Spiunia ruse kapet duke punuar në ambasadën e SHBA në Moskë

Një spiune e dyshuar ruse ka punuar për më shumë se 10 vjet në Ambasadën e SHBA në Moskë, tha një zyrtar i lartë i administratës për CNN.

Shtetasja ruse, punoi për shumë vite për Shërbimin Sekret të Shteteve të Bashkuara dhe dyshimet e para kanë ardhur  pas një kontrolli rutinë të sigurisë së Departamentit të Shtetit në vitin 2016, sqaroi zyrtari.

Departamenti amerikan i Shtetit zbuloi se gruaja kishte bërë takime të rregullta dhe të paautorizuara me shërbimin e inteligjencës ruse, FSB.

“Ajo dha informacione shumë më shumë se sa që e kishte të lejuar,” tha zyrtari.

Shërbimi rajonal i sigurisë i tërhoqi vërejtjen ambasadës për spiunen e dyshuar në muajin janar dhe ajo verën e kaluar u largua nga puna.

Gruaja kishte akses në sistemin online të Shërbimit Sekret Amerikan, por jo  edhe në  informacionet tepër sekrete dhe nuk paraqet kërcënim për siguri kombëtare, tha zyrtari.

Personi i cili ishte në dijeni me rastin tha për CNN se shtetasen ruse e kishte punësuar Departamenti i Shtetit por ka kryer punë edhe për shërbimin sekret.

Departamenti amerikan i Shtetit ka refuzuar të komentoj rastin:

“Nuk komentojmë akuzat e lidhura me shërbimet sekrete dhe nuk kemi informacione për incidentin në fjalë”.

“Agjencitë kontrollojnë të punësuarit jashtë shtetit”

Shërbimi sekret tha se shtetasja ruse për asnjë moment nuk kishte mundësi të vjen deri tek informacionet sekrete që lidhen me sigurinë kombëtare,  ndërkohë Departamenti amerikan i Shtetit deklaron:

“Përgjithësisht, jemi të vetëdijshëm që shërbimet e huaja sekrete bëjnë përpjekje që të shfrytëzojnë të punësuarit e qeverisë amerikane. Agjencitë në mënyrë të rreptë verifikojnë të gjithë të punësuarit tanë jashtë shtetit,” thekson DASH duke përfunduar:

“Nëse zbulojmë se të punësuarit shkelin rregullat e sigurisë, ndërmarrim hapat e duhur.”