Rikthehen kontrollet në kufirin Shqipëri-Kosovë

Në ditët kur po festohet Epopeja e UÇK-së dhe Prekazi po vizitohet nga shqiptarët e të gjitha trevave shqiptare, në kufirin shqiptaro-shqiptar Shqipëri-Kosovë në Morinë janë rikthyer kontrollet kufitare pasi Marrëveshja e lëvizjes së lirë ka pushuar së funksionuari nga 1 marsi për një periudhë dymujore.

Gjatë kësaj periudhe pikat kufitare të Shqipërisë dhe Kosovës, sipas autoriteteve, do të bëjnë përpunim e të dhënave të drejtueseve të automjeteve dhe udhëtarëve me procedurë të përshpejtuar në mënyrë që të shmangen radhët dhe pritjet për shkak të fluksit të lartë të lëvizjes së mjeteve dhe udhëtarëve në ditët kur ka nisur dhe përmirësimi i motit.

Ndërkohë gjatë fundjavave dhe festave zyrtare, thuhet se lëvizja është pa kontrolle për automjetet me targa të Shqipërisë dhe Kosovës.

Marrëveshja e lëvizjes së lirë të nënshkruar mes Kosovës dhe Shqipërisë në pranverën e vitit të kaluar shmangu trafikun dhe lehtësoi lëvizjen kufitare gjatë sezonit veror, por nuk është e qartë pse ajo pushoi së funksionuari pikërisht në ditët e Epopesë së UÇK-së në Prekaz.

Ndryshe, pika kufitare e përbashkët Shqipëri-Kosovë, përpunon numrin më të madh të mjeteve dhe udhëtarëve që hyjnë dhe dalin në të dyja anët e kufirit.