LIVE/ I prangosur, Erion Veliaj mbërrin në Gjykatën Kushtetuese

Ish-Kryetari i Bashkisë Tiranë, Erion Veliaj, ka mbërritur në pranga nga paraburgimi i Durrësit në Gjykatën Kushtetuese ku pritet të shqyrtohet ankimi tij i Vendimit të Këshillit të Ministrave për shkarkimin e tij nga posti i kryebashkiakut.

Sot Erion Veliaj pritet të jetë i pranishëm në seancën të cilën Gjykata Kushtetuese e paralajmëruar si seancë publike ku do shqyrtohet ankimi i tij.

Seanca pritet të nisë në orën 10:00.

Ndryshe, Erion Veliaj ka paraqitur ankim në Gjykatën Kushtetuese më 25 shtator, kundër vendimit të qeverisë për shkarkimin e tij, vendim i cili ishte propozuar më parë nga Këshilli Bashkiak i Tiranës.

Më 1 tetor, Presidenti Bajram Begaj dekretoi zhvillimin e zgjedhjeve të pjesshme për kryebashkiakun e Tiranës, por ky dekret u pezullua nga Gjykata Kushtetuese me një vendim të përkohshëm, derisa të jepet vendimi përfundimtar mbi çështjen e shkarkimit të Erion Veliajt.

Kjo është hera e parë që Erion Veliaj lë qelinë e paraburgimit, prej arrestimit të tij në 10 shkurt të këtij viti. Kryetari i Bashkisë Tiranë u arrestua pasi Gjykata e Posaçme miratoi masën e proprozuar nga SPAK “arrest me burg” për vepra penale të korrupsionit, i kryer nëntë herë në bashkëpunim.