Raporti në KLP, kreu i SPAK: Në 2024, kallëzimet e qytetarëve shënuan rritje, të Policisë ulje!
Kallëzimet nga qytetarët kanë shënuar rritje ndërsa vihet re ulja e numrit të kallëzimeve nga Policia e Shtetit, tha kreu i SPA Altin Dumani duke raportuar sot para Këshillit të Lartë të Prokurorisë, KLP, për vitin 2024 ku 33 zyrtarë të lartë janë nën hetim, 19 prej të cilëve janë dërguar në gjykatë ndërsa foli dhe për sfidat.
“Në 2024 jemi përballur me sfida, por nuk e kemi ndalur punën,” është shprehur Altin Dumani në nisje të Raportimit të tij ku foli në lidhje me luftën ndaj korrupsioni ndërsa nënvizoi se 33 zyrtarë të lartë janë nën hetim, 19 prej të cilëve janë dërguar në gjykatë.
“Gjatë 2024 për dhjetë funksionarë publikë ka pasur dënime të formës së prerë. Hetimet kanë provuar se korrupsioni zhvillohet në mënyra të sofistikuara. Kallëzimet e nisura nga qytetarët janë tregues i rritjes së besimit ndaj SPAK. Ndërsa vihet re ulje e numrit të kallëzimeve nga Policia e Shtetit,” tha kreu i Prokurorisë së Posaçme ndërsa numri i sekuestrimeve dhe konfiskimeve të pasurive të paligjshme ka pasur rritje.
“Krahasuar me 2024, vlera totale e pasurive të sekuestruara dhe konfiskuara ka pësuar rritje. Sa i takon masave të sigurimit, SPAK ka aplikuar një politikë të qartë. Numri i të burgosurve që janë dënuar nga SPAK përbën 9.5% të totalit. 165 persona janë dënuar pas procedimeve të SPAK. Për vitin 2024, në GJKKO janë gjykuar 145 çështje, ku ka përfunduar gjykimi për 54 prej tyre. Vazhdon gjykimi për të tjerat. SPAK merr masa dhe mbikëqyr edhe ekzekutimet e vendimeve penale. 20 vendime kanë marrë formë të prerë në GJKKO, ndërsa 56 të tjera në Apel,” tha ai, ndërsa ka shtuar se në fokus të SPAK ka qenë përmbushja e rekomandimeve të Parlamentit dhe të Këshillit të Ministrave.
Duke renditur problematikat me të cilat përballet SPAK, Dumani ka përmendur presionin ndaj prokurorëve dhe mosekstradimin e shqiptarëve nga Emiratet e Bashkuara Arabe.
“Problematika e parë është presioni i jashtëm ndaj institucionit dhe mungesa e një statusi të qartë ligjore të prokurorëve të SPAK pas mbarimit të mandatit. Gjithashtu vijon të mbetet i ulët numri i referimeve nga institucionet publike.
E paadresuar mbetet mungesa e ushtrimit të kompetencës për ekzekutimin e vendimeve gjyqësore të huaja dhe mosekstradimi i shqiptarëve nga Emiratet e Bashkuara Arabe duke marrë parasysh edhe shtimin e personave që duhen ekstraduar që atje,” tha kreu i SPAK ndërsa bëri të ditur se SPAK ka intensifikuar bashkëpunimin me rajonin.
“Kemi punuar me Greqinë, Kosovën, Maqedoninë e Veriut dhe Malin e Zi. Po punohet edhe me Serbinë, me qëllim rritjen e kontakteve.”
Ndryshe, gjatë raportimit të kreut të SPAK, Altin Dumani, në KLP, të pranishëm ishin përfaqësues të OPDAT dhe përfaqësues nga Ambasada Amerikane në Tiranë.
