Beteja për Teatrin Kombëtar, BE i përgjigjet Aleancës: Pas informacionit shtesë nga Qeveria, Komisioni do të procedojë…

Pas letrës së Aleancës për Mbrojtjen e Teatrit, ku i kërkonte Bashkimit Evropian që të shprehet për ligjin e miratuar në Parlament dhe të kthyer mbrapsht ngaet  ana e Presidentit Meta, Komisioneri për zgjerimin e BE, Johannes Hahn i përgjigjet artistëve përmes një letre dërguar nga Drejtorja e zgjerimit për Ballkanin Perëndimor në Komisionin e Zgjerimit, Genovieva Ruiz Calavera.

BE i ka kërkuar tashmë informacion të thelluar qeverisë në lidhje me ligjin e shumëdebatuar dhe shumë shpejt do të japë një përgjigje, thekson Znj.Calavera, nëse ky i fundit është konform rregullave dhe nëpërputhje me kërkesat që shtron Marrëveshja e Stabilizim- Asociimit, MSA, si dhe me ligjet e tjera të BE.

Komisioni Evropian thekson ajo, do të shqyrtojë në detaje informacionin shtesë që ka kërkuar dhe do të japë një përgjigje në lidhje me këtë çështje.

Letra e BE:

Të dashur anëtarë,

Faleminderit për letrat tuaja të 12 e 15 korrikut në adresë të Komisionerit Hahn për

Ligjin Special në lidhje me projektin e zhvillimit që përfshin ndërtimin e një ndërtese të re për Teatrin Kombëtar në Shqipëri.

Komisioneri më kërkoi t’ju përgjigjem në emër të tij.

Për fat të keq, për shkak të programit të tij tepër të ngjeshur, Komisioneri nuk kishte mundësi të takonte përfaqësuesit tuaj gjatë vizitës së tij në Tiranë gjatë këtij muaji.

Megjithatë, kemi mbajtur shënim me interesim të madh argumentet tuaj në lidhje me vlefshmërinë e ligjit të sipërpërmendur.

Komisioni u ka kërkuar autoriteteve shqiptare të ofrojnë informacion shtesë për Ligjin Special, me qëllimin për të parë përputhshmërinë e tij me kërkesat e Marrëveshjes së Stabilizim Asocimit midis BE dhe Shqipërisë, si dhe përputhshmërinë me rregullat e BE në fushën e ligjit të konkurrencës dhe prokurimet publike.

Pas paraqitjes së informacionit shtesë, tani Komisioni mund të procedojë me shqyrtimin e nevojshëm dhe të angazhohet në mënyrën e duhur me autoritetet.

Juaja sinqerisht,

Genovieva Ruiz Calavera