Vrasja e policit Muhamet Lika, arrestohen 7 persona
Policia e Kosovës dhe Prokuroria kanë konfirmuar se sot janë arrestuar 7 persona, si të dyshuar në përfshirje për vrasjen e policit Muhamet Lika.
Drejtori i Përgjithshëm i Policisë së Kosovës, kolonel Gazmend Hoxha, tha se 170 policë kanë marrë pjesë në operacionin policor i cili është kryer në orët e para të mëngjesit, ku janë bastisur nëntë lokacione, shumica në Kaçanik dhe një në Klinë.
“Janë arrestuar shtatë persona të dyshimtë të cilët dyshohet se kanë marrë pjesë në planifikimin dhe në ekzekutimin e rreshterit tonë,” tha kolonel Gazmend Hoxha duke shtuar se të dyshuarit janë duke u intervistuar, derisa janë siguruar prova të cilat e ndërlidhin këtë grup kriminal me vrasjen e rreshterit Lika.
“Rreshteri ynë ka qenë në detyrë zyrtare në disa raste kur disa prej tyre kanë qenë të arrestuar, që lidhen me pamfletin dhe djegien e Gjykatës në Kaçanik,” tha kolonel Hoxha duke fol për persona të arrestuar edhe më parë me prirje ekstremiste.
Ndërsa Kryeprokurori i Prokurorisë në Ferizaj, Burim Çerkini, tha se prokuroria që nga fillimi ka punuar në zbardhjen e këtij rasti ndërsa personat e arrestuar do të dërgohen në mbajtje dhe do të vazhdojmë me procedurat e mëtutjeshme.
“Dyshimet tona janë se motivi i vrasjes lidhet me punën e Muhamet Likës si pjesëtar i Policisë së Kosovës,” tha Burim Çerkini.
Ndryshe, rreshteri policor Muhamed Lika në Kaçanik u vra më 1 prill të këtij viti derisa ishte duke shkuar në banesën e tij. Ai u gjuajt me armë zjarri brenda ndërtesës ku jetonte ndërsa Prokuroria Themelore e Ferizajt tha se nga provat e siguruara shihej se dy persona e kanë vrarë Likën gjatë mbrëmjes të asaj dite.
Pas hetimeve intensive, sot në orët e hershme të mëngjesit Njësitë Speciale të Policisë së Kosovës zhvilluan një operacion policor në Kaçanik lidhur me rastin e vrasjes së Rreshterit policor Muhamet Lika.
