Pas përgjigjes së Presidentes Osmani, sot vazhdon seanca konstituive e Parlamentit të Kosovës
Pas kërkesës së Presidentes Vjosa Osmani për të respektuar Rregulloren sot pritet të vazhdoj seanca konstituive e Parlamentit të Kosovës me fillim në orën 12:00.
Partitë e opozitës, LDK, PDK dhe AAK, që bllokuan procesin pasi portalet e batonëve dhe buzhalëve paralajmëruan se Lista Srpska i kishte tradhëtuar dhe do ta votoj qeverinë “Kurti 3”, tashmë kanë konfirmuar pjesëmarrjen, por ende nuk janë shprehur nëse iu bindin tekstit të dorëheqjes së Kryeministrit Albin Kurti dhe do të votojnë raportin e verifikimit të mandateve.
Pak çaste pasi Presidentja Vjosa Osmani dje i ktheu përgjigje kryesuesit të seancës konstituive, deputetit më të vjetër Avni Dehari, që seanca duhet të vazhdojë brenda 48 orësh, ashtu siç kërkohet me rregullore, Parlamenti i Kosovës doli me njoftim se nesër në orën 12:00 do të vazhdojë seanca.
Partitë, si Lidhja Demokratike e Kosovës, Partia Demokratike e Kosovës dhe Aleanca për Ardhmërinë e Kosovës, e kanë konfirmuar pjesëmarrjen në këtë seancë, por nuk konfirmuan nëse kanë ndryshuar qëndrimet sa i përket votimit të emrit të ri për kryeparlamentar, i cili duhet të propozohet sot nga partia fituese, Lëvizja Vetëvendosje, nëse kalon raporti i Komisionit të Përkohshëm për Verifikimin e Mandateve, të cilin këto parti e votuan kundër në fillim të seancës së parë konstituive.
Ndërkohë, LDK sërish konfirmoi se nuk ja ka idenë se cili është roli i KQZ-së kur pranohen kandidaturat për deputetë, si hartohet lista zgjedhore dhe si jepet mandati nga ky institucion dhe përsëriti kërkesën se Albin Kurti duhet të japë dorëheqje formale bashkë me 15 ministrat e tij, thuajse ata kontrabanduan prezencën e tyre në listat zgjedhore për të votuar.
Ndryshe, miratimi i raportit të verifikimit të mandateve të 120 deputetëve të rinj të legjislaturës së 9-të të Parlamentit të Kosovës, do t’i hap rrugë betimit të tyre dhe propozimit për zgjedhjen e kryetarit dhe nënkryetarëve të legjislaturës së 9-të. Pas kësaj, do të shihet nëse partia fituese e zgjedhjeve ka numrat për ta krijuar qeverinë e re, përbërja e së cilës ende nuk dihet.
