Në shtetin e Edi Ramës, Kukësi qarku më i varfër ka shkallën më të lartë të punësimit

Papunësia ka ardhur në ulje vitet e fundit, por brenda treguesve zyrtare shfaqen problematika të mëdha mes faktit se sa janë të punësuar realisht që marrin pagesa mujore dhe atyre që raportohen si të punësuar zyrtarisht.

Sipas të dhënave zyrtare të INSTAT në vitin 2024, qarku me shkallën më të lartë punësimit ishte Kukësi 70.9 për qind dhe Gjirokastra 66.0 për qind, ndërsa qarqet me shkallë punësimi më të ulët janë Lezha 47.6 për qind dhe Vlora 51.7 për qind.

Teksa Kukësi ka shkallën më të lartë punësimit, vjen në fund të renditjes nga 12 qarqet e tjera për shpenzimet mujore të familjeve. Në vitin 2023 Një familje në Kukës shpenzonte 73.225 lekë në muaj sipas INSTAT, niveli më i ulët në rang vendi dhe 20 për qind më pak se mesatarja kombëtare.

Duke verifikuar strukturën e punësimit në Kukës dominon dega e bujqësisë. Në këtë sektor janë të punësuar 72 për qind e totalit te te  punësuarve, po kur vjen puna tek rendimenti Bujqësore Kukësi kontribuon më pak se çdo qark në prodhimin bujqësor në të gjitha degët.

Pothuajse të gjithë të punësuarit që raportohen në bujqësi nuk kanë ta ardhura mujore, ofruesi më i madh i punësimit me pagë në këtë qark është shteti nëpërmjet administratës lokale, shkollave dhe shëndetësisë.

Në 6 qarqe të vendit, Kukës, Elbasan, Dibër, Berat dhe Korçë bujqësia kontribuon në më shumë se gjysmën e punësimit, teksa sektorët e tjerë të industrisë dhe shërbimeve zënë një peshë shumë të vogël.

Qarqet që në strukturën punësimit të tyre dominojnë industria dhe shërbime kanë nivel më të lartë jetesës.

Psh në qarkun e Tiranës vitin e kaluar shërbimet punësuan 63.8 për qind te totalit të punësuarve. 26.7 për qind e të punësuarve ishin në sektorin e industrisë dhe vetëm 9.4 për qind e tyre punonin në bujqësi.

Qarku i Durrësit ka rreth 31.9 për qind të të punësuarve të angazhuar në sektorin e e industrisë, duke shënuar qarkun me numrin më të madh të punonjësve në këtë sektor, 39.6 për qind në sektorin e shërbimeve dhe 28.5 për qind në sektorin e bujqësisë.

Në qarkun e Lezhës shërbimet ofrojnë 40.7 të punësimit total, në Vlorë 49.2 për qind dhe Gjirokastër 34.8 për qind punësuarve janë të angazhuar në sektorin e shërbimeve, një e katërta në sektorin e industrisë dhe pjesa tjetër që varion nga 30 në 40 për qind  janë të angazhuar në sektorin e bujqësisë.

Bujqësia është kontribuesi kryesor në punësim me 36.7 për qind të  totalit më  2024 duke pësuar rënie të lehtë nga niveli 37.2 për qind i vitit 2023./ Monitor/