Akt terrorist, Berisha: Banesa e deputetit Xhelal Mziu u sulmua me tritol nga banditë shtetërorë!

Duke e cilësuar si akt terrorizmi që synon t’i mbyllë gojën opozitarëve, Kryetari i Partisë Demokratike, Sali Berisha, tha se banesa e deputetit Xhelal Mziu u sulmua me tritol nga banditë shtetërorë ndërsa e garantoj Edi Ramën se do mbajë përgjegjësi maksimale

“Së pari me një ndjesë për këtë shtytje të detyruar të konferencës për shkak, e kuptoni vetë, të një trafiku të pashembult që ekziston në rrugët e Tiranës.
Dhe zoti Mziu, që është nisur me kohë për të ardhur në këtë konferencë, iu desh trefishi i kohës.
Sot unë jam këtu me deputetin Xhelal Mziu për të denoncuar një akt terrorizmi shtetëror ndaj deputetit dhe familjes së tij.
Banesa e deputetit Xhelal Mziu, duke qenë brenda në banesë, është sulmuar me tritol nga banditë shtetërore.
Bandat janë sot pronë totale e shtetit.
Masa e eksplozivit ka qenë e konsiderueshme dhe ka krijuar dëme edhe në zonën përreth.
Ky akt vjen pas qëndrimit të djeshëm antikushtetues të kreut të organizatës kriminale ndaj parlamentit dhe opozitës.
Ky akt ka vetëm një synim, të mbyllë gojën e opozitarëve. Për të gjitha këto, e garantoj Edi Ramën se do mbajë përgjegjësi maksimale,” tha Sali Berisha duke shtuar se është iluzion të besosh se policia do zbardhë krimin politik.

“Keni parasysh se policia është thellësisht dhe tmerrësisht e politizuar.
Po u rikujtoj këtu, i nderuar zotëri, dhe qytetarëve se kohë më parë, kur unë paraqita para jush rastin e zyrës elektorale sekrete të PS në qendrën e votimit në Pekisht, në të cilën u gjetën fletë votimi, paund, lekë, karta identiteti, u gjet i gjithë dokumentacioni, polici, i cili bëri detyrën dhe mori në procedim pronarin e barit, u ndëshkua nga Proda i krimit. U ndëshkua!” tha Kryetari i PD, Sali Berisha duke përfunduar:
“Unë nuk mund të them se çdo segment i policisë është i infiltruar nga krimi, por të besosh se do e zbardhë, do e pranojë të zbardhin krimin politik policia, është një iluzion.”

Ndërsa vetë deputeti Xhelal Mziu e kosnderon absolutisht si një hakmarrje politike për qëndrimet ndaj kësaj qeverie krimi

“Siç tha dhe doktori, por besoj se jeni të informuar. Mbrëmë rreth orës 1 pa 10, pranë shtëpisë time në kodër Kamzë rruga e ‘Arbrit’, pati një shpërthim eksplozivi që falë Zotit nuk pat dëme në njerëz.
Isha unë me familjen, komshinjtë, por jo vetëm ato, por dhe në Kamzë apo persona nga Tirana e kanë dëgjuar oshtimën e këtij tritoli.
Pati dëme materiale. Normalisht jam i gëzuar që nuk pati probleme njerëzore as tek unë, dhe as tek kalimtarët që ishin në rrugë. Nuk kam asnjë lloj konflikti me asnjë person, gjatë karrierës time, nuk kam asnjë borxh ndaj askujt.
Unë e shoh këtë një akt absolutisht politik dhe është një sinjal për të treguar se, nuk mund të sillesh apo reagosh ndaj kësaj qeverie krimi dhe korrupsioni. Kështu që përveç se një hakmarrje politike unë asgjë tjetër nuk mund ta konsideroj,” tha deputeti Xhelal Mziu duke përfunduar:
“Me gjithë njerëzit që komunikojmë dhe gjatë këtyre orëve nuk gjejmë asnjë gjë tjetër veç prapavijës politike apo sinjalit për të na bërë një ushtar të tyre dhe jo për të qenë një opozitë siç duhet, për të qenë një opozitë ndaj kësaj qeverie krimi dhe korrupsioni.”

Ndryshe, një sasi eksplozivi shpërtheu në hyrje të banesës së deputetit të Partisë Demokratike, Xhelal Mziu, rreth 1 orë pas mesnatës së mbrëmshme. Nga shpërthimi nuk pati lëndime në njerëz, por vetëm dëme materiale, ndërsa autoritetet kanë nisur hetimet për ngjarjen.