“Fuqizimi i grave dhe vajzave”, Berisha: Shqipëria Madhështore, nënat dhe motrat me rolin kryesor

Në projektin Shqipëria Madhështore, gratë dhe vajzat, nënat dhe motrat, do luajnë rolin e tyre kryesor, tha sot Kryetari i Partisë Demokratike, Sali Berisha, ndërsa shpalosi Programin e Qeverisjes 2025-2029 për “Fuqizimin e grave dhe vajzave”.

“Së pari, është një rast shumë i veçantë për mua të uroj nga zemra vajzat, gratë, nënat, motrat, demokratet, por dhe të gjitha shqiptaret kudo që janë sot në këtë ditë që është dita e nderimit të tyre.
Dita në të cilën është një simbol, por e vërteta është se shoqëria shqiptare dhe shoqëria njerëzore është pafundësisht e detyruar ndaj vajzave dhe grave, ndaj nënave dhe motrave.
Sot ne mblidhemi në këtë ditë në një moment kur gruaja shqiptare ndodhet në vitet ndër më të vështirat e saj.
Po të kthehemi 30 vite më parë, në diktaturë, ju gjenit nënën shqiptare që punonte me tre turne, që mezi përgatiste, mezi ushqente dhe vishte fëmijët e saj, në kuptimin e vërtetë të fjalës robtohej, por kishte edhe në atë kohë gra ministre, anëtare të Byrosë Politike, të cilat mbronin interesat e partive dhe jo interesat e nënave dhe motrave shqiptare.
Sot, po të kthehemi pas 30 vite, narkodiktaturën apo diktaturën e bandave, ato të cilat e vuajnë më shumë se të gjithë të tjerët janë nënat, gratë dhe vajzat në të gjitha aspektet.
Përsëri kemi nënën me rrogë të ulët ose pensione të ulëta, që detyrohet t’i thotë djalit, vajzës, merr rrugët e botës, ndiq fatin tënd sepse nuk të mbaj dot, nuk të ushqej dot, nuk kemi të ardhura, nuk jetojmë dot së bashku.
Sepse me të ardhurat e saj është faktuar se 41 përqind e familjeve nuk ushqejnë dot fëmijët në mënyrë të përshtatshme sepse janë në limitet e varfërisë.
Pra, ka një situatë dramatike të nënave dhe grave shqiptare.
Ka ministre, ka deputete.
Do t’u jap një shembull, para një viti, qeveria franceze i akordoi qeverisë shqiptare 60 milionë euro të destinuara për ndihmën e grave.
Ç’është e vërteta, unë e vlerësova.
Po pse ku shkuan ato? Ato u futën në buxhet për t’u vjedhur.
60 milionë euro nuk ishin pak se me 60 milionë euro mund të zbusje kreditë e mijëra grave në biznes. Me 60 milionë euro mund të mbështesje mijëra start-upe të tyre.
Plus që në ato 60 milionë euro, duhet të fusje edhe ti një fond. Por ky fond u trupëzua i tëri në buxhet dhe humbi krejtësisht destinacionin e tij.
U ndala këtu tek shëmbëlltyra.
Edhe atëherë kishte anëtare të Byrosë Politike, edhe atëherë kishte organizatë gruaje, edhe sot ka disa ministre, por problemi është se nuk i dëgjon njëherë të flasin për problematikat e mëdha të nënave, motrave, grave, vajzave, për punësimin e tyre, për biznesin e tyre, për lehtësitë që meritojnë.
Faktikisht po të vini re fjalorin e përditshëm, janë të përjashtuara. Nuk flitet për gratë, sikur nuk ekzistojnë.
Ndërkohë ato janë absolutisht më të dhunuarat ndoshta në të gjithë Europën.
Dhuna ndaj tyre është rritur me 50 përqind e më shumë. Në rast po të marrësh shifrat e sotme të popullatës, është rritur me 100 përqind në të gjitha format.
Përsëri për to nuk flitet. Nuk është e rastit.
Kryeministri Edi Rama është kryeministri më mizogjen që ka pasur Shqipëria ndonjëherë dhe që ka njohur Europa.
Ato shpërthime që i ra tavolinës, ato janë të zakonshme në mbledhjen e Këshillit të Ministrave.
Janë të zakonshme në ditën e tij të punës. Ndaj dhe ai nuk thotë një fjalë të vetme në mbrojtje, në mbështetje të grave dhe vajzave.
Nuk ka një projekt të vetëm, nuk mund të tregojë kjo qeveri një projekt të vetëm me të cilin ajo lufton për suksesin e tyre,” tha Sali Berisha para ekspertëve të opozitës ku me mbështetjen e Fondacionit të CDU gjermane “Konrad Adenauer” organizua dhe ky takim ku u shpalos dhe Programi i Qeverisjes 2025-2029 për “Fuqizimin e grave dhe vajzave”.

Lideri i opozit u zotua me këtë rast se PD do garantojë suksesin e çdo nëne dhe vajze në Shqipëri.

“Çështja themelore, vetëkuptohet, është muri i patriarkisë. Muri i patriarkisë është një mur shekullor dhe e them gjithnjë, është dhunuesi kryesor i lirive dhe të drejtave të njeriut në Shqipëri dhe në botë.
Ndaj dhe beteja kundër këtij muri është para së gjithash betejë për emancipimin shoqëror dhe njerëzor.
Ky mur ka konsoliduar pabarazi të mëdha.
Unë u them ju, në vitin 2005, kur ne përllogaritëm rrogën e punonjësve burra dhe gra, rezultonte se gratë e kishin rrogën 36 përqind më të ulët se burrat. Sigurisht që bëmë ndërhyrje shumë të vendosura, dyfishimin dhe mbidyfishimin e rrogave në sektorët që dominoheshin nga gratë dhe kjo zbriti afërsisht në nivelet e BE, zbriti në 17.8 për qind.
Unë dhashë një shembull, ndaj dhe jam sot këtu para jush për t’u garantuar se beteja jonë do të jetë e vendosur së pari kundër murit të patriarkisë.
Kundër çdo forme diskriminimi. Fatmira theksoi një moment shumë interesant, të gjithë ata që kanë dhënë mësim, kanë pasur një raport absolutisht në 10 studentë apo nxënës, 8 kanë qenë vajzat më të shkëlqyera, 2-3 kanë qenë djem. Kjo është epërsi e padiskutueshme intelektuale e vajzave.
Në dekada, testet e inteligjencës dilnin eprore tek burrat. Po ka nja dy dekada, që ato dalin qartësisht eprore te vajzat.
Pse? Sepse tani kampionet e studimit janë me shkollim të barabartë, janë vajza dhe djem të shkolluar.
Dhe këto teste faktojnë se vajzat kanë treguesit intelektualë eprorë ndaj bashkëmoshatarëve të tyre djem
E theksova këtë moment sepse çështja e qëndrimit ndaj rolit të vajzave dhe grave nuk është vetëm çështje thelbësore e emancipimit shoqëror, por edhe çështje e potencialeve të jashtëzakonshme që gratë dhe vajzat mbartin në vetvete, të cilat duhet të shfrytëzohen në interesin më të mirë të tyre dhe të shoqërisë.
Çdo grua, çdo vajzë, çdo organizatë e mbështetjes së të drejtave të rolit të grave, duhet të marrë një gjë parasysh, që ato gra dhe vajza nuk duhet të dorëzojnë kurrë karrierën e tyre. Ato duhet t’i qëndrojnë me sakrifica të mëdha.
Por nuk ka asgjë më të rëndësishme se sa të qëndrojnë të pamposhtur në mbrojtje të karrierës së tyre dhe të ndjekin karrierën e tyre.
Studimet më të besueshme kanë treguar se rruga e mundimshme e ndjekjes së karrierës është garancia më e madhe e suksesit të tyre. PD është e vetëdijshme për këto potenciale të jashtëzakonshme që ekzistojnë te vajzat dhe gratë. Dhe unë u garantoj se do bëjë gjithçka për të gjitha hapësirat në të gjitha fushat.

Ku jemi ne sot si komb? Sot si komb, kulmet tona janë tek gratë dhe vajzat.
Shikoni se ku e ngritën këngën dhe zërin çikat e Kosovës dhe Shqipërisë, Dua Lipa, Rita Ora, Bebe Rexha, Ava Max, Ermonela Jaho. Kurse në Olimpin e teknologjisë sot është Mira Murati.
Por është edhe një tjetër, më eprorja. Është Nënë Tereza, e cila me dhuntitë e vajzës shqiptare arriti të meritojë titullin më madhështor, nënë e të gjithë njerëzimit.
Pra, unë jam sot këtu për t’u zotuar para jush se programi i PD do të synojë së pari të ndërhyjë me urgjencë në varfërinë ekstreme me të cilën përballen sot qindra e mijëra gra shqiptare.
Paketa e dhembshurisë që e quajmë ne do i japë fund varfërisë ekstreme.
Do bëjmë gjithçka që paga minimale, e cila në tërësi është më e zakonshme tek gratë se tek burrat, për shkak të disa sektorëve, të jetë reale dhe të mos guxojë të veprojë, siç u tha se i marrin disa dhe i kthejnë prapë.
Do bëjmë gjithçka që nënat me fëmijë të kenë pagesat për fëmijë.
Që nëna me fëmijën e tretë do i paguhet nga lindja gjer në 23 vjet tërësisht nga shteti fëmija i tretë.
Do bëjmë gjithçka për suksesin e biznesit të tyre me kredi, me grante, me diferencim në taksa dhe të gjitha këto janë jo vetëm interesi më i mirë i tyre, por suksesi i çdo nëne, i çdo motre, i çdo vajze, është sukses i të gjithë shqiptarëve.

Në fund, Kryetari i Partisë Demokratike garantoj se në projektin Shqipëria Madhështore, gratë dhe vajzat, nënat dhe motrat, do luajnë rolin e tyre kryesor

“Sot unë kam një falënderim të veçantë për të gjitha gratë dhe vajzat, të cilat këto tre vite, jo vetëm këto tre vite, por në 34 vite, në kohërat më të vështira, kanë qenë absolutisht pjesa më vitale, më e qëndrueshme e PD. Kjo është dëshmi e moralit të tyre të lartë, e besnikërisë së tyre ndaj vlerave dhe idealeve më fisnike të njeriut.
Unë gjithashtu dua të përshëndes të gjitha zonjat, zonjushat, që morën pjesë në primaret e PD dhe t’i garantoj se do bëjmë gjithçka, ndonëse ato vetë i tejkaluan kuotat, me përqindjet që morën.
Por ne do bëjmë gjithçka që të harrohen ato kuota.
Sepse prania e tyre në të gjitha institucionet e PD dhe institucionet e qeverisjes së saj është e domosdoshme, është jetike.
Së fundmi, ne jemi parti konservatore, për ne familja dhe vlerat e saj janë vlerë themelore e shoqërisë.
Familja si e tillë njohu këto vite agresionin më të madh në kohëra ndoshta dhe ky agresion erdhi nga ideologjia marksiste dhe post-marksiste me të cilën filloi një përpjekje e madhe për të shpërbërë familjen, për të emërtuar prindërit 1 dhe 2, për të ndërhyrë në gjininë njerëzore.
Fatmirësisht ndjehemi krenarë se ne qëndruam për këto vlera.
Ne i refuzuam ato dhe nuk rreshtim së mbrojturi familjen dhe vlerat familjare. Ne refuzuam çdo nisëm të kësaj mazhorance, e cila sillte në parlament ligjet antifamiljare. Por fakti që me 20 janar u inaugurua në Shtëpinë e Bardhë Donald Trump dhe shpalli këto praktika dhe këta individë si armiq të rrezikshëm të SHBA, ishte një zhvillim pozitiv për mbarë njerëzimin.
Ne kemi një betejë të madhe përpara.
Tani, Shqipërinë Madhështore mund ta krahasojmë me shumë projekte. Por gjë më madhështore kombi ynë se nënën nuk ka pasur. Kështu që duhet të jetë pikërisht ky moment, ky fakt frymëzimi ynë më i madh për t’i rikthyer nënës shqiptare të gjithë madhështinë e saj,” tha Kryetari i Partisë Demokratike, Sali Berisha, duke përfunduar:
“Kombi shqiptar, më shumë se kujtdo tjetër, se çdo gjëje tjetër, i detyron ekzistencën e tij nënës shqiptare.
Dhe kam bindjen që në projektin Shqipëria Madhështore, gratë dhe vajzat, nënat dhe motrat, do luajnë rolin e tyre kryesor.
E mbyll këtë duke i uruar ditëlindjen mikeshës tonë, Melihasë, e cila është një mike e pandarë e PD-së, një atdhetare e flaktë dhe një bashkëthemeluese e LDK me presidentin e ndjerë Rugova.”