Prishtinë, Sorensen takim me Bislimin, vazhdon drejt Beogradit

I Dërguari i Posaçëm i BE-së për dialogun Kosovë-Serbi, Peter Sorensen, ka zhvilluar sot në Prishtinë një takim me kryenegociatorin kosovar, Besnik Bislimi, duke mos dhënë detaje vetëm se konfirmoi se ishte pjesë e zakonshme e misionit të tij.

“Sot jam në Prishtinë si pjesë e zbatimit të mandatit. Ekipi im dhe unë jemi duke zhvilluar vizita në nivel pune – kjo është një pjesë e zakonshme e misionit tonë, dhe do të shihni edhe vizita të tjera të ngjashme në të ardhmen. Jam shumë i lumtur që jeni këtu. Nga këtu do të vazhdoj për në Beograd, dhe më pas do të kthehem në Bruksel. Kaq për tani,” tha I Dërguari i Posaçëm i BE-së për dialogun Kosovë-Serbi, Peter Sorensen.

Para takimit me kryenegociatorin kosovar, Peter Sorensen zhvilloi një takim me Komandantin e misionit paqeruajtës të NATO-s në Kosovë, KFOR, Enrico Barduani.

“Komandanti i KFOR-it nënvizoi përpjekjet e KFOR-it për të siguruar një mjedis të sigurt për të gjithë njerëzit që jetojnë në Kosovë dhe në mbështetje të dialogut të lehtësuar nga BE-ja ndërmjet Prishtinës dhe Beogradit, ku KFOR-i dhe BE-ja veprojnë në koordinim të përhershëm,” thekson misioni paqeruajtës i NATO-s në Kosovë përmes një njoftimi, për takimin ku Gjeneral Barduani kishte konfirmuar përkushtimin e palëkundur të KFOR-it për të mbështetur të gjitha përpjekjet e komunitetit ndërkombëtar, në dobi të sigurisë së qëndrueshme në mbarë Kosovën dhe stabilitetit rajonal.

Ndryshe, kjo është vizita e dytë e të Dërguarit të Posaçëm të BE-së për dialogun Kosovë-Serbi, Peter Sorensen, në Kosovë prej se e mori detyrën në fillim të muajit shkurt. Gjatë vizitës së parë në Prishtinë në muajin mars, Peter Sorensen deklaroi se prioritet kishte që të caktonte takime mes dy shteteve.