Konsumi i kokainës, EUDA: Shqiptarët, të parët në Evropë, e marrin edhe në zyrë!

Përdoruesit shqiptarë të drogave kanë nivelin më të lartë të konsumit të kokainës në Evropë, me 41 për qind të përdoruesve që kanë konsumuar kokainë, përkundrejt 21 për qind që është mesatarja e Ballkanit Perëndimor dhe 29 për qind e Bashkimit Europian, sipas të dhënave të sondazhit të Agjencisë së Drogave të Bashkimit Europian, EUDA.

Anketa Europiane në Internet mbi Drogat, “European Web Survey on Drugs”, mblodhi të dhëna midis majit dhe korrikut 2024 nga persona përdorues të drogës, të moshës 18 vjeç e lart, që jetojnë në vendet e BE-së dhe jashtë saj. Në total, morën pjesë mbi 66.000 persona nga 31 vende.

Në Ballkanin Perëndimor u përgjigjën 4.442 individë të moshës 18 vjeç e lart, që përdorin droga në Shqipëri, Bosnje Hercegovinë, Kosovë, Mal të Zi, Maqedoni të Veriut dhe Serbi.

Analiza e përgjigjeve të të anketuarve zbuloi gjetje kyçe mbi përdorimin e tyre të drogave në 12 muajt e fundit. Të dhënat publike përfshinë gjetjet e përmbledhura të Bashkimit Europian dhe Ballkanit Perëndimor.

Të dhënat e përgjigjeve nga individët shqiptarë për Shqipërinë u vunë në dispozicion nga EUDA.

Shqipëri, kanabisi dhe kokaina drogat më të përdorura

Kanabisi mbetet droga që konsumohet më shumë nga individët shqiptarë, me 56 për qind të të anketuarve që kanë deklaruar që e përdorin atë. Përdorimi i kësaj substance është shumë pak më e ulët se mesatarja e Bashkimit Europian 59 për qind dhe më i lartë se në Ballkanin Perëndimor 42 për qind.

Shqipëria është e vetmja ku kokaina është substanca e dytë më e konsumuar pas kanabisit. 41 për qind e përdoruesve të drogave thanë se kishin konsumuar kokainë në 12 muajt e fundit. kjo përqindje është dy herë më e lartë se mesatarja e Ballkanit Perëndomor dhe shumë mbi nivelin e BE-së prej 29 për qind.

Në Ballkanin Perëndimor, substanca e dytë më e konsumuar është Benzodiazepines (pa recetë), me 22 për qind të përdoruesve, kundrejt 5 për qind në Shqipëri.

Në Shqipëri, substanca e tretë më e konsumuar është MDMA/Ecstasy 16 për qind e ndjekur nga kërpudhat dhe truflat 11 për qind.

Kokaina mbizotëron në bare

Kokaina pudër e ka konsumin më të lartë në bare, me 75 për qind të përdoruesve të tij shqiptarë që thanë që e pinin atë në lokale. Në shtëpi e kishin konsumuar 69 për qind e të anketuarve, në festa ose festivale muzikore 51 për qind, në makinë 35 për qind, në hapësirat publike si parqe 29 për qind, në natyrë 29 për qind.

Kokaina kristal (crack) konsumohet më shumë në ambientet e shtëpisë 75 për qind dhe më pak në bare 33 për qind.

Arsyeja kryesore e përdorimit të kokainës pudër është për të ardhur në qejf/ për argëtim 58 për qind, për të reduktuar efektet e alkoolit 39 për qind, për të reduktuar stresin/relaksuar 31 për qind, për të bërë shoqëri 24 për qind, për të qëndruar zgjuar 22 për qind.

Kanabisi konsumohet në natyrë, për të reduktuar stresin

Ambientet e hapura janë mjedisi kryesor ku konsumohet kanabisi nga përdoruesit shqiptarë, me 67 për qind të përgjigjeve. Edhe shtëpia (e vetja ose e dikujt tjetër) mbetet një ambient i preferuar 61 për qind. Në festa ose festivale muzike ishte zgjedhja për 44 për qind e të anketuarve.

Arsyeja kryesore që i nxit shqiptarët të përdorin kanabis është për të reduktuar stresin dhe për tu relaksuar 70 për qind, për të ardhur në qejf/ për argëtim 58 për qind, për të përmirësuar gjumin 43 për qind, për të menaxhuar depresionin 41 për qind, për arsye spirituale 31 për qind, për varësi 24 për qind, për të bërë shoqëri 19 për qind.

Kanabis edhe në shkollë, kokainë në punë

17 për qind e të anketuarve shqiptarë thanë se një nga vendet ku ata konsumonin kanabis ishte në shkolla. 11 për qind thanë se e konsumonin në punë.

Ndonëse me përqindje të ulëta, kokaina hyn edhe në shkolla, me 4 për qind të të anketuarve se thanë që e konsumonin dhe në shkollë.

Më i lartë është konsumi i kokainës pluhur në punë, me 20 për qind të të anketuarve që thanë se kishin pirë kokainë në zyrë.

Edhe për kokainën kristal, 17 për qind e përdoruesve shqiptarë thanë se e kishin marrë në punë.

Kanabis me cigare e alkool dhe kokainë me alkool e nikotinë

Përdorimi i shumëfishtë i substancave, i cili nënkupton konsumimin e dy ose më shumë substancave në të njëjtën kohë, është raportuar për të gjitha llojet e drogave. Sipas të dhënave të anketimit për Shqipërinë rezulton se 70 për qind e të anketuare thanë se përdornin kanabis me cigare/nikotinë dhe 46 për qind thanë kanabis me alkool.

83 për qind e përdoruesve të kokainës pluhur thanë se e kombinonin me alkool dhe po aq me cigare/nikotinë. 26 për qind e kombinonin kokainën dhe me bar kanabis.

Ku i gjejnë drogat shqiptarët

Një nga pyetjet e anketimit lidhet me burimin e blerjes së substancave të drogës.

Për kanabisin, 46 për qind e përdoruesve shqiptarë thanë se e gjenin nga të afërm, ose njerëz që njohin, 31 për qind thanë që i kontaktojnë direkt burimet përmes telefonit, email ose mesazheve.

Miqtë dhe shokët janë dhe burimi kryesor i gjetjes së kokainës 68 për qind dhe 47 për qind përmes kontakteve direkte nga telefoni, mail ose mesazhet.

Edhe për substancat e tjera si Methamphetamine, Amphetamine, heroinë, burimi kryesor mbetet blerja nga miqtë./Monitor/