Gjukanoviç: Situata në Ballkan është shumë më e keqe se 10 vjet më parë. Kam frikë!
Ish-Presidenti Malit Zi, Milo Gjukanoviç, vlerësoi në Sarajevë se situata në Ballkanin Perëndimor sot është më keq sesa dhjetë vjet më parë, ndërsa e përshkroi perspektivën evropiane të rajonit si “të turbullt”, duke paralajmëruar veçanërisht për rrezikun e ndikimit të nacionalizmit serbomadh.
Gjukanoviç ishte ligjërues i ftuar në Fakultetin e Shkencave Politike, FPN, të Sarajevës, ku para gazetarëve tha se përgjegjësia për dobësimin e proceseve dhe ndikimin evropian në rajon bie mbi Bashkimin Evropian, si dhe mbi vendet e Ballkanit Perëndimor.
Për BE-në tha se i duket sikur brenda saj nuk ka vendosmëri të mjaftueshme për të vazhduar procesin e bashkimit të kontinentit evropian, ndërsa anëtarët potencialë mbajnë pjesën e tyre të përgjegjësisë sepse janë të ngadaltë në zbatimin e reformave që kërkohen prej tyre. Gjithçka u ndërlikua nga përkeqësimi i marrëdhënieve gjeopolitike, thotë Gjukanoviç.
“Kam frikë”
“Kemi pasur privilegjin për një kohë të gjatë të kemi marrëdhënie të qëndrueshme gjeopolitike që nga fundi i Luftës së Ftohtë, dhe tani po dëshmojmë lindjen e një rendi të ri gjeopolitik me shumë polemika. Kam frikë se kjo do të ketë shumë reflektime negative në rajonin e Ballkanit Perëndimor,” tha ish-udhëheqësi malazez i cili, pas shumë vitesh qeverisjeje të vendit, iu desh të tërhiqej nga pushteti në vitin 2023 kur u mund në zgjedhjet presidenciale nga Jakov Milatoviç si kandidat i mbështetur nga partitë pro-serbe.
Gjukanoviç tha në Sarajevë se ngecja në procesin e integrimit evropian ka shkaktuar edhe përkeqësimin e marrëdhënieve midis vendeve të rajonit, ndërsa theksoi se rolin kryesor e ka nacionalizmi i promovuar nga Beogradi.
“Kur nuk kemi një dinamikë të mirë në rrugën evropiane, atëherë lindin nacionalizma që shkatërrojnë marrëdhëniet e fqinjësisë së mirë. Mali i Zi është më shumë se kurrë i prekur nga ndikimet e nacionalizmit serbomadh, dhe për shkak të kësaj, marrëdhëniet e fqinjësisë së mirë, përfshirë marrëdhëniet me Bosnje Hercegovinën dhe Kroacinë, janë përkeqësuar,” tha Milo Gjukanoviç duke përfunduar:
“Shpresoj që kjo të mos ketë pasoja serioze dhe afatgjata!”
