Gjykata Supreme e Kosovës i kërkon PZAP-së të shqyrtojë kërkesën për rivotim në Junik

Gjykata Supreme ka pranuar ankesën e Aleancës për Ardhmërinë e Kosovës, AAK lidhur me procesin e votimit në komunën e Junikut dhe ka prishur vendimin e Panelit Zgjedhor për Ankesa dhe Parashtresa, PZAP, nr. ZL.Anr.217/2025, të datës 15 tetor 2025. Çështja është kthyer për rivendosje në PZAP.

Paneli Zgjedhor kishte refuzuar ankesën e AAK-së si të palejuar, por subjekti politik e ka apeluar këtë vendim në Gjykatën Supreme, duke kërkuar edhe rivotim për shkak të shkeljeve në procesin zgjedhor që, sipas tyre, kanë ndikuar në rezultatin final.

“Gjykata Supreme nuk e ka pranuar qëndrimin e PZAP-së, duke theksuar se ankesa e AAK-së duhej të shqyrtohej në bazë të meritave dhe jo të hidhej poshtë. Me aktgjykimin nr. AA.nr.92/2025, Gjykata ka kërkuar që në rivendosje PZAP të trajtojë ankesën në përputhje me ligjin dhe të shmangë shkeljet e evidentuara,” thuhet në njoftim.

Ndryshe, më 14 tetor, AAK-ja ishte ankuar në PZAP, duke pretenduar se ka dyshime për manipulime gjatë procesit zgjedhor në Komunën e Junikut, konkretisht rritje të pazakontë të numrit të votuesve vetëm në dy muajt e fundit deri në shtator në mënyrë të papërputhshme me trendin e viteve të kaluara dhe me numrin real të banorëve rezidentë në komunë, përfshirë në listat e votuesve të personave me mbiemra që nuk ekzistojnë në asnjë familje apo lagje të njohur të Junikut, shtim të votuesve që nuk jetojnë, banojnë dhe nuk kanë asnjë lidhje faktike me territorin e komunës.

Sipas të dhënave të Komisionit Qendror të Zgjedhjeve në Junik të drejtë vote për zgjedhjet lokale të 12 tetorit kishin 4.846 persona, prej të cilëve 2.519 votuan. Ndërsaa në zgjedhjet lokale të vitit 2021, kjo komunë kishte 4.527 persona me të drejtë vote, prej të cilëve 2.276 votuan.

Në bazë të rezultateve paraprake, në garën për kryetar të Komunës Junik do të shkojnë në balotazh, kandidati i Lidhjes Demokratike të Kosovës, Ruzhdi Shehu, dhe ai i Aleancës për Ardhmërinë Kosovës, Agron Kuçi.