Edhe një koalicion i majtë në zgjedhjet e 11 Majit, zyrtarizohet “Nisma Shqipëria Bëhet”

Lëvizja Shqipëria Bëhet dhe Nisma Thurje kanë njoftuar sot zyrtarisht koalicionin e tyre për në zgjedhjet e 11 majit, “Nisma Shqipëria Bëhet” me drejtues Adriatik Lapaj.

Duke i dhënë fund debatit se cilës ideologji i takojnë, që në rastin më të madh u mohua nga vetë Lapaj se nuk janë të majtë, sot duke iu bashkuar të majtës së thurur ekstreme u konfirmua ngjizja e koalicionit të dy liderëve jo tek pikëpamjet e tyre politike por tek Fondacioni Soros i cili po kërkon futjen në jetën politike me një parti që nuk drejtohet nga Edi Rama. Këtu, drejtuesi i këtij koalicioni ishte shumë i qartë.

“Kemi thënë që s’ka bashkëpunim me asnjë prej subjekteve që kanë përfaqësuar rrënimin e Shqipërisë dhe do bëjmë çdo tentativë për të punuar me subjekte që nuk bartin mëkate të 34 viteve. Dua të theksoj se jemi në negociata dhe deri në fund të afatit koalicionit do t’i bashkohen edhe subjekte të tjera,” tha Adriatik Lapaj.

Ndryshe, krerët e koalicionit “Nisma Shqipëria Bëhet” sqaruan me këtë rast se emërimi i Adriatik Lapajt si drejtues do të jetë i një natyre formale sepse koalicioni do të drejtohet nga një Këshill i Anëtarëve përbërës të koalicionit.