Kosovë, sot fillon dorëzimi i listave të kandidatëve për zgjedhjet lokale 2025

Duke filluar nga dita e sotme, 26 qershor, do të hapet afati për subjektet politike në Kosovë për të aplikuar për t’u certifikuar për pjesëmarrje në Zgjedhjet Lokale të 12 tetorit 2025 dhe për të dorëzuar listën me emrat e kandidatëve garues.

Zëdhënësi i KQZ-së, Valmir Elezi, tha se kjo periudhë do të zgjasë 49 ditë.

“Duke filluar nga 26 qershori dhe deri më 13 gusht 2025, partitë politike, koalicionet, iniciativat qytetare dhe kandidatët e pavarur mund të paraqesin në KQZ, respektivisht Zyrën për Regjistrim, Certifikim dhe Kontrollin Financiar të Subjekteve Politike, kërkesën e tyre për t’u certifikuar për pjesëmarrje në Zgjedhjet për Kryetarë të Komunave dhe për Kuvendet Komunale, të cilat do të mbahen më 12 tetor 2025 dhe listën me emrat e kandidatëve për Kryetarë të Komunave dhe për Kuvendet Komunale,” tha Valmir Elezi.

Sipas KQZ-së, aplikimi do të mundësohet online për subjektet politike dhe mbetet në vullnetin e tyre të përcaktohen për llojin e zgjedhjeve që duan të marrin pjesë.

“Është krejtësisht në vullnetin e subjekteve politike që të përcaktohen se në cilat komuna duan të garojnë,” tha Zëdhënësi i KQZ-së, Valmir Elezi, duke përfunduar:

“Po ashtu, është në vullnetin e subjekteve politike që të zgjedhin nëse në një komunë të caktuar do të garojnë vetëm në zgjedhje për Kryetar Komune ose për Kuvend Komunal apo për të dyja së bashku.”