Thirrje partive parlamentare, Presidentja e Kosovës: Vendosni interesin e vendit para dallimeve

Duke i bërë thirrje partive parlamentare që të arrijnë një marrëveshje dhe të formojnë institucionet shtetërore, Presidentja e Kosovës, Vjosa Osmani, tha se partitë duhet t’i lënë mënjanë dallimet dhe të vendosin interesin e vendit para çdo gjëje tjetër.

“E shfrytëzoj rastin që t’u bëj thirrje sërish të gjitha partive politike që të vendosin interesin e vendit para dhe t’i lënë anash dallimet. Duhet të përpiqen të formojnë një koalicion të shumicës parlamentare që do ta çojë Kosovën përpara,” tha Vjosa Osmani në një intervistë për televizionin polak “TVP World”.

Si pasojë e kësaj bllokade politike, tha Presidentja Osmani, Kosova po humbet projekte të rëndësishme të Bashkimit Evropian dhe mundësi bashkëpunimi me administratën e re të Shteteve të Bashkuara të Amerikës, për të cilat është punuar gjatë.

“Shumica e marrëveshjeve duhet të kalojnë në Kuvend për ratifikim dhe në Qeveri për zbatim. Qytetarët e Kosovës meritojnë një qeveri funksionale dhe me kapacitet të plotë,” tha Presidentj duke përsëritur se Kosova nuk e ka luksin të qëndrojë gjatë pa institucione funksionale.

“Dikush mund të thotë se Belgjika ka qëndruar dy vjet pa qeveri, Austria gjashtë muaj. E kuptoj, por Kosova nuk e ka këtë luks. Ne duhet të ecim përpara me reformat dhe me procesin e anëtarësimit në organizata ndërkombëtare,” tha Vjosa Osmani e bindur se nuk ka ndikim të jashtëm në vendimet e partive të mëdha politike në Kosovë.

“Është një çështje e besimit të tyre personal, se me kë duan të bashkëpunojnë. Është diçka shumë lokale!”

Ndryshe, dje ka dështuar tentimi i radhës për zgjedhjen e Kryetarit të Palramentit. Partia fituese e zgjedhjeve të 9 shkurtit, Lëvizja Vetëvendosje, propozoi Hekuran Muratin, Arbërie Nagavcin dhe Dimal Bashën, por kandidatët nuk  i morën votat e nevojshme.

Vazhdimi i seancës konstituive të Parlamentit të Kosovës pritet të mbahet nesër me fillim në orën 11:00.