Rastet e fundit të vrasjeve, Kurti thirrje organeve të drejtësisë: Të trajtohen me seriozitet!

Kryeministri i Kosovës, Albin Kurti, ka shprehur sot shqetësimin lidhur me katër vrasjet që ndodhën brenda tre ditëve të fundit në Kosovë dhe nga mbledhja e qeverisë u bëri thirrje organeve të rendit,  hetuesisë e drejtësisë që të trajtojnë me seriozitetin më të lartë shkaqet, rrethanat dhe predispozitat e autorëve, në mënyrë që të vihet drejtësi edhe të parandalohen raste  të tilla në të ardhmen.

“Vrasja është akti më i rëndë që mund t’ia bëjë njeriu-njeriut, ajo asnjëherë nuk guxon të normalizohet. Vrasja është jo vetëm vrasje e njeriut, por edhe e shoqërisë në të cilën ai njeri bënte pjesë, pra shoqërisë sonë. Gjithë  vendi është tronditur e lënduar nga kjo seri e vrasjeve që duhet të ndalohet, ndalet e dënohet. Na duhet analizë e kujdesshme profesionale, veprim i menjëhershëm institucional dhe reflektim shoqëror që adreson dhunën që kemi parë në këto ditët e fundit,” tha Albin Kurti duke bërë thirrje për të gjithë.

“Edhe për faktin se këto vrasje ndodhën në javën kur shënojmë 26 vjetorin e fushatës së bombardimeve të NATO-s në Kosovë për të ndalë gjenocidin e Serbisë dhe përkujtojmë masakrat e njëpasnjëshme të aparatit shtetëror të Serbisë që synonte shfarosjen e popullit shqiptar,” tha Kryeministri i Kosovës teksa tregoi që bashkë me kolegë të kabinetit do të jetë në Krushë të Madhe e të Vogël për përkujtim të masakrave atje.

Ndryshe, brenda tre ditëve në Kosovë kanë ndodhur katër vrasje, më 23 mars, një 19-vjeçar u vra në Vushtrri nga një bashkëmoshatar i tij; Po në Vushtrri, një ditë më vonë një burrë vrau një grua 42-vjeçare. Autori, 58 vjeç, më pas vrau veten. Ndërkaq, mbrëmjen e 25 marsit, një burrë u vra në Prishtinë dhe një tjetër mbeti i plagosur, pasi, sipas Policisë, ata u sulmuan nga dy persona të maskuar dhe të armatosur.