Europoli sekuestroi 297 pako me miliona euro, dollarë dhe paund të falsifikuar
Europol bëri të ditur përmes web faqes pjesëmarrjen në një operacion të përbashkët që ndërpreu shpërndarjen e parave të falsifikuara përmes shërbimeve postare. Aksioni rezultoi me kapjen e pothuajse një milion artikujve, duke përfshirë euro, dollarë amerikanë dhe paund britanikë të falsifikuar, me një vlerë prej më shumë se 66 milionë euro.
Suksesi i operacionit u arrit falë bashkëpunimit të shkëlqyer midis shërbimeve policore nga 18 vende, i cili ndihmoi hetuesit të kuptojnë më në detaje metodat kriminale dhe rrugët e kontrabandës. Falë kësaj përpjekjeje të përbashkët, operacioni nisi 102 hetime të reja që synonin rrjetet kriminale të përfshira në falsifikimin e parave.
U gjetën pothuajse një milion artikuj të falsifikuar
Gjatë operacionit, u sekuestruan 297 pako që përmbanin para të falsifikuara dhe u kapën më shumë se 990.000 artikuj të falsifikuar, duke përfshirë kartëmonedha dhe monedha me vlerë më shumë se 280.000 euro, 679.000 dollarë amerikanë dhe 12.000 paund.
Si agjencia kryesore e Bashkimit Evropian në luftën kundër falsifikimit të parave, Europol ofroi ekspertizë, koordinoi shkëmbimin e informacionit dhe mbështeti autoritetet kombëtare të policisë në zbulimin e dërgesave të dyshimta.
Zyra Evropiane për Luftën Kundër Mashtrimit, OLAF, gjithashtu mbështeti hetimin duke ofruar infrastrukturë teknike gjatë fazës operative.
Hetimi, i udhëhequr nga Austria, Portugalia dhe Spanja, nga tetori i vitit 2024 deri në mars të vitit 2025 dhe zbuloi disa rrjete të reja kriminale të përfshira në falsifikimin e parave. Shumica e këtyre rrjeteve veprojnë jashtë BE-së, kryesisht nga Azia, por edhe nga Amerika dhe Lindja e Mesme.
Një sukses i veçantë u arrit në Rumani.
Ky operacion shënoi fazën e dytë të një operacioni të mëparshëm në të cilin ishte përfshirë edhe Europol. Bashkëpunimi më i fortë dhe i përmirësuar midis doganave dhe forcave policore i mundësoi autoriteteve të arrinin rezultate dukshëm më të mira këtë herë.
Një sukses i veçantë u arrit në Rumani, ku një veprim i koordinuar nga autoritetet kombëtare rezultoi në sekuestrimin e 600.000 dollarëve amerikanë të falsifikuar.
Ashtu si në fazën e parë të operacionit, shumica dërrmuese e sendeve të sekuestruara ishin kartëmonedha me një dizajn të modifikuar, shpesh të quajtura “para filmi”. Këto riprodhime kanë një formë dhe ngjyrë të ngjashme me kartëmonedhat e vërteta, por përmbajnë një vërejtje të vogël që tregon se ato janë të falsifikuara. Mirëpo, këto vërejtje shpesh injorohen, që ju mundëson kriminelëve t’i paraqesin ato si monedhë të vërtetë.
