Parregullsitë në procesin e votimit nga Diaspora dhe përgjegjësia e KQZ e DHL, PD: Shqetësime serioze!

Pas zhvillimeve të fundit dhe verifikimeve në vijim nga ana e Komisionit Qendror të Zgjedhjeve, KQZ, mbi zarfet e votimit të ardhura nga Diaspora, sot Partia Demokratike përmes zëdhënëses për Antikorrupsion në PD, Genta Vangjeli, ka shpreh shqetësimin serioz për mënyrën se si është trajtuar dhe administruar ky proces.

“Sipas të dhënave zyrtare, një pjesë e konsiderueshme e fletëve të votimit të ardhura përmes operatorit postar DHL nuk përmbajnë nënshkrimet e rregullta të kërkuara nga kuadri ligjor.

Konkretisht, janë konstatuar raste të shumta ku, në vend të nënshkrimit të çdo votuesi nga Diaspora, janë gjetur dhe konstatuar: viza, pika, iniciale dhe simbole të tjera pa asnjë vlerë identifikuese, ose pafund raste kur mungon plotësisht çdo formë nënshkrimi nga zgjedhësi,” thekson Genta Vangjeli duke theksuar dhe evidentimin e fletave të dorëzimeve postare, të mbushura me të njëjtin dorëshkrim, çka ngre dyshime serioze mbi plotësimin e kushteve ligjore të vlefshmërisë së votës nga Diaspora.

Provat që vetë KQZ ka sjellë, tregojnë një masë shumë të madhe rastesh se marrja e votës me postë ndërkombëtare nuk është bërë individualisht, as në adresën e regjistruar të zgjedhësit në KQZ, dhe as me nënshkrim pas paraqitjes të një mjeti identifikimi, pra, ato vota nuk janë të vlefshme, janë të paligjshme dhe zerojnë procesin e Diasporës, thotë Partia Demokratike duke e konsideruar të papranueshme, që KQZ të “kujtohet” për shkeljet kontraktuale të DHL-së vetëm pasi është siguruar se këto probleme nuk do të ndikojnë më në vendimmarrjen e institucioneve të ankimimit.

“Ky veprim nuk mund të konsiderohet thjesht dhe vetëm rastësi. Për javë të tëra, si KQZ-ja ashtu edhe DHL kanë refuzuar të bëjnë transparente praktikat e dorëzimit të zarfeve nga Diaspora, duke penguar aksesin e subjekteve zgjedhore në dokumentacionin bazë të procesit.

Sot, kur KQZ deklaron mospagesën ndaj DHL-së për shkelje të kontratës, kërkojmë publikisht që ky institucion të japë përgjigje të qarta për: Masat e ndërmarra në kohë reale nga administrata e KQZ për të garantuar ligjshmërinë e procesit; Arsyet e mos-reagimit, pavarësisht paralajmërimeve të shpeshta dhe të dokumentuara nga subjekti ynë politik; Transparenca dhe integriteti i zgjedhjeve janë themel i demokracisë,” shprehet zëdhënëses për Antikorrupsion në PD, Genta Vangjeli duke përfunduar:

“Përgjegjësia për mbrojtjen e tyre bie para së gjithash mbi KQZ, si institucioni që administron këtë proces.

Të kthjellojmë shqiptarët, të qartësojmë shqiptarët, të motivojmë shqiptarët se qeveria teknike dhe zgjedhjet e lira duhet të jenë beteja jonë me të gjithë potencialet.”

Deklaratë:

Duke ndjekur zhvillimet më të fundit dhe verifikimet në vijim nga ana e Komisionit Qendror të Zgjedhjeve, KQZ, mbi zarfet e votimit të ardhura nga Diaspora, vijojmë të shprehim shqetësimin tonë serioz për mënyrën se si është trajtuar dhe administruar ky proces.

Sipas të dhënave zyrtare, një pjesë e konsiderueshme e fletëve të votimit të ardhura përmes operatorit postar DHL nuk përmbajnë nënshkrimet e rregullta të kërkuara nga kuadri ligjor.

Konkretisht, janë konstatuar raste të shumta ku, në vend të nënshkrimit të çdo votuesi nga Diaspora, janë gjetur dhe konstatuar :

viza,

pika,

iniciale,

simbole të tjera, pa asnjë vlerë identifikuese,

ose pafund raste kur mungon plotësisht çdo formë nënshkrimi nga zgjedhësi.

Po ashtu, janë evidentuar fleta të dorëzimeve postare, të mbushura me të njëjtin dorëshkrim, çka ngre dyshime serioze mbi plotësimin e kushteve ligjore të vlefshmërisë së votës nga Diaspora, sepse Kodi Zgjedhor parashikon që marrja e votës me postë ndërkombëtare duhej bërë, (i) individualisht, (ii) në adresën e regjistruar të zgjedhësit në KQZ, si dhe (iii) me nënshkrim pas paraqitjes të një mjeti identifikimi.

Provat që vetë KQZ ka sjellë, tregojnë një masë shumë të madhe rastesh kur këto tre (3) elementë ligjorë NUK janë përmbushur për votën e Diasporës: Rrjedhimisht, ato vota nuk janë të vlefshme, janë të paligjshme dhe zerojnë procesin e Diasporës.

Burime nga KQZ kanë deklaruar se nuk do të kryhet pagesa ndaj DHL për ato zarfa që nuk përmbajnë nënshkrime të rregullta. Ndërkohë, lindin disa pyetje themelore që kërkojnë sqarim publik:

Pse KQZ nuk ka ndërmarrë më herët verifikimin e nënshkrimeve, pavarësisht kërkesave të përsëritura nga përfaqësues të Partisë Demokratike, përfshirë edhe periudhën gjatë shqyrtimit të ankimimeve në KAS?

Pse nuk është bërë transparente lista e plotë e dorëzimeve për çdo shtet të Diasporës, ashtu siç është kërkuar zyrtarisht që prej datës 15 Maj?

Pse provat e ardhura nga vendet me numër të madh votuesish, si SHBA-ja, Mbretëria e Bashkuar, Gjermania dhe Italia, e cila kryeson për nga numri i votuesve (91,210), janë vënë në dispozicion vetëm pasi trupa e KAS kishte rrëzuar shumicën e ankimimeve të PD-së?

Është e papranueshme që KQZ të ‘kujtohet’ për shkeljet kontraktuale të DHL-it vetëm pasi është siguruar se këto probleme nuk do të ndikojnë më në vendimmarrjen e institucioneve të ankimimit.

Ky veprim nuk mund të konsiderohet thjesht dhe vetëm rastësi. Për javë të tëra, si KQZ-ja ashtu edhe DHL kanë refuzuar të bëjnë transparente praktikat e dorëzimit të zarfeve nga Diaspora, duke penguar aksesin e subjekteve zgjedhore në dokumentacionin bazë të procesit.

Sot, kur KQZ deklaron mospagesën ndaj DHL-së për shkelje të kontratës, kërkojmë publikisht që ky institucion të japë përgjigje të qarta për:

Masat e ndërmarra në kohë reale nga administrata e KQZ për të garantuar ligjshmërinë e procesit;

Arsyet e mos-reagimit, pavarësisht paralajmërimeve të shpeshta dhe të dokumentuara nga subjekti ynë politik;

Transparenca dhe integriteti i zgjedhjeve janë themel i demokracisë.

Përgjegjësia për mbrojtjen e tyre bie para së gjithash mbi KQZ, si institucioni që administron këtë proces.

Të kthjellojmë shqiptarët, të qartësojmë shqiptarët, të motivojmë shqiptarët se qeveria teknike dhe zgjedhjet e lira duhet të jenë beteja jonë me të gjithë potencialet.

Pra, përballë kësaj propagande të kontrolluar plotësisht nga qeveria dhe të paguar nga qeveria, ne paraqesim çdo ditë fakte dhe dokumente që dëshmojnë, u provojnë shqiptarëve se çfarë ndodhi me 11 Maj dhe në fushatën elektorale në Shqipëri.

Pra, ky është qëllimi ynë.