ZRRE miraton tarifat e reja të energjisë elektrike, rritje 16.1%
Zyra e Rregullatorit për Energji ka miratuar tarifat e reja të energjisë elektrike, që mesatarisht janë 16.1 për qind më të larta se deri më tani.
Me 5 vota për, asnjë kundër, janë miratuar tarifat për Shfrytëzimin e Rrjetit të Transmetimit dhe Tregut, tarifat për Shfrytëzimin e Rrjetit të Shpërndarjes dhe tarifat për Furnizuesin me Shërbim Universal.
Këto tarifa do të hyjnë në fuqi nga 1 maj 2025. Tarifat me blloqe për konsumatorët shtëpiak dhe tarifat ditë-natë për të gjitha kategoritë e konsumatorëve do të përdoren për të nxitur konsumin efiçient të energjisë elektrike. Pjesë e shqyrtimit nga Bordi kanë qenë edhe ankesat e konsumatorëve dhe çështje të tjera të lidhura me funksionimin e Zyrës së Rregullatorit për Energji.
ZRRE ende nuk ka njoftuar se cili është çmimi i kilovatit për konsumatorët e amvisërisë dhe bizneseve, por çmimi aktual i energjisë elektrike për konsumatorët që shpenzojnë deri në 800 kilovatë brenda një muaji, është 7.79 centë për kilovat, ndërsa për ata që shpenzojnë më shumë se 800 kilovatë, llogaritet me çmim prej 14.45 centësh. Nga ora 22:00 deri në 07:00 të mëngjesit, çmimi për kilovat është 3.34 centë për ata që shpenzojnë deri në 800 kilovatë dhe 6.81 centë për ata që shpenzojnë më shumë.
Ndryshe, kjo rritje e çmimit të tarifave vjen pasi bordi i ZRRE-së më 11 prill ka miratuar kërkesat për të hyrat e lejuara maksimale të tre operatorëve energjetikë, Operatorit Sistemit, Transmisionit dhe Tregut, KOSTT, Kompanisë për Distribuim të Energjisë Elektrike në Kosovë, KEDS, dhe Kompanisë Kosovare për Furnizim me Energji Elektrike, KESCO, që ngritjen e çmimit të tarifave të rrymës e arsyetuan me importin e energjisë elektrike.
