Pas vendimit të Gjykatës Kushtetuese, nesër seanca konstituive e Parlamentit të Kosovës

Pas aktgjykimit të ri të Gjykatës Kushtetuese, deputetët do të mblidhen nesër në përpjekjen e radhës për konstituimin e legjislaturës së nëntë të Parlamentit të Kosovës.

Sipas njoftimit nga Parlamenti i Kosovës, mbledhja do të mbahet duke filluar nga ora 11:00 dhe në rend dite janë zgjedhja e kryetarit të Parlamentit dhe nënkryetarëve.

Kjo është seanca e parë që mbahet pas masës së përkohshme që nuk lejonte deputetët të marrin asnjë vendim, deri në publikimin e vendimit të ri të Gjykatës Kushtetuese.

Ndërkohë, dje Gjykata Kushtetuese ka publikuar aktgjykimin, i cili specifikon se seanca konstituive duhet të vazhdojë me pikën 3 të rendit të ditës së Seancës Konstituive, të miratuar më 8 prill 2025, dhe në pajtim me paragrafin 2 të nenit 67 [Zgjedhja e Kryetarit dhe Nënkryetarëve] të Kushtetutës, të ftojë përfaqësuesin e grupit më të madh parlamentar për të propozuar kandidatin/en për Kryetar/e të Kuvendit të Republikës së Kosovës, i/e cili/cila zgjedhet përmes votimit të hapur, votimi i cili mund të realizohet vetëm deri në 3 (tre) herë për kandidatin/en e njëjtë.

Deri më tani deputetët kanë dështuar 54 herë ta konstituojnë legjislaturën e dalë nga zgjedhjet e 9 shkurtit.