Thyhet inati politik, Kryetari i Parlamentit të Kosovës zgjedhet Dimal Basha

Me 73 vota për, 30 kundër dhe 3 abstenime, Parlamenti i Kosovës ka zgjedhur për Kryetar Dimal Bashën në përpjekjen e 58-të.

Kryetari i sapozgjedhur i Parlamentit të Kosovës, Dimal Basha, në fjalëne tij pas zgjedhjes tha se ky institucion dhe vet shteti është i ndërtuar mbi sakrifica shumëvjeçare.

“Ky institucion është zemra e demokracisë sonë, vendi ku përfaqësohen zërat e të gjithë qytetarëve. Republika jonë është e ndërtuar mbi sakrifica dhe mbi besimin e përbashkët se liria dhe shteti ynë janë më të mëdha se çdo interes i përveçëm. Republika jonë është e ndërtuar mbi sakrifica të panumërta, mbi gjakun, mundin dhe qëndresën e atyre që besuan se e ardhmja e kombit ishte më e rëndësishme se vet jeta e tyre,” tha Dimal Basha duke nderuar historinë e grave dhe figura publike të cilat ndikuan në shtetndërtimin e Kosovës në etapa të ndryshme kohore. Vazhdoi me nderimin e kontributit të ushtarëve të UÇK-së, të cilën e sollën lirinë dhe figurës paqeruajtëse të Ibrahim Rugovës. 

“Ka disa muaj që ky Kuvend është ballafaquar me një sfidë që s’e kemi parë më herët, por me të gjitha betejat unë besoj fuqishëm që ka qenë shkollë që i ka shërbyer demokracisë por edhe emancipimit tonë si shoqëri. Këto ballafaqime gjinden edhe në vendet më të zhvilluara dhe prandaj me rëndësi është që gjithçka është bërë në kuadër të konturave të debatit demokratik,” tha Basha duke i bërë thirrje për unifikim dhe bashkëpunim mes deputetëve në legjislaturën e nëntë.

Pas fjalës së tij, Kryetari i ri i Parlamentit të Kosovës, Dimal Basha, dha një orë pushim për të vazhduar seancën konstituive me zgjedhjen e Nënkryetarëve, duke hapur portën e afateve kushtetuese prej 15 ditëve në zgjedhjen e Qeverisë së re, nga partia fituese, Lëvizja Vetëvendosje.