Bruksel, sot shefat e diplomacisë së BE-së diskutojnë për luftën në Ukrainë dhe Lindjen e Mesme

Ministrat e Jashtëm të Bashkimit Evropian do të takohen sot në Bruksel ku pritet të diskutohet për luftën në Ukrainë dhe situatën në Lindjen e Mesme, pasi ende nuk është marrë një vendim mbi paketën e 18-të të sanksioneve të BE kundër Rusisë.

Masat ndëshkuese të propozuara, që u prezantuan nga Komisioni Evropian në muajin qershor, synojnë sektorët financiarë dhe të energjisë të Rusisë në përgjigje të refuzimit të Presidentit rus Vladimir Putin për të rënë dakord për një armëpushim pa kushte në Ukrainë.

Slovakia s’është gati të mbështesë sanksionet

Sanksionet u pezulluan pasi kryeministri sllovak Robert Fico tha se nuk ishte gati ta mbështeste propozimin, duke përmendur shqetësime në lidhje me importet e gazit të Sllovakisë.

Sipas planeve, tavani ndërkombëtar i çmimit të eksporteve të naftës ruse do të reduktohej në 45 dollarë për fuçi, nga 60 dollarë për fuçi, por kjo masë nuk mori mbështetje unanime në takimin e Grupit të Shtatë vendeve më të industrializuara, G7, i cili u zhvillua muajin e kaluar.

Ministrat e BE-së do të diskutojnë gjithashtu për luftën ruse me homologun ukrainas Andriy Sibih, i cili planifikon të marrë pjesë në takim përmes një videolidhjeje.

Situata në Lindjen e Mesme është gjithashtu në agjendën e takimit, pasi BE njoftoi një marrëveshje me Izraelin javën e kaluar për përmirësimin e aksesit në ndihmën humanitare në Gaza.