Raporti i KE, Berisha: Kjo është nekrologjia e shtetit ligjor, sistemi i drejtësisë sundohet nga korporatat

Kryetari i Partisë Demokratike, Sali Berisha, ka vazhduar edhe sot me publikimin e provave mbi farsën elektorale të 11 Majit ku vota e diasporës u manipulua në mënyrë të frikshme, që dëshmohen edhe me firmat tek zarfet e dorëzuara nga DHL.

Në konferencë e përjavshme, sot Kryetari i Partisë Demokratike e vlerësoi Raportin e Komisionit Europian si nekrologji të shtetit ligjor, ku sistemi i drejtësisë sundohet nga korporatat, ndërsa Edi Rama po përhap dezinformime të turpshme duke përdorur Presidencën dhe Parlamentin.

“Opinioni publik shqiptar është subjekt i një propagande mashtruese vulgare të pashembullt dhe të paprecedent të ndonjë vendi tjetër.
Vetëm në këtë vend ndodh që katër mediat kombëtare të informojnë publikun se një çarter me turistë u nis nga aeroporti i Jordanisë, thua se vinte nga Hëna.
Një media tjetër raportonte nga Thethi sikur të ishte jo medie, jo televizion kombëtar, por persekutor kombëtar.
Lexonte ato ç’ka i kishte çuar zyra e kryeministrit dhe ku e paraqiste Thethin pa asnjë lloj fakti apo dokumenti të mbushur dhe stërmbushur me betonëra e stërbetonëra.

Në çdo anë, dezinformimi i pamëshirë i shqiptarëve është platforma e kësaj qeverie.
Ajo çka duhet të shtoj sot është klonimi i zyrave të shtypit apo në fakt asgjësimi i tyre dhe sot mund të thuhet se ka vetëm një zyrë shtypi, ajo e mashtruesit profesionist Endri Fuga dhe Edi Rama, të cilët në unison shpërndajnë certifikata dezinformimi për qytetarët.
Kam këtu një dokument-raport të Komisionit Evropian për gjendjen e shtetit ligjor në Shqipëri.
Ky raport me një objektivitet të plotë zbërthen korporatat e reja të krijuara në Shqipëri, pra sot po të lexosh me vëmendje këtë raport, arrin në përfundimin se shteti ligjor është i groposur në këtë vend, pasi krahas korporatës energjetike, korporatës së investimeve, është krijuar korporata e prokurorëve me në krye Këshillin e Lartë të Prokurorisë, korporata e gjyqtarëve me në krye të Këshillin e Lartë të Gjyqësorit dhe korporata e Artur Metanit, me në krye Artur Metanin.
Pra, me një objektivitet të madh, në këtë raport analizohet gjendja dramatike e shtetit ligjor, ndërkohë Edi Rama për të përshëndetur raportin nxjerr zyrat e klonuara të shtypit, njëra në presidencë dhe tjetra në parlament dhe unë e quaj këtë një akt dezinformimi të turpshëm.
Lexoni komunikatat që lexon Pëllumbesha Spiropali me atë që firmos presidenti, ato janë si dy pika uji, janë kopje të njëra- tjetrës sepse janë marrë të dyja nga Fuga,” dhe meqenëse, mashtrimi është platformë kryesore, ai paraqiti para shqiptarëve disa nga konstatimet më thelbësore të këtij raporti, që i përkushtohet funksionimit të shtetit ligjor në Shqipëri dhe konkretisht sistemit të drejtësisë.
“Koordinimi inter-institucional i këshillave, pra KLP, KLGJ dhe institucioneve të tjera të drejtësisë nuk është përmirësuar. Është pra përtokë sepse nuk kanë asnjë vullnet të koordinojnë, por vetëm të qeverisin si korporata të veçanta. Dhe kjo është një gjëmë për shtetin ligjor.
Defekte të mëdha të konstatuara gjatë vetingut dëshmojnë se 56 përqind të rasteve gjykatësit u larguan nga detyra. Imagjinoni me sa ka mbetur drejtësia shqiptare. Nga qindra e qindra gjykatës dhe prokurorë, janë arritur të referojnë në prokurori vetëm 19 sepse shumica e tyre janë hequr pa shkaqe ligjore, përndryshe ata sipas ligjit dhe Kushtetutës duhet të shkonin para ligjit, para drejtësisë.
Defektet e konstatuara më parë në emërimet e anëtarëve jomagjistratë në KLGJ dhe KLP mbeten njëlloj, qëndrojnë.
Parlamenti emëroi tre anëtarë jomagjistratë në KLGJ dhe në KLP, por proceset u vonuan dhe u ndikuan shumë nga Parlamenti, i cili përdori diskualifikimet e shumta natyrisht në kurriz të cilësive dhe kualifikimeve të kandidatëve.
Vetingu i jomagjistratëve të emëruar nga këto është defektoz dhe cenon transparencën, meritokracinë dhe të gjithë procesin.
Sfida të mëdha mbeten në vlerësimin cilësor, emërimet, promovimet dhe transferimet e magjistratëve.
Këshilli, thotë, nuk ka rregullore të veprimtarisë.
Që të dy këshillat nuk u përmbahen kohërave dhe afateve. Ato kanë akumuluar një numër të madh dosjesh.
KLGJ nuk ka rregullore të brendshme të funksionimit efektiv, kurse i KLP duhet të rishqyrtohet.
Në të dy këshillat, dëgjojeni, mungojnë rregulloret për procedurat e konfliktit të interesit për anëtarët e tyre, çka sjell konflikte interesi në potencial – nuk pyesin- dhe konflikti i interesit nuk adresohet.
Inspektori i Lartë i Drejtësisë ka vakanca të shumta, nuk i plotëson vendet, nuk merret me punë. Ka 1360 ankesa, por që të gjitha myken në zyrat e tij.
Këshilli i Lartë i Drejtësisë pranoi vetëm dy ankesa për shqyrtim. Imagjinoni, që janë me qindra, mijëra.
Nuk zbatohet rregulli i shpërndarjes së paanshme të dosjeve. Jo!
Ndërhyrje serioze bëhen nga politikanët në sistem.
Nxin në raport, që e përshëndet Ramaduro nëpërmjet Bajram Begajt dhe Pëllumbesha Spiropalit, nxin akti i shëmtuar akti i shëmtuar i rrethimit të SPAK-ut në shkurt nga parlamenti dhe qeveria. Akt i paprecedent.
Është kufizuar aksesi në drejtësi, thotë, veçanërisht në gjykatën e apelit. Pra, nuk ekziston një sistem i integruar drejtësie. Pak a shumë ky është thelbi i kësaj që shkruhet.
Po kur nuk ekziston, ato janë korporata, prandaj e fillova fjalën time me fjalën korporata. Këta nuk e kanë përdorur termin korporatë, por de facto kur sistemi nuk integrohet, kemi të bëjmë me korporata të veçanta.
Ata qëikin nga vetingu shkojnë tek kryemafiozi në drejtësi, Arben Rakipi në Shkollën e Magjistraturës. Natyrisht emri Arben nuk është, por Shkolla e Magjistraturës.
Tani të ndalem këtu, është kaq i gjatë, e bën fërtele, prandaj u bëj thirrje qytetarëve të mos bien viktimë e mashtrimit qeveritar dhe medieve qeveritare.
Denoncohet korrupsioni masiv, dështimi në luftën kundër korrupsionit, jepet një numër ku thotë 107 persona u dënuan dhe ky numër është tre herë më i ulët se se ai që është dënuar në vitin 2007 apo 2008 për korrupsion.
Pra, për ta përmbledhur, raporti mbi gjendjen e shtetit ligjor në Shqipëri është de facto një lloj nekrologjie e shtetit ligjor.
Dhe unë u garantoj se ne do paraqesim fakte dhe dokumente për çdo paragraf të këtij raporti, si autorëve të tij në Komisionin Evropian, ashtu edhe partnerëve tanë në Europë dhe botë.
Ne kemi denoncuar me kohë zëvendësimin e shtetit ligjor me narkoshtetin, por cilido që lexon këtë raport, kupton se sistemi pas 10 vitesh reformë, sistemi i drejtësisë është…”

Denoncimi i farsës elektorale me fakte të reja vazhdoi edhe në këtë konferencë të përjavshme ku lideri i opozitës dëshmoi manipulimin e votave të diasporës.

“Tani të ndalemi tek farsa më e shëmtuar elektorale e 32 viteve të fundit, farsa e 11 majit 2025.
Kjo farsë pati aspektet më të shëmtuara, më të egra, më të turpshme, por duhet t’u them se kapitulli i diasporës apo qëndrimi i Ramaduros ndaj votës së diasporës, tejkalon qëndrimin e cilitdo diktatori tjetër në histori.
Poshtërimi që i ka bërë shqiptarëve në diasporë me manipulimin masiv të votave të tyre, Edi Rama është faktuar se është armik i egër i votës së lirë të shqiptarëve, por edhe i shqiptarëve kudo që janë jashtë vendit.
Tani jemi përsëri në fazën e procesit me të cilin DHL-ja e qeverisë u ka dorëzuar votuesve zarfet sepse kthimin ata po përpiqen ta fshehin. Sepse kthimi është edhe më i rëndë ose kaq i rëndë sa ky.
Këtu keni një gjë që nuk do ta besoni.
Të gjitha këto përfaqësojnë zarfet e adresuara Vangjelit, Adriatikut, Beharit…
Tani, u lutem, shikoni firmat që ka vendosur Vangjeli, firma është një drejtëz. Firma, sikur gjoja e ka marrë Vangjeli këtë. Firma tjetër dy viza që kryqëzohen në fund. Firma tjetër, një vizë e shtrirë. Firma tjetër kjo, firma tjetër një zhgarravinë. Firma tjetër përsëri një vizë që duhet ta merrte Aida. Kjo tjetra është Skerdi, një vizë.
Vazhdojmë me të tjera. Këto janë të tjera, vizë, kjo është firmë e DHL-së. Firma, firma, firma një vizë…
Pra, firmë një vizë. Firmë një vizë. Firmë një V. Firmë një vizë.
Të tjerat, dy viza vertikale. Një vizë, një vizë e pjerrët, një vizë e drejtë, një vizë vertikale, një vizë e përkulur. Këto janë firmat e atyre që kanë marrë gjoja zarfin me fletën e votimit. Firmë dy viza, një gremç, vizë e drejtë, vizë e përthyer. Vazhdojmë me firmat. Këto janë firmat. Një V. Vazhdojmë me firmat, vizë e drejtë, tre viza, një V, vizë e drejtë, vizë e drejtë. E njëjta gjë, vazhdojmë. Urdhëroni. Viza, të gjitha viza.
Faktikisht këto nuk kanë shkuar, kanë shkuar në një zyrë dhe janë mbushur nga Lubia, nga Pëllumbesha, nga Taotao, etj me radhë. Nuk janë lodhur, i kanë rënë shkurt me nga një vizë. Viza, viza, viza…” tha Berisha duke konstatuar se zarfet nuk u dorëzuan tek qytetarët, por u grumbulluan në një qendër dhe u plotësuan për PS-në.

“Pra, siç e shihni, zarfet nuk u dorëzuan tek qytetarët, por në mënyrë kriminale u grumbulluan në një qendër, e cila i përdori ato për të plotësuar votat për PS-në.
Ky është një proces që nuk do pranohet kurrë dhe shqiptarët, çfarëdo që të bëjë Edi Rama, i cili përpiqet me të gjithë mënyra të largojë vëmendjen nga demonstrimi i këtij krimi të shëmtuar, ai nuk do mund të shpëtojë.
Këto zgjedhje nuk njihen dhe kjo farsë elektorale, ky krim madhor elektoral ka një autor dhe ai është Edi Rama.
Ka një mbrojtës kryesor të saj dhe ai është Altin Troplini, i cili me qëndrimet që ka mbajtur ndaj krimit kushtetues elektoral dëshmon se nuk ka ligj, nuk ka moral, por është thjesht një skllav dhe bashkëpunëtor i krimit.”

Në fund, e pashmangshme ishte ndërhyrja që Edi Rama po i bënë gjatë këtyre ditëve pushteti lokal, ku Kryetari i Partisë Demokratike konstaton se Ramaduro është vetë kryeministër, vetë kryeprokuror, vetë kryepolic, vetë kryetar bashkie.

“Nuk ka diskutim që marrja e kompetencave të qeverisë vendore nga qeveria qendrore është një akt i rëndë antikushtetues dhe është një shkelje e hapur e Kartës së Kongresit të Autoriteteve Lokale dhe Rajonale të Këshillit të Europës, të firmosur nga Shqipëria.
Është një shkelje e rëndë e vendimit të Gjykatës Kushtetuese të dhjetorit 2006 që ndalon apo i heq të drejtën qeverisë qendrore të mos bëj asnjë ndryshim në vendimet e qeverisë vendore.
Gjykata Kushtetuese ka vendosur në atë vendim që për objeksionet që mund të ketë qeveria qendrore, ajo nuk mund të ndërhyjë në asnjë rrugë përveçse përmes gjykatave. Ta padisë në gjykatë.
Ramaduro është vetë kryeministër, vetë kryeprokuror, vetë kryepolic, vetë kryetar bashkie, ndaj ai sillet në këtë mënyrë.
Por pse unë vazhdoj dhe do të vazhdoj në këto denoncime? Midis të gjitha të drejtave, fjala e lirë dhe vota e lirë janë të drejtat më themelore. Të gjitha të tjerat vijnë pas.
Unë nuk ua lexova ju raportin se çfarë thotë për mediat dhe fjalën e lirë. Çfarë thotë për AMA-n dhe kontrollin nga qeveria dhe që janë shumë të rënda,” tha Kryetari i Partisë Demkratike, Sali Berisha, duke përfunduar:
Po merrem gjithnjë me votën, pa të cilën nuk ka demokraci. Pa të cilën nuk ka shtet ligjor.
Shteti ligjor, kushtetutshmëria, liria dhe të drejtat bazë kanë në themel votën e lirë, vullnetin e lirë të qytetarëve.”