S’kishte proces zgjedhor, Berisha: U shkel dokumenti i Kopenhagenit, Kushtetuta dhe Kodi Zgjedhor!

Në ligjet ndërkombëtare, dokumentin e Kopenhagenit për zgjedhjet e lira, Kushtetutën e vendit dhe kodin zgjedhor, kërkohet që në një proces zgjedhor të zhvillohet në përputhje me përcaktimet e këtyre ligjeve, këtyre parimeve, tha Kryetari i Partisë Demokratike, Sali Berisha, duke shtuar se në të kundërt ai nuk është një proces zgjedhor, por një farsë zgjedhore.

“Ajo që ka ndodhur me 11 Maj, dhe të gjithë periudhën pararendëse, për zgjedhjet e 11 Majit, është një përmbysje e plotë e parimeve më themelore të zgjedhjeve të lira, të cilat kërkojnë që zgjedhësit të shprehin mendimin e tyre lirshëm për përfaqësuesit që zgjedhin.

Është bërë tashmë e njohur se kontrolli i vullnetit të zgjedhësve ishte i gjithëformshëm, i shumëformshëm dhe i përhapur në mbarë vendin. Ishte i gjithëformshëm nga miklimet, nga influencat gjer tek kërcënimet dhe revolja në ballë,” tha Sali Berisha, pra, parimi, cilido që kërkon të ballafaqohet me të vërtetën, duhet të lexojë dokumentet ndërkombëtare dhe kombëtarë për zgjedhjet, në rast se ai do të respektojë dinjitetin e tij, vlerat e vërteta që beson ose duhet të besojë.

“Pra, palët zotohen, thotë dokumenti i Kopenhagenit se do mbajnë zgjedhje të lira periodike, në të të cilat do garantojnë në praktikë shprehjen e mendimit të zgjedhësve në zgjedhjen e përfaqësuesve të tyre,” tha lideri i opozitës duke renditur dëshmitë se të gjitha parimet themelore ndërkombëtare janë dhunuar në mënyrë të pamëshirë.

“PD disponon qindra dhe mijëra dokumente për të faktuar farsën e turpshme të 11 Majit që zhvilloi Edi Rama, duke shkelur nen për nen dokumentin e Kopenhagenit për të drejtat e njeriut dhe zgjedhjet e lira.

Dhe unë e njoftoj Edi Ramën se në mënyrë absolute, pushtet mbi këtë farsë nuk mund të qëndrojë,

Se karrigia e tij dhe enturazhit të tij qëndron mbi megakrimin elektoral apo farsën më të shëmtuar që Europa ka pasur pas rënies së Perdes së Hekurt në ndonjë vend si Shqipëria,” tha Kryetari i Partisë Demokratike, Sali Berisha, duke paraqitur para shqiptarëve direktivën, parimet ndërkombëtare të zgjedhjeve të lira, të cilat u shkelën një për një, dhe të cilat, për çdo njeri që beson tek liria dhe dinjiteti njerëzor, se gjitihçka ka të bëjë me dinjitetin, ndërsa përfundoi:

“11 Maji ishte një farsë, më e turpshmja në historinë e qytetarëve shqiptarë. 11 Maji u dëshmoi shqiptarëve se me Edi Ramën në qeveri nuk ka kurrë zgjedhje të lira.

Dhe se është në detyrën e tyre, në guximin e tyre, në dinjitetin e tyre, të mbrojnë, të ngrihen me gjithë forcën për të votuar si qytetarë të lirë në një vend si Shqipëria.”

Fjala e plotë:

Në ligjet ndërkombëtare, dokumentin e Kopenhagenit për zgjedhjet e lira, Kushtetutën e vendit dhe kodin zgjedhor, kërkohet që në një proces zgjedhor të zhvillohet në përputhje me përcaktimet e këtyre ligjeve, këtyre parimeve.

Në të kundërt ai nuk është një proces zgjedhor, por një farsë zgjedhore.

Ndaj dhe unë kërkoj mirëkuptimin e medieve të heqin nga fjalori i tyre zgjedhje dhe të zëvendësojnë me fjalën farsë zgjedhore.

Kjo sepse në këto zgjedhje u shkelën parimet më themelore të zgjedhjeve të drejta, për të cilat Shqipëria ka firmosur dokumentin e Kopenhagenit.

Shqipëria ka mishëruar këtë dokument dhe parimet e këtij dokumenti në Kushtetutën e vendit dhe në kodin zgjedhor.

Ajo që ka ndodhur me 11 Maj, dhe të gjithë periudhën pararendëse, për zgjedhjet e 11 Majit, është një përmbysje e plotë e parimeve më themelore të zgjedhjeve të lira, të cilat kërkojnë që zgjedhësit të shprehin mendimin e tyre lirshëm për përfaqësuesit që zgjedhin.

Është bërë tashmë e njohur se kontrolli i vullnetit të zgjedhësve ishte i gjithëformshëm, i shumëformshëm dhe i përhapur në mbarë vendin.

Ishte i gjithëformshëm nga miklimet, nga influencat gjer tek kërcënimet dhe revolja në ballë.

Pra, parimi, cilido që kërkon të ballafaqohet me të vërtetën, duhet të lexojë dokumentet ndërkombëtare dhe kombëtarë për zgjedhjet, në rast se ai do të respektojë dinjitetin e tij, vlerat e vërteta që beson ose duhet të besojë.

Pra, palët zotohen, thotë dokumenti i Kopenhagenit se do mbajnë zgjedhje të lira periodike, në të të cilat do garantojnë në praktikë shprehjen e mendimit të zgjedhësve në zgjedhjen e përfaqësuesve të tyre.

Të pyes çdo qytetar: si u zgjodh Blendi Gonxhja, Sara Mile, si u zgjodhën lista e kandidatëve që mbështeten nga banditët në parlament.

Pra, kemi të bëjmë me sharrimin e këtij parimi themelor që zgjedhjet i dëshmon farsë.

Që Shqipëria pati farsë elektorale, të cilën njerëzit e lirë kurrë nuk mund ta pranojnë.

Në këto zgjedhje dhe në këtë vend u shkel një parim tjetër ndër më themelorët i një sistemi demokratik.

Parimi kusht që ndan shtetin ligjor nga shteti partiak.

Dhe kjo ndodhi në mijëra e mijëra raste.

Çfarë thotë pika 5, fraksion 4?

Zotohen për një ndarje të qartë të shtetit dhe partive politike.

Në veçanti, partitë politike nuk do të përzihen me shtetin.

Ja pra çfarë përcakton dokumenti ndërkombëtar për zgjedhje të drejta.

Që në momentin kur ti garon me një parti shtet, ato nuk janë zgjedhje por janë farsë elektorale.

Merr fund procesi zgjedhor sepse garë nuk ka.

Gara është fiktive për arsye se ti ke në fushë në ndeshje një shtet që ka mbrapa buxhete miliardash, që ka një logjistikë të pafundme, që ka të gjitha mjetet e dhunës dhe një apo disa forca politike pa asnjë lloj mjeti mbrojtës ndaj këtij shteti barbar në raport me zgjedhjet.

Pra, të dashur qytetare dhe qytetarë, zgjedhjet nuk ishin.

Kjo ishte një farsë e turpshme elektorale.

Më e turpshmja në historinë 32-vjeçare të pluralizmit në Shqipëri.

Në këto zgjedhje, si kurrë më parë, shteti i tërë doli lakuriq në tërë shëmtinë e tij kundër qytetarëve.

Për të bërë presione nga më të ndryshmet, përdori të gjitha mjetet te tij, përdori nëpunësit e tij për forma nga më të ndryshme presioni.

Ndaj të dashur qytetarë dijeni se me 11 Maj ka ndodhur një gjëmë e madhe për demokracinë shqiptare.

Referojuni këtij dokumenti ndërkombëtar, dokumentit të Kopenhagenit, i detyrueshëm për çdo vend demokratik që zhvillon zgjedhje dhe zgjedh qeverinë me votën e qytetarëve.

Kurrë ndonjëherë, një parti e transformuar në shtet dhe mafie nuk është vërsulur më me egërsi ndaj qytetarëve shqiptarë siç është vërsulur narkoshteti i Edi Ramës.

Ndaj ju lutem lexoni pikën 5, fraksion 4 të dokumentit të Kopenhagenit.

Tjetër, Shqipëria është zotuar sipas pikës 5, 5, se veprimtaria e qeverisë dhe administratës, si dhe e sistemit të drejtësisë, do ushtrohen në përputhje me sistemin e vendosur me ligj dhe në respekt të atij sistemi.

E morët vesh ju se si veproi administrata gjatë këtij procesi, se si e mbylli gojën, se si shërbeu si shpifë e partisë, Skapi i Dumanit, se si heshti para dhjetëra e dhjetëra padive, para veprimtarisë më të egër kriminale të bandave.

E morët vesh ju se si sistemi i drejtësisë u përdor për të burgosur liderët e tre partive kryesore opozitare dhe marrë mandate të tjera.

Për të ushtruar terror politik mbi opozitën.

Zgjedhjet pra nuk ishin, ishte një farsë.

Dhe ata që duan të hanë turpin me bukë i quajnë zgjedhje këto.

Këto ishin farsë elektorale ku u shkelën parimet më themelore.

Tjetër, sistemi i ngritur nga Edi Rama është absolutisht antidemokratik.

Çfarë thotë karta e Kopenhagenit?

Palët lejojnë që të gjitha vendet në një dhomë në legjislaturën kombëtare të zgjidhen në garë të lirë me votën popullore.

Pra, kërkon që të gjithë ata që ulen në parlament, t’i jenë nënshtruar një gare të hapur, të lirë, jo me lista, por secili me vend.

Pra, kjo ishte një farsë antidemokratike fund e krye.

Palët kanë detyrimin t’u japin mundësi të gjithë forcave politike, garanci të plota ligjore, të garojnë me njëra-tjetrën mbi bazën e trajtimit të barabartë para ligjit dhe autoriteteve.

Se cila është barazia në këto zgjedhje, kur njëra palë shpërndan 500 milionë euro prokurime dhe koncesione.

76 milionë euro bonus për vota.

200 milionë euro gjoba të falura për vota.

Miliona e miliona rrënjë kanabis, nga të cilat, secila është 1 mijë euro, për vota.

Tani ju e merrni me mend se çfarë farsë e shpifur ishte kjo.

Mbetemi tek ajo fjala e mikut tim, që dekada më parë vëzhgova zgjedhjet në Zimbabve, ku diktatori Mugabe zhvilloi zgjedhje të njëjta me këto në Tiranë.

Nuk ma priste mendja kurrë që në vitin 2025 të shihja zgjedhje të tilla në Tiranë, do më thoshte një miku im i shquar.

Është shkelur në çdo nen dokumenti themelor ndërkombëtar, njëlloj Kushtetuta e Shqipërisë.

Se këto Kushtetuta i ka, por unë mora sot t’u paraqes dokumentin ndërkombëtar, të detyrueshëm për të gjitha vendet.

Ndalohet çdo lloj intimidimi i zgjedhësve.

Terroristët elektoralë në zyrat e shtetit, banda të fshehura dhe haptas, bënë presionet më të dhunshme ndaj zgjedhësve në mënyrë që t’u diktonin atyre, t’u kontrollonin mendimin dhe t’u diktonin vullnetin.

Garanton, se është shumë interesante dhe kjo është për mediat, neni 7, pika 8, garanton akses të papenguar në media dhe mbi bazë jodiskriminimi për të gjitha grupet politike dhe individët që duan të marrin pjesë në procesin elektoral.

Çfarë ndodh në Shqipëri?

Unë e kam deklaruar shumë kohë më parë, 4 mediat kryesore kombëtare janë të klonuara që të gjitha në zyrën e Endri Fugës dhe Edi Ramës.

Editorialet e tyre janë identike me nuanca.

Censura që përshtatin ato, janë modeli i një narkoshteti.

Pra, për një proces zgjedhor dhe jo farsë elektorale, duhet të ketë shanse të barabarta në eksesin në media.

Siç e shihni, të gjitha parimet themelore ndërkombëtare janë dhunuar në mënyrë të pamëshirë.

PD disponon qindra dhe mijëra dokumente për të faktuar farsën e turpshme të 11 Majit që zhvilloi Edi Rama, duke shkelur nen për nen dokumentin e Kopenhagenit për të drejtat e njeriut dhe zgjedhjet e lira.

Dhe unë e njoftoj Edi Ramën se në mënyrë absolute, pushtet mbi këtë farsë nuk mund të qëndrojë,

Se karrigia e tij dhe enturazhit të tij qëndron mbi megakrimin elektoral apo farsën më të shëmtuar që Europa ka pasur pas rënies së Perdes së Hekurt në ndonjë vend si Shqipëria.

Këto ishin.

Gjykova të paraqes para shqiptarëve direktivën, parimet ndërkombëtare të zgjedhjeve të lira, të cilat u shkelën një për një.

Dhe të cilat, për çdo njeri që beson tek liria dhe dinjiteti njerëzor, se gjitihçka ka të bëjë me dinjitetin, 11 Maji ishte një farsë, më e turpshmja në historinë e qytetarëve shqiptarë.

11 Maji u dëshmoi shqiptarëve se me Edi Ramën në qeveri nuk ka kurrë zgjedhje të lira.

Dhe se është në detyrën e tyre, në guximin e tyre, në dinjitetin e tyre, të mbrojnë, të ngrihen me gjithë forcën për të votuar si qytetarë të lirë në një vend si Shqipëria.

PYETJE PËRGJIGJE ME GAZETARET:

Ermal Rizaj, SYRI TV: Ju 11 majin e quani farsë elektorale dhe i keni bërë thirrje KQZ-së, që të mos të certifikoje rezultatin final në bazë të qarqeve, gjë e cila nuk është marrë parasysh. Keni ju një thirrje tjetër për KQZ, apo për Celibashin që është kryekomisioner?

Sali Berisha: Qëndrimi ynë është i prerë, asnjë rezultat nuk mund të nxirret mbi falsifikimin monstruoz që u bë në këto zgjedhje. Unë do të paraqes ju dokumente flagrante për etapën e të fundit, të turpshme, të votës në diasporë, e cila nuk mund të përfshihet kurrë, e cila nuk mund të konsiderohet kurrë, e cila është në shkelje të çdo ligji, çdo rregulli, çdo kontrate.

Por nuk po ndalem këtu sot, prandaj dhe ne nuk marrim pjesë në atë proces, ky është një proces i kontrolluar totalisht nga Edi Rama.

KQZ-ja nëse do i përmbahej ligjit, nuk do ulej kurrë të nxirrte rezultatin sepse do thoshte procesi ishte farsë dhe vetëm farsë.

Ermal Rizaj, SYRI TV: Kur ju bëni thirrje qytetarëve që të ngrihen për mbrojtje të votës së lirë, paralajmëroni zhvillimin e protestave pas përfundimit të denoncimeve nga ana juaj.

Sali Berisha: Opozita shqiptare do të angazhohet me të gjitha potencialet e saj në dy fronte.

Së pari, po punojmë intensivisht me komunitetin ndërkombëtar, por dua të theksoj këtu, dhe ju lutem referojuni dokumenteve zyrtare, këto janë zgjedhjet e para të cilat u dënuan para se të mbahen, në 4 rezoluta ndërkombëtare, të cilët cilido që i lexon, faktojnë me prova se, Shqipëria do të ketë farsë elektorale dhe jo zgjedhje.

Pra, ne nuk erdhëm në këto zgjedhje me duar në xhepa. Jo, ne bëmë një punë shumë serioze dhe ja dolëm të bindim botën, qendrën e djathtë në mbarë botën, se narkodiktatori i Tiranës nuk zhvillon zgjedhje, por zhvillon farsë.

Nuk e firmosin kurrë ata, në paradhënie një përcaktim të tillë, por dokumentet që paraqitëm ne ishin të pakundërshtueshme.

Tani, farsa u mbaj, dhe ne vazhdojmë përsëri dialogun intensiv, shumë planësh me të gjitha forcat politike, mike dhe simotra me të gjitha institucionet ndërkombëtare, me të gjitha vendet partnere. Nuk ka shans Edi Rama të shesë farsën për zgjedhje.

Daniela Maloku, ReportTV: A keni bërë ju një analizë paraprake, a e justifikuan partitë aleate besimin për 7 deputetë të sigurtë në Kuvend?

Sali Berisha: Unë ju kuptoj dhe ju jap të drejtë, gjithmonë në këto situata mund të shtrohen shumë pyetje. Por të gjitha këto, duhet parë konteksti. Në kontekstin e një farse elektorale, farsa është farsë, nuk është zgjedhje. Nuk mund të bësh më fjalë për zgjedhje, është farsë.

Një farsë është një farsë.

Në këtë kuadër gjithçka u zhvillua në kuadrin e një farse, por kësaj here, një farse të paralajmëruar, të parathënë në 4 dokumente ndërkombëtare, në një hiring shumë serioz, gjatë fushatës të Komisionit të Jashtëm të Parlamentit Europian dhe një hiring tjetër, po gjatë fushatës të Këshillit të Europës.

Pra komuniteti ndërkombëtar ka qenë syçelë ndaj këtyre zgjedhjeve, si kurrë ndonjëherë në zgjedhjet e një vendi tjetër.

Pse? Sepse komuniteti ndërkombëtar nuk i lejon vetes kurrë të niset me paragjykim, të firmosë dokumente mbi bazë paragjykimi. Jo atë nuk e bëjnë.

Bëj çfarë do përpjekje, por ai që synon ta shtyjë komunitetin ndërkombëtar drejt paragjykimit, ai është i dështuar, bën luftë me mullinjtë e erës, nuk e realizon kurrë.

Daniela Maloku, ReportTV: A do të vijojë të jetë në fuqi, kontrata e lobimit në SHBA apo do të zgjasë vetëm 3 muaj, për aq sa është parapaguar.

Sali Berisha: Tani, çështje që nuk ka të bëjë me zgjedhjet. Ka të bëjë me veprimtarinë normale të PD-së, dhe ka një fondacion atdhetar, shqiptaro-amerikan që ka ofruar një shërbim nëpërmjet një kompanie, për të cilin nuk ka asnjë vendim për tu tërhequr, por që ekziston një klauzolë që në çdo kohë, palët mund të tërhiqen.

Mariglen Kume, MCNTV: Në 6 mujin e parë të 2024, PD pati një aksion në parlament dhe në kauzën e saj kishte; me Edi Ramën nuk bëhen zgjedhje të lira dhe kërkuat qeveri teknike. U tërhoqët nga ajo kërkesë dhe në korrik të 2024, bëtë bashkë me Ramën, ndryshimet në Kodin Zgjedhor. Pse u tërhoqët nga ajo kauzë dhe tani i riktheheni prap?

Sali Berisha: Në aparencë është siç thoni ju, por po të lexosh katër rezolutat e të gjitha partive që sot qeverisin botën në të katër anët e saj, tregon se PD dhe aleatët tanë, janë të një mendimi të palëkundur se me Edi Ramën ka vetëm farsa zgjedhore dhe jo zgjedhje të lira.

Por, beteja kundër farsës zgjedhore është një proces.

Është themelor, nuk ka asgjë më themelore për një vend se sa rikthimi i votës së lirë.

Vetëm se ata duhet ta marrësh si proces.

Ka dy rrugë, rrugën paqësore, për të cilën ne jemi të përcaktuar dhe që kërkon një proces.

Ka pastaj rrugën e armatosur me guerile, por ne nuk jemi të kësaj rruge, ne e kemi bërë të qartë nga viti 1990 gjer sot, ne jemi parti e këtij orientimi, nuk heqim dorë.

Besojmë se ne do t’ia dalim…

Mariglen Kume, MCN TV: Pse hoqët dorë nga qeveria teknike?

Sali Berisha: Asnjë moment nuk ka ndodhur që ne kemi pasur besim tek Edi Rama. Jo!

Por, nga ana tjetër, mbështetje për qeveri teknike ne kemi garantuar dhe rezolutat e CDI dhe IDU kërkojnë krijimin e qeverisë teknike. Pra, beteja është në vazhdim.

Betejë që shqiptarët të votojnë të lirë.

Anisa Kadesha, RTSH: Ju shpjeguat Kartën e Kopenhagenit, por a janë të pasqyruara këto elementë të Kartës së Kopenhangenit në raportin paraprak të OSBE-ODIHR?

Sali Berisha: Absolutisht fjalë për fjalë. Në çdo kapitull. Cilido që lexon raportin e OSBE/ODIHR dhe të gjithë vëzhguesve, se ky raporti paraprak është i përbashkët mes OSBE/ODIHR, Parlamentit Europian dhe Këshillit të Europës, i ka paraqitur të gjitha me vërtetësi.

Natyrisht me gjuhën e raporteve, por ndër të tjera citohet në raport direkt edhe ky dokument.

Citohet në raport ky dokument dhe ato citime në raport bazuar në këtë dokument, ato përmbysin, ato dëshmojnë për farsë elektorale.

Ku aty shkruhet për kushte të pabarabarta.

Ku aty shkruhet se u shua kufiri midis shtetit dhe partisë.

Ata nuk i nxjerrin nga xhepi i tyre, ata i nxjerrin nga dokumenti i Kopenhagenit.

Por për hir të së vërtetës, e kanë cituar.

Kështu që zgjedhjet janë farsë. Ishin farsë elektorale. Edi Rama nuk zhvillon zgjedhje, zhvillon farsë.

Dhe e paralajmëroj të mos bëjë asnjë lloj përpjekje, ndërhyrje mbi dokumentacione dhe të tjera që i ka të zakonshme.

Ua tregova unë historinë se çfarë ndodhi në Këshillin e Europës.

Ia anuluan darkën për sjelljen e tij si me qenë i biri i Gadafit apo i Enver Hoxhës, dhe pastaj fluturuan qindra mesazhe kërcënimi tek personalitete që i anuluan darkën.

I them mos guxo të përzihesh në asnjë lloj procesi sepse këtë e ke gatuar vetë dhe nuk e ke gatuar me datë 11, e ke përgatitur në mënyrën më kriminale.