Anulohet panairi ndërkombëtar në Beograd: Zyrtarët e lartë të Serbisë i etiketojnë të huajt si armiq!

Panairi ndërkombëtar South East Europe, SEE, Mobility, i cili ishte parashikuar të mbahej me 24 dhe 25 prill në Beograd u anulua për shkak se kompanitë pjesëmarrëse nga vendet e Bashkimit Evropian konsiderojnë se ekziston rreziku i sigurisë për përfaqësuesit e tyre, sepse zyrtarët e lartë të Serbisë i etiketojnë të huajt si armiq, u bë e ditur sot.

Organizatori i këtij panairi, Cluster hekurudha e Evropës Juglindore, ka bërë të ditur se kompanitë nga pesë vende të BE dhe një pjesë e asociacionit të liderëve të industrisë së hekurudhës evropiane, ishin të detyruar të anulojnë panairin SEE Mobility.

Kompanitë që duhet të merrnin pjesë si prezantuese theksuan se aktualisht ekziston rreziku i konsideruar për përfaqësuesit e tyre në Serbi për shkak të përndjekjes së personave nga vendet e BE që marrin pjesë nëpër konferenca ndërkombëtare, që zbatohen nga organet shtetërore të Serbisë, për shkak të etiketimit publik të drejtorëve të kompanive të njohura evropiane në Serbi.

Siç u theksua, nga ministria e jashtme dhe ambasadat e shteteve prej nga vijnë janë paralajmëruar se zyrtarët më të lartë të Serbisë me muaj të tërë nëpër dalje publike akuzojnë Perëndimin, Evropën dhe vendet anëtare të BE se po zbatojnë “revolucionin e ngjyrosur” në Serbi dhe po etiketojnë personat e huaj si armiq, arsye për të cilën mund të cenohet siguria e njerëzve të biznesit që vijnë në Serbi.

Ndryshe, Panairi SEE Mobility për kët vit është përgatitur më shumë se një vit dhe për herë të parë në histori në hapjen e panairit në Beograd si mysafir ishin paralajmëruar drejtorët e tre asociacioneve më të mëdha të industrisë hekurudhore – Unioni ndërkombëtar i hekurudhave, UIC), Unioni i furnitorëve evropianë të hekurudhave, UNIF, dhe, Asociacioni evropian i klasterëve hekurudhor, ERCI.