjesht për vizionin tonë për të ardhmen.
Libri i dytë, libri kryesor, programi ynë. Ky program ka gjithnjë qytetarin, askush nuk mund të thotë se ku gjenden paratë. Të gjitha paratë janë. Po si do i shpërndash? Në qoftë se ne ndjejmë detyrim ndaj qytetarëve, sigurisht një pjesë të tyre do i kthejmë në rroga dhe pensione. Kjo është e thjeshtë.
Prandaj do vendosim minimumin jetik 200 euro. Me 200 euro nuk do ketë më varfëri ekstreme. Të gjithë e zhdukin në këtë mënyrë varfërinë ekstreme. Caktojnë një shumë dhe ajo shumë është gjithnjë më e madhe se e varfërisë ekstreme. Të biem pak në paqe.
Kjo është vetëm fillimi. Rrogat minimale rriten me 20 përqind, janë 400, bëhen 500. Kjo është gjithnjë tre muajt e parë. Karta e konsumatorit. Po, nuk mund të taksohen njëlloj në ushqime ky që merr 200 euro me ty që merr 1 mijë euro. Ky do ketë kartën e konsumatorit, të paktën ato ushqime do i marrë pa taksa. Do i kthehen taksat.
Energjia për biznesin. Si mund të paguajë biznesi 24 lekë për energji? Jo, do paguajë 6 lekë dhe absolutisht e përballueshme 100 përqind. Këta vjedhin.
A e dini ju se këta sot pas 11 vitesh kanë të ndërtuar përveç tunelit të Llogarasë, absolutisht asnjë rrugë me buxhet të tyre. Ura e Limuthit-Thumanë është ndërtuar me fondet e privatit. Është me kredi të privatit.
Bajpasi i Vlorës me kredi të dhënë nga Komisioni Europian në kohën e PD. Bajpasi i Fierit me kredi dhe ka qenë i ndërtuar deri në gjysmë. Ku i çuan këta? Rrasa guri në sheshe.
Po sa janë ato? Janë 57 miliardë euro pasi zbret rrogat. Me 57 miliardë euro ndërton gjëra fantastike, përrallore. Ku janë? I kanë zhdukur. Prandaj bëhen mbledhjet. A i patë mbledhjet sot,” tha lideri i opozitës ndërsa paralajmëroi se në fushatë elektorale nuk do merren me të zezat e Edi Ramës.
“Libri i tretë është libri i zi. Këtu, pavarësisht se ai të lexosh ditë e natë nuk shterron, 20 përqind të kohës, aspak më shumë se tani duhet të punojmë me zgjedhësit tanë, t’u shpjegojmë programin tonë, çfarë do bëjmë.
Të këqijat e tyre do i numërojmë, nuk i injorojmë, ama nuk do merremi në fushatë elektorale, të ulemi dhe të numërojmë të zezat e Edi Ramës. Le t’i numërojë vetë ai, ne do numërojmë ato që do bëjmë dhe 20 përqind kritikat.
Përndryshe, siç e shihni, kthehemi tek një reagim i të gjithë atyre që ndjekin Shqipërinë apo dëgjojnë për Shqipërinë. Reagimi i tyre është më i veçanti që kam dëgjuar në jetën time. I pabesueshëm, e pabesueshme, e pabesueshme.
Nëse i thua dikujt që sot mazhoranca mblodhi pseudogrupin parlamentar për të dëgjuar rektorin e një universiteti, të cilit i janë lëshuar mandate arresti për një laborator që nuk ekziston, askush nuk mund ta besojë, por ja që kjo ndodh. Tani, duhet të sqarojmë disa momente këtu.
Së pari, pse përdor Edi Rama këtë? Edi Rama përpiqet të mbulojë diellin me shoshë duke shfrytëzuar një dosje që në përpjestim janë shuma të vogla, e përdor këtë për të mbuluar… nuk mungon vetëm djegësi i Tiranës që kushton 130 milionë euro, por mungon edhe laboratori që kushton 30 milionë.
Pra, përpiqet të përdorë shoshën për të mbuluar të vërtetat, për të mbuluar diellin.
Kanë abuzuar këta 30 milionë lekë me aferën e 5D-ve, me aferën e Lajla Asadit, që shkon vetëm gardëroba 870 mijë euro, me 5D dhe pallatet, me Bushkën. Edhe të më falni d.m.th, po ai hajduti tjetër nuk kishte të drejtën morale të ulej në vend të kësaj!
Pra, çfarë ishte kjo sot?
Unë nuk marr përsipër të them as për dosjen, por them një gjë, që rektori e përleu keq universitetin se kur mendon të shpëlash apo të qash për një aferë në rifuxhion e hajdutëve, duhet të mendosh 5 herë që të futesh aty. Nuk janë pekatorium ata, ata janë furbiorium. Se janë hajdutë ata.
E shihnit ju si qesëndisej Lubia apo Taulant Balla? Hë, nuk jemi vetëm ne, janë edhe pedagogë. Shihni se çfarë ndodh me pedagogët. Të cilët, nuk kam asnjë koment, por di një gjë që nuk ndodhte kurrë që të shkosh dhe të bësh konfesion në strofullën e zezë të hajdutëve në Europë siç është ai grup.”

Tani, tha Berisha para deputetëve të Grupit Parlamentar të PD, Edi Rama është në qark, është në rreth të kuq.
“Laptopi i Engjëll Agaçit po bëhet si laptopi i Hunter Biden. Po, e ka zhdukur Agaçin. Se Agaçit i kanë kapur laptopin. Dhe laptopi flet dhe do flasë pafundësisht. Dhe Edi Rama nuk ia thotë këtë, mendon se do kalojë çështjen e laptopit duke vënë në arrati Agaçin apo duke e shtruar në spitale.
E vërteta është se ajo që shihni ju, ai shfazim, ato sulme të paprecedenta të një pushteti ndaj pushtetit tjetër, janë të lidhura kryekëput me personin e Edi Ramës. E ka kapur frika dhe tmerri i dy dosjeve.
Dosja e McGonigalit dhe laptopi i Engjëll Agaçit.
Dosja McGonigal është aktualizuar. Ju jeni dëshmitarë. Në mediat amerikane, McGonigali është kthyer si çështje kryesore. Po aty, për çudi, aty nuk po flitet më për McGonigal-Deripaska po flitet për McGonigal-Edi Rama. Është shumë e veçantë dmth. Se McGonigal ka pasur dy dosje. Njërën Deripaska për të cilën është dënuar në Nju Jork, njërën Edi Rama për të cilën është dënuar në Uashington.
Tani del në skenë dosja e Uashingtonit. Dosja e Uashingtonit është dosja më e rëndë, e cila është më flagrante, ku një kryeministër i korrupton një vendi kryesor partner, kryezbuluesin e Nju Jorkut. Ai që është kryezbuluesi i Nju Jorkut është kryezbuluesi kryesor i SHBA se aty janë të gjithë epiqendrat.
E korrupton për ta angazhuar kundër opozitës shqiptare.
Është dosja më e zezë në çdo aspekt dhe unë u garantoj ju se asaj dosje, të bëjë ç’të dojë, të shesë Surrelin dhe çdo pasuri që ka, asaj dosje nuk i shpëton dot. E ka kuptuar këtë sepse e mbrojti gjer tani Spaku i tij, tani nuk e mbron më. Tani është një drejtësi tjetër e fuqishme e vendosur të hetojë krime të mëdha si kjo.”

Në fund, përkundër propagandës së Edi Ramës për mundësinë e shkrirjes së SPAK, Kryetari i Partisë Demokratike e bëri të qartë sot se PD nuk do bashkojë votat me Edi Ramën për asnjë lloj mase ndaj sistemit të drejtësisë.

“Edi Rama përpiqet me propagandën e tij të krijojë një analogji të qëndrimeve të tij prej kryehajduti ndaj prokurorëve me qëndrimet tona. Jo, është krejtësisht tjetër. Njëherë duhet të qartësoj shqiptarët, se kurrë kjo parti nuk do bashkojë votat me Edi Ramën për asnjë lloj mase ndaj sistemit të drejtësisë. Kjo parti ka platformë të qartë, ka shprehur qëndrimet e veta në bindjen më të thellë se Shqipëria nuk mund dhe nuk duhet të ketë prokurori politike.
Po kjo nuk do bëhet në asnjë rrugë tjetër përveç Komisionit të Venecias. Kjo do bëhet me reformim dhe në asnjë rast duke shndërruar grupin parlamentar në prokuror, as në avokat dhe aq më pak partia që pretendon luftën me zero tolerancë ndaj korrupsionit, të bashkohet me cilindo qoftë në mbrojtje të korrupsionit.
Ai e shndërroi grupin e hajdutëve, se imagjinoni çfarë gëzimi kishte aty, Bushka në një anë, Lubia në anën tjetër, Taulanti në anën tjetër, Damiani atje ku ishte i ulur, Ulsiu kërcente nga gëzimi kur dëgjonte rektorin.
Mor zoti Sallaku, a e kupton që u fute në strofullën e hajdutëve ti? Kujt i qahesh ti?
Pra, të gjithë këta janë të përfunduar.
Këta janë të marrë fund dhe këta të mos kujtojnë kurrë se mund të kryejnë qoftë edhe veprimin më të vogël me mbështetjen e opozitës. E kundërta është. E paralajmëroj Edi Ramën, në rast se i lejon vetes të rrethojë institucionet, Surreli do i rrethohet.
Nuk ka, nuk mund të ketë akte triumfi të Eskobarit siç ndodhi në vitet ’80 në Kolumbi. Jo. Ndaj dhe uroj që të mos ndryshojë mendje se deklaroi se nuk do rrethojë më. Të mos ndryshojë mendje se do e gjejë Surrelin të rrethuar. Nuk bëhet kjo. Lërini ato, janë procese, reforma.
Por ta shndërrosh grupin parlamentar në rifuxhio të hajdutëve. E tregoi sot veten me seancën që dëgjoi.
Imagjinoni ju hajdutët më të mëdhenj bëhen gjykatës. Nuk kishte seancë si ajo. Ajo ishte seanca më tragjikomike në histori.
Ndaj dhe këto janë qëndrimet tona. Absolutisht zero tolerancë ndaj krimit dhe korrupsionit dhe një program i shkëlqyer për shqiptarët,” tha Kryetari i Partisë Demokratike, Sali Berisha, duke siguruar Kryeministrin Edi Rama se pas datës 11 maj, do të ekstradohet në SHBA për t’u rigjykuar me McGonigalin”

“Edi Rama, të garantoj se pas datës 11 maj, do të ekstradohesh në SHBA për t’u rigjykuar me McGonigalin. Ky është zotimi ynë. Përndryshe mund të gjykohesh në Shqipëri para 11 majit.”