Franca mbyll katër stendat e armëve izraelite në Paris. Tërbohen izraelitët!
Franca ka mbyllur katër stendat kryesore të kompanive izraelite në panairin e Parisit për shkak të ekspozimit të pretenduar të armëve sulmuese, veprim të cilin Izraeli e dënoi, duke konfirmuar një rritje të re të tensioneve midis aleatëve tradicionalë.
Një burim i njohur me çështjen tha sot për Agjencinë britanike të lajmeve Reuters se direktiva erdhi nga autoritetet franceze pasi kompanitë izraelite nuk vepruan në përputhje me udhëzimet e Agjencisë franceze të sigurisë për të hequr armët sulmuese ose kinetike nga stendat e ekspozitës.
Zëdhënësi i organizatorit të ekspozitës, Gifas, tha se disa stenda ishin të mbyllura, por nuk pranoi të komentonte më tej për rastin. Janë të hapura edhe tri stendat më të vogla izraelite, të cilat nuk i ekspozuan pajisjet e përmendura, si dhe stendat e Ministrisë së Mbrojtjes të Izraelit.
Marrëdhëni gjithnjë e më të këqija
Marrëdhëniet midis Francës dhe Izraelit, aleatë tradicionalisht të ngushtë, janë ftohur muajt e fundit pasi presidenti francez Emmanuel Macron u bë gjithnjë e më kritik ndaj Izraelit për luftën në Gaza.
Pas sulmeve raketore të Izraelit ndaj Iranit të premten, Macron tha se Irani mbante një përgjegjësi të madhe për destabilizimin e Lindjes së Mesme dhe i kërkoi Izraelit të tregonte përmbajtje.
Ministria izraelite e Mbrojtjes tha se e hodhi poshtë kategorikisht urdhrin për të hequr disa sisteme të armëve nga stendat e saj, duke detyruar organizatorët që të ngrenë ndarje të zeza, që ndanin pavionet industriale izraelite nga pjesa tjetër.
Izraeli: Vendim i paprecedentë
Në Deklaratën e ministrisë thuhet se aksioni u krye në mes të natës pasi zyrtarët izraelitë të mbrojtjes dhe përfaqësuesit e kompanisë kishin përfunduar tashmë me vendosjen e produkteve të tyre.
“Ky vendim i paprecedentë dhe i egër është i motivuar nga arsye politike dhe tregtare,” tha ministria përmes Deklaratës duke përfunduar:
“Francezët fshihen, gjoja pas arsyeve politike, për të përjashtuar armët sulmuese izraelite nga një ekspozitë ndërkombëtare – armë që konkurrojnë me industrinë franceze.”
