Ra ky post dhe e pamë! Liburn Aliu, goditi Albin Kurtin për postin e Drejtorit të Portit të Durrësit
Dorëheqja e Liburn Aliut në fundgushtin e vapës politike në Kosovë nga posti i Ministrit të Mjedisit, Planifikimit Hapësinor dhe Infrastrukturës ishte një goditje e fortë për Kryeministrin AlbinKurti, jo vetëm pse u shit si largim politik shumë parimor nga një kryeministër dhe lider politik i paaftë, por, kishim të bëjmë dhe me largimin e bashkëpunëtorit më të ngushtë të liderit të Lëvizjes Vetëvendosje.
Por, çudia e cila në tokën shqiptare ka filluar të zgjasë më shumë se tre ditë doli edhe është shumë e pështirë!
“Konsideroj që zgjedhja e djeshme e Kryetarit të Kuvendit, institucionit më të lartë, ku vendosen ligjet dhe jep llogari qeveria, nuk është në frymën e në lartësinë e atij ideali për Republikën që ka qenë dhe mbetet arsye angazhimi për mua,” tha Liburn Aliu më 27 Gusht duke e shitur si arsye të dorëheqjes, zgjedhjen e Dimal Bashës në postin e kryetarit të Parlamentit të Kosovës, një ditë më parë.
Sot, Liburn Aliu është emëruar Drejtor i Portit të Durrësit me Vendim të ministres së Infrastrukturës dhe Energjisë së Shqipërisë, Belinda Balluku!
Tani, nuk dihet se për cilat ideale e kishte fjalën Liburn Aliu kur iku nga Qeveria Kurti, por, të pranosh emërimin nga një ministre që Prokuroria e Posaçme, SPAK, e heton për 50 milionë euro të Tunelit të Llogarasë, abuzim për të cilin ka dëshmuar Ish-Kryeministri Arben Ahmetaj, nuk është se mund të thuhet se kemi të bëjmë me një lartësi ideali me të cilën mund të mburret një njeri parimor, qoftë ky dhe Liburni!
Dhe, nëse iku nga Albin Kurti sepse e kishte për turp ta kishte Dimal Bashën për Kryetar të Parlamentit, nuk është e qartë se si Liburn Aliu nuk e ka për turp ta ketë për shefe një ministre që akuzohet për të paktën 50 milionë euro!
Apo, kështu e kanë idealet e Edi Ramës, bjeri Albin Kurtit në Prishtinë, je i nderuar në Tiranë, dhe Liburn Aliu i shef nga lartësia!
Liburn Aliun jo se e besoi njeri kur dha dorëheqje sepse Dimal Basha u zgjodh Kryetar i Parlamentit të Kosovës, por ra ky post Drejtori dhe e pamë pse Liburni i dha goditje aq të fortë politike Albinit, duke mos marrë pjesë në zgjedhjet e fundit parlamentare të mbajtur 9 shkurt dhe duke u larguar më pas si njëri ndër themeluesit e Lëvizjes Vetëvendosje!
Cili do të jetë epilogu i kësaj përvoje të ligë të Liburn Aliut në Qeverinë Rama, lojë politike e radhës së Edi Ramës, nuk ka pse të hamendësohet, kishim rastin e ministrit të Jashtëm, Gent Cakaj, që kurrë nuk u bë ministër!
Edi Rama e shiti si shqiptarin më të mençur në botë, por nuk e zuri më në gojë pasi e shtrydhi mirë si limon batoni. E flaki, ashtu siç po e kërkon Liburni…
