Sot nis Seminari për Gjuhën, Letërsinë dhe Kulturën Shqiptare

Sot, më 18 gusht 2025, në orën 11:00, në amfiteatrin e Bibliotekës Qendrore Universitare në Prishtinë, do të bëhet hapja solemne e punimeve Seminari Ndërkombëtar i Gjuhës, Letërsisë dhe Kulturës Shqiptare.

“Në këtë edicion të Seminarit, përpos studiueseve, studiuesve nga Kosova dhe Shqipëria, do të marrin pjesë edhe albanologe/ë nga shumë vende të botës, për t’i shpalosur dhe për të diskutuar rreth arritjeve e rezultateve të tyre të fundit shkencore,” ka bërë të ditur Drejtoria e seminarit të Univerisitetit të Prishtinës.

Ndërkaq në fund të Seminarit do të mbahet sesioni shkencor me këto tema bosht: Zhvillime aktuale lidhur me leksikun e shqipes, Shqipja në rrjetet sociale dhe Postmodernizmi në letërsinë shqipe.

Njëherësh, në programin bazë të Seminarit 43 përfshihen kurse intensive të mësimit të shqipes (tri shkallë), ligjërata të veçanta të gjuhësisë, ligjërata për letërsinë shqiptare dhe referime shkencore.

Po ashtu është bërë me dije se ashtu si edhe në edicionet paraprake, Seminari ofron program kulturor plotësues për t’i njohur seminaristët me bukuritë natyrore, me veprimtaritë kulturore, si dhe me zhvillime të tjera pozitive.

Seminari Ndërkombëtar për Gjuhën, Letërsinë dhe Kulturën Shqiptare është themeluar në vitin 1974 në Fakultetin e Filologjisë (atëherë: Fakulteti Filozofik) të Universitetit të Prishtinës. Ky Seminar organizohet për studente/ë e studiuese/studiues që merren me çështje të gjuhës, të letërsisë e të kulturës shqiptare, por edhe me albanologjinë përgjithësisht. Deri më tani, seminari ka zhvilluar gjithsej 42 sesione.

Ndryshe, edicioni i 43-të i Seminarit Ndërkombëtar i Gjuhës, Letërsisë dhe Kulturës Shqiptare i cili do të nisë punimet sot dhe do të zgjas deri më 29 gusht, do t’i zhvillojë punimet në sallën “Idriz Ajeti” të Fakultetit të Filologjisë në Prishtinë.