PD prezantohet programi, Berisha: Ndërtimin e Shqipërisë Madhështore e nisim tek dhimbjet e shqiptarëve

Lideri i Partisë Demokratike dhe Aleancës për Shqipërinë Madhështore, Sali Berisha, duke deklaruar se ky është koalicioni më i fuqishëm në 32 vite, që përfaqëson shumicën absolute, prezantoi programin për Ndërtimin e Shqipërisë Madhështore e nisim tek dhimbjet e shqiptarëve.

“Edhe njëherë, ne kemi paraqitur para shqiptarëve programin më të bukur, programin më të mirë, programin e një Shqipërie vërtet madhështore.
Shqiptarët duhet ta dinë ku e nisim ne këtë. Ku e nisim ne ndërtimin e Shqipërisë Madhështore?
Ndërtimin e Shqipërisë Madhështore e nisim tek dhimbjet e tyre, tek vuajtja e tyre, që vjen nga mospasja, që vjen nga varfëria ekstreme, me zotimin solemn që tre muajt e parë nuk do ketë shqiptar që nuk do marrë 200 euro minimum jetik.

Se rrogë minimale nuk do ketë nën 500 euro.
Se rrogë mesatare nuk do ketë nën 1200 euro.
Nuk ka detyrim më madhor për njeriun që ka shpirt dhe zemër se sa taksat që merr prej qytetarëve, t’ua kthejë atyre direkt në mirësi, në mirëqenie, t’i çlirojë ata nga vuajtja e blerjes së ushqimeve, ilaçeve, etj.
Vetëm kaq? Jo, edhe më shumë.
Kjo shtresë në nevojë, këto që i japim nuk i ka të mjaftueshme dhe ne e kemi vetëdijen për këtë. Ka dalë jashtë zonës së varfërisë ekstreme, por nuk i ka të mjaftueshme.
Atëherë karta e konsumatorit.
Secili prej tyre do marrë mbrapsht TVSH-në që paguan për ushqimet, e llogaritur nga ekspertët 450 euro me kartën e konsumatorit.
Ilaçet do të jenë krejt të tjera. Nuk do mund të shiten ilaçe, të cilat kanë çerek apo gjysmë efekti siç ndodh tani. Qeveria do kompensojë çdo rritje, por ilaçet do jenë cilësore ama, nuk do jenë një mashtrim i përditshëm për të sëmurët.
Se prape jemi tek dhimbja, aty e nisim ne.
Po si mundet një shoqëri, një komb me një buxhet 7-8 miliardë, të lërë një grup njerëzish pa ilaçe se ilaçet e tyre kushtojnë?
Atë e bën një qeveri e pashpirt, por një komb i qytetëruar nuk e bën kurrë.
Pse nuk ekzistonte kjo situatë përpara? Edhe atëherë kushtonin. Ka ilaçe që kushtojnë shumë, por nuk mungonin në mënyrë absolute.
Se këta i përzunë kompanitë nga Tirana, i pushtuan vetë.
Për t’ua thjeshtuar, në qoftë se ne rrugët e mëdha të Shqipërisë i ndërtuam me kompanitë më të mëdha të botës, këta ndërtojnë me Salillarin e me radhë dhe shemben, kushtojnë, ribëhen, etj.
Kështu është edhe puna e ilaçeve. Ilaçet i dominon Vilma Nushi dhe shqiptarët marrin ilaçe jashtë çdo kontrolli. Merr fund.
Nafta, jo mo nuk mund ta paguajë shqiptari… shqiptari do lëvizë se tani vihen para problemit të kenë a mos të kenë makina, të kenë sa më shumë makina… dhe nafta do të jetë as një qindarkë më shtrenjtë se në Kosovë që e merr nga Durrësi dhe e shet 40 përqind më lirë.
Energjia elektrike do ulet. Do jetë 7 lekë. Mund të jetë edhe më lirë, por unë po them 7 lekë. Për biznesin do jetë 6 lekë, do jetë tre herë më lirë.
Pronarët, të përndjekurit, brenda mandatit të parë do marrin çdo dëmshpërblim, çdo rikthim, çdo kompensim që u takon.
Pra, ne shkojmë vërtet koalicioni më i gjerë në histori, ama shkojmë me programin më të mirë që ka njohur Shqipëria ndonjëherë në ekzistencën e saj,” tha Sali Berisha ky është koalicioni më i fuqishëm në 32 vite, që përfaqëson shumicën absolute:

“Është një nder i jashtëzakonshëm t’u drejtohem sot shqiptarëve së bashku me koalicionin më të fuqishëm që Shqipëria ka përjetuar në 32 vite.
T’u drejtohem shqiptarëve në një moment historik, moment të në cilin ky komb vendos në përpjekjen më epike për t’u ndarë nga diktatura e dytë që kombi përjetoi 34 vite pas përmbysjes së diktaturës së parë.
Kjo ditë është një ditë shumë e veçantë në historinë e përpjekjeve të shqiptarëve për liri dhe dinjitet.
Në historinë e përpjekjeve të shqiptarëve për një Shqipëri të jetueshme.
Për një Shqipëri ‘Made in Albania’.
Për një Shqipëri Madhështore.
Për Shqipërinë e ëndrrave të shqiptarëve
Ky koalicion që paraqitet sot para shqiptarëve përjashton jo vetëm shumicën absolute në distancë të qytetarëve shqiptarë,por përfaqëson në distancë elitën politike dhe të gjithanshme të kombit shqiptar.
Ky koalicion ka në gjirin e vet vajza dhe djem, burra dhe gra, qëndrestarë të pamposhtur, personalitete, patriotë dhe ekspertë të shquar të shkolluar në shkollat më të mira të Europës dhe botës.
Ky koalicion ka të gjithë mendjen, të gjithë vullnetin, atdhetarinë dhe përkushtimin për të bërë Shqipërinë Madhështore.
Për të bërë Shqipërinë një vend ku qytetarët e lirë të saj të mos njohin më dhimbjet e pamerituara, çnjerëzore të varfërisë ekstreme.
Ku qytetarët e saj, bijtë dhe bijat e saj, të rendin pas ëndrrës së tyre më të bukur shqiptare, të ndërtojnë këtë ëndërr në Shqipëri,” tha lideri i opozitës duke përsëritur se viti 2025 është viti i diasporës!

“Kurrë ndonjëherë para kombit dhe shqiptarëve nuk është paraqitur një koalicion i tillë me PD-në më transparente se kjo e sotmja.
Pra, ky nuk është koalicioni i të panjohurave, por ky është koalicioni i transparencës, i burrave dhe grave, i djemve dhe vajzave që i njohin shqiptarët, që i vlerësojnë shqiptarët.
Një koalicion që përfaqëson të gjithë interesat, shtresat, komunitetet e ndryshme të këtij kombi.
Ky koalicion i PD me Aleancën për Shqipërinë Madhështore është pritur me gëzim, me interes të madh nga mbarë shqiptarët.
Ky koalicion nis garën elektorale përballë një narkoregjimi, i lidhur kokë e xhep me krimin dhe korrupsionin.
Por ky koalicion nis garën elektorale me një epërsi të jashtëzakonshme morale.
Prej dy muajsh, PD dhe aleatët e saj kanë bërë fushatën elektorale më të suksesshme në historinë e tyre jashtë vendit.
Angazhimi i PD dhe aleatëve të saj në fushatë elektorale me shqiptarët jashtë vendit, në emigracion dhe diasporë, ka ndezur zemrat dhe shpresat e tyre.
Ka provuar një entuziazëm dhe vendosmëri e paparë ndonjëherë te shqiptarët nga vitet ’90 gjer sot.
Të dashur miq, me të drejtë unë dhe ju do ta quajmë vitin 2025, vitin e diasporës.
E meritojnë plotësisht!
Ai reagim i tyre i fuqishëm, ai entuziazëm i tyre i jashtëzakonshëm, ajo vendosmëri e tyre e madhe për të marrë pjesë në zgjedhje dhe votuar opozitën është dëshmi e një dashurie të paprekur të tyre ndaj Shqipërisë.
I dashurisë së tyre ndaj Shqipërisë demokratike, Shqipërisë së qytetarëve të lirë, Shqipërisë së ligjit, Shqipërisë që u jep nder dhe dinjitet dhe jo narkoshtetit shqiptar.
Përçmimi, përbuzja që emigracioni dhe diaspora i bëri kreut të narkoshtetit Edi Rama në takimet e tij, e detyroi atë t’i ndërpresë ato takime.
Akoma më keq, përzunë ata përfaqësuesin e tij me 5 mbiemra.
Pra, viti 2025 është viti i diasporës.
Diaspora e ka bërë zgjedhjen e saj, të shpëtojë Shqipërinë.”

Duke e cilësuar Edi Ramën si armik të egër i kombit shqiptar, Berisha tha se, ai nuk paraqet asnjë arritje në 12 vite, por i kanë mbetur në gojë zhabat.

“PD dhe aleatët e saj nisin fushatën me një epërsi të pakrahasueshme, me kundërshtarin tonë, padrinon e narkoshtetit dhe bandat e tij.
I gjithë vullneti i njerëzve të lirë, njerëzve dinjitozë, njerëzve që besojnë tek ligji dhe Kushtetuta, njerëzve që besojnë tek vlerat dhe jo tek mandatet e marra duke arrestuar liderët politikë të opozitës, jo në shndërrimin e Shqipërisë në vendin e torturave, jo në plaçkitjet më të mëdha që ka njohur historia ndaj qytetarëve shqiptarë dhe pamëshirësisë ndaj tyre.
Pra, para qytetarëve shqiptarë ne shkojmë kokulur dhe ballëhapur.
Shkojmë kokulur sepse do kërkojmë mbështetjen e tyre, zemrën e tyre, mendjen e tyre.
Por gjithashtu ne paraqesim një projekt që Shqipëria nuk e ka njohur kurrë më parë.
Ne paraqesim një projekt, në pamje të parë, i largët pak, Shqipëria Madhështore.
Por ne paraqesim një projekt që është absolutisht ëndrra më e bukur, e ditës dhe jo e natës, e çdo shqiptari, e çdo atdhetari, e çdo njeriu punëtor, e çdo njeriu të lirë, e çdo njeriu me dinjitet.
Çfarë paraqet pala tjetër? Paraqet hardhucë, zhapikë, bretkosa, zhaba dhe tani së fundmi i ka ngelur në gojë Kujtimi, jepja ato mustaqe se çmendet pas tyre.
Kujtim, se unë e ti e njohim atë nga ana psikologjike, ia di ti arsyen pse e ka atë ai.
Por kjo nuk është punë e kësaj mbledhje.
Pra, një njeri që ka qeverisur 12 vite dhe nuk u thotë dot shqiptarëve, nuk u tregon dot shqiptarëve një arritje?
A mundet kështu? Nuk u tregon dot sepse ato arritje që numërohen me gishtat e dorës, janë të nxira nga vjedhjet e tmerrshme.
Nuk u përmend dot tunelin e Llogarasë, sepse shkruhet 50 milionë të vjedhura me një dorë.
Nuk flet dot për unazën që e mbylli përsëri, sepse 13 kilometrat e fundit i ndau në 14 kontrata.
Nuk përmend dot rasat e gurit që ka shtruar nëpër qytete sepse ka vjedhur me to 10 herë çmimin e tyre.
Nuk përmend dot suksese sepse ka mashtruar për çdo gjë shqiptarët.
Se u thoshte ujë 24 orë, dhe tani ujë më keq se kurrë.
Se u thoshte pensionet, rrogat, dhe tani në qoftë se rritet pensioni minimal aq, Shqipëria bie në katastrofë.
Nuk përmend TVSH-në e ushqimeve që do ulte, paçka se çmimet kanë shkuar në stratosferë.
Nuk përmend dot asgjë, asnjë premtim, sepse të gjitha janë mashtrime.
Por mbi të gjitha, forcat tona politike janë forca të interesit kombëtar.
Ne së bashku përfaqësojmë interesin kombëtar të shqiptarëve.
Çfarë përfaqëson ai? Ai përfaqëson një nga armiqtë më të egër të kombit në të gjitha kohërat.
Ai përfaqëson njeriun që në 12 vite qeverisje, përzuri nga Shqipëria 45 përqind të shqiptarëve. Ndaj dhe u etiketua si Pashiqi i Tiranës.
Ai përfaqëson njeriun e parë në Europë që i vuri sanksione shtetit të pavarur të Kosovës për llogari të Beogradit.
Miq, kush ka lexuar histori, do gjejë se Enver Hoxha i shkruante Stalinit: Shoku Stalin, Kosovën e lamë me Jugosllavinë se më e sigurt me Jugosllavinë. Mendja na thotë se vepruam drejt.
Edi Rama, Kosovën e la me Vuçiçin.
Edi Rama u shndërrua në argat të Vuçiçit.
Dy ditë më parë, Departamenti i Shtetit, sekretari Marco Rubio dënoi Dodikun. Edi Rama hesht si fija e barit për aktet e tij destabilizuese.
Pra kemi të bëjmë në këtë aspekt, shpëtimin e Shqipërisë nga një rrezik madhor antikombëtar që rrallë e ka pasur në histori, siç është Edi Rama.”

Në fund, Kryetari i Partisë Demokratike duke e përsërit se Shqipëria do bëhet superfuqi energjetike rajonale ndërsa u zotua se me prodhimet “Made in Albania” do mbushen dyqanet shqiptare.

“Këto janë bazat. Pa zgjidhur këto, ne nuk mund të bëjmë hapin tjetër, hapin e madh ‘Made in Albania’.
Tani nuk jemi më njerëz të izoluar, por në tërësi kemi pasur mundësi të shëtisim.
Kudo që shkoj dhe kudo që kam shkuar, unë një vend të begatë me pasuri natyrore si Shqipëria nuk kam parë. Jo, nuk kam parë.
Ka një problem që e kam me kimet. Tokën. Tokën fushë e kam me kimet. Por Shqipëria tokat e tjera në kodra e male i ka po kaq pjellore.
Shqipëria është tokë e bekuar, nuk ka tokë më pjellore.
Prandaj do bëjmë gjithçka që prodhimet bujqësore dhe prodhimet e saj ‘Made in Albania’ të mbushin dyqanet e Shqipërisë dhe të eksportojmë në botë.
Shqipëria ka rezerva botërore kromi, nikeli, hekurnikeli, bakri etj. Ku janë?
Flenë, vidhen nga mafia, keqpërdoren nga mafia.
Një sipërmarrës i suksesshëm më dërgoi një emision që BBC kishte përgatitur për minierën e kromit që shfrytëzon. Kromi më i pasur në planet, e cilësonte atë krom.
Çfarë më thoshte? Trau i Kalimashit më kushton në muaj 750 euro për kamion. E kuptoni se çfarë bëhet këtu apo jo? Plus tjetra e tjera dhe faktikisht falimentim.
Jo mor zotëri, ne do bëjmë gjithçka që pasuritë natyrore të këtij vendi të shndërrohen në mirësi për qytetarët shqiptarë.
Të nxirren, të zbulohen, të përpunohen në vend dhe ‘Made in Albania’ do jetë krenaria jonë kombëtare.
Nuk po ndalem të tjera.
Shqipëria ka fushën e naftës më të madhe në botë onshore, ka rezerva të pakrahasueshme.
Por miq, nëse ka një pasuri të pakufizuar Shqipëria, e ka në fushën e energjisë.
Ne jemi vendi me ditët më të shumta me diell në rajon dhe vendi që nga energjia diellore kemi gjithsej një prodhim prej 50-60 megavatë.
Merr fund kjo. Panelet diellore, me investim të qeverisë dhe bankave, do mbulojnë çatitë e çdo shtëpie që i zoti i shtëpisë dëshiron të instalojë nga veriu në jug. Do paguajë tre vite energjinë me çmimin që ka paguar dhe pas tre vitesh do e ketë falas përgjithmonë.
Po, po!
Ne do e bëjmë Shqipërinë superfuqi energjetike në rajon.
Kur në vitin 2005 pata deklaruar se Shqipëria do bëhet superfuqi e vogël rajonale e energjisë së rinovueshme. U tallën. Por tani që Shqipëria është bërë vend eksportues i energjisë së rinovueshmne, nuk tallen më.
Ua them unë këtu, tani nuk them e vogël, do bëhet superfuqi rajonale energjetike në rajon.
Ua them unë ju këtu, kanë rënë çmimet. Panelet fotovoltaike, çmimet e tyre kanë rënë në mënyrë të ndjeshme shumë. Por po kështu edhe turbinat e erës.
Ju duhet ta dini se Shqipëria ka platformat më të fuqishme të erës. Vetëm rrethi i Pukës, nga Shëmria deri në Vaun e Dejës ka një kapacitet minimal prej 3200 megavatë. Të studiuar, të gatshëm projektin. Nuk e ka më të vogël Tepelena. Kurrizi i Karaburunit është platformë e erës ndër më të fuqishmet në Europë.
Pra, ne do investojmë, do ta shndërrojmë Shqipërinë në një superfuqi rajonale energjetike.
Po TAP-i? Ju duhet ta dini se kur fitoi TAP-i, në një garë tmerrësisht të vështirë, një nga shkaqet ka qenë Dumreja me depot e saj natyrale të boshatisura, në të cilat krijohen rezerva gazi për BE-në, disa miliardëshe. Po, po!
Shqipëria, nga TAP-i në kontratë ka 700 milionë metër kub në vit për energji. Do i shfrytëzojmë ne ato. Do ndërtojmë TEC-e të fuqishme. Do gazifikojmë Shqipërinë.
Shqipëria Madhështore kërkon që familjet të kenë një jetë komode. Gazi është komoditet. Gazi është komoditeti i familjeve të vendeve të pasura. Ne e kemi, nuk marrim asnjë metër kub gaz.
Absolutisht nga projektet më madhështore tonat do jetë gazifikimi i qyteteve dhe i gjithë Shqipërisë,” tha Kryetari i Partisë Demokratike, Sali Berisha, i bindur se ky koalicion ka potencialin për ta bërë realitet projektin e Shqipërisë Madhështore brenda mandatit të parë

“Miq, nuk është vetëm kaq projekti ynë për Shqipërinë Madhështore. Projekti ynë për Shqipërinë Madhështore është Shqipëria epiqendër të teknologjive më të larta dhe më të avancuara në rajon dhe një nga epiqendrat e rëndësishme të Europës.
Me ekspertë ndërkombëtare dhe kombëtare është përgatitur projekti dhe programi, me të cilin Shqipëria do bëhet epiqendër e dataqendrave, të cilat janë diamantet në kurorën e hightech-ut, në kurorën e zhvillimeve më të avancuara ekonomike. Do jetë vendi i inteligjencës artificiale, internetit 3 dhe kriptomonedhave.
Pra, në Shqipëri, dhjetëra mijëra vajza, djem, të shkolluar jashtë vendit, por edhe në Shqipëri, do kenë mundësi të kthehen të punojnë në sektorin më të avancuar të ekonomisë botërore, që është sektori i hightech-ut.
Ky është projekti ynë i Shqipërisë Madhështore, projekt që në pamje të parë të duket pak si një horizont i largët, por projekt që është absolutisht i realizueshëm dhe që ky koalicion, me potencialet e jashtëzakonshme që ka, do ta shndërrojë mandatin e parë, realitet për shqiptarët.
Ndaj dhe le të nisim ne punën të palodhur, të përkushtuar me të gjithë potencialet.
Të mbështesim kandidatët tanë në të gjitha rrethet.
Së bashku me shqiptarët e diasporës për të hapur dyert e një projekti që shqiptarët nuk e kanë njohur kurrë më parë.
Projektin që do bëjë vendin e tyre një vend madhështor, siç e meriton.
Faleminderit dhe suksese!”