Apeli i GJKKO lë në burg Erion Veliajn

Gjykata e Apelit të GJKKO ka lënë në burg Kryetarin e Bashkisë Tiranë, Erion Veliaj.

Në vendimin e shpallur, Gjykata e Posaçme e Apelit me gjyqtar Engert Pëllumbi, lë në fuqi masën “arrest me burg” për Erion Veliajn dhe “detyrim paraqitje” për biznesmenin, Elman Abulen.

Kryetari i Bashkisë Tiranë, Erion Veliaj, ka ofruar para për lirimin me kusht, por kjo nuk është pranuar nga Apeli i GJKKO.

Erion Veliaj i arrestuar për korrupsion që nga 10 shkurti i këtij viti, nuk ishte i pranishëm në seancën e sotme në Apelin e GJKKO, por u përfaqësua nga avokati i tij Ermir Beta.

Ndryshe, Kryetari i Bashkisë Tiranë, Erion Veliaj, akuzohet për “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim 9 herë, dhe, “Pastrimi i produkteve të veprës penale ose veprimtarisë kriminale”.

Gjithashtu akuzohet për “futjen e sendeve të ndaluara në qelitë e paraburgimit”.