Kaja Kallas sot në Kosovë
Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, sot e viziton Kosovën në kuadër të një turni në Ballkanin Perëndimor.
“Kallas do të takohet me përfaqësues të partive politike dhe të organizatave të shoqërisë civile,” thuhet në një njoftim të BE-së dhe më pas do të mbajë një konferencë për shtyp në Shtëpinë e Evropës në ora 15:45, që do transmetohet drejtpërdrejt në EBS.
Gjithashtu Kallas do të vizitojë Misionin e Bashkimit Evropian për Sundimin e Ligjit në Kosovë, EULEX, si dhe do të takohet edhe me komandantin e KFOR-it, Enriko Barduani.
Ndryshe, Kaja Kallas viziton Kosovën në kohën kur autoritetet kosovare po përsërisin thirrjet për heqjen e masave ndaj vendit nga ana e BE-së, madje kanë kërkuar që kjo të ndodhë para vazhdimit të dialogut për normalizim marrëdhëniesh me Serbinë.
Kallas në Beograd: Koha të rifillojë dialogu midis Kosovës dhe Serbisë
Pas takimit me Presidentin e Serbisë, Aleksandar Vuçiç, Përfaqësuesja e Lartë e Bashkimit Evropian për Punët e Jashtme dhe Politikën e Sigurisë, Kaja Kallas, gjatë vizitës së saj në Beograd tha se dialogu në mes të Kosovës dhe Serbisë është domosdoshmëri për të dyja vendet, për të ecur përpara në rrugën drejt Bashkimit Evropian.
“Përsëri në Ballkanin Perëndimor. Do të vizitoj Serbinë, Kosovën dhe Maqedoninë e Veriut në dy ditët e ardhshme dhe do të angazhohem me qeveritë dhe shoqëritë civile të këtyre vendeve si pjesë e udhëtimit të tyre drejt Bashkimit Evropian. Dialogu Beograd-Prishtinë është një domosdoshmëri për të ecur përpara. Tani është koha për t’u riangazhuar,” tha Kallas pas takimit përmes rrjetit social X.
Ndërsa Presidenti serb Vuçiç tha se Serbia mbetet një partner i besueshëm për të gjithë ata që përpiqen sinqerisht për bashkëpunim, përparim dhe një të ardhme të përbashkët evropiane.
Përmes rrjetit social Instagram, Vuçiç tha se me Kallas diskutuan temat kryesore gjeopolitike, situatën e sigurisë në rajon, rrugën evropiane të Serbisë, si dhe dialogun midis Kosovëss dhe Serbisë.
“Theksova se Serbia është e përkushtuar ndaj dialogut konstruktiv, nën kujdesin e BE-së, si një mënyrë për të zgjidhur çështjet e hapura, dhe se mbrojtja e popullit serb në Kosovë,” tha Vuçiç duke shtuar se i kujtoj shefes së diplomacië evropiane se formimi i Asociacionit të komunave më shumicë serbe nuk është vetëm një detyrim i dakorduar, por edhe një parakusht për përparim të mëtejshëm në dialog dhe çdo normalizim të marrëdhënieve.
Për Rusinë dhe vizitën e Vuçiçit në Moskë ndonëse ishte paralajmëruar nga Kallas nuk foli asnjëra palë por Vuçiç tha se me Përfaqësuesen e Lartë të BE-së, ka disktuar edhe procesin e harmonizimit të Serbisë me Politikën e Jashtme dhe të Sigurisë të BE-së.
