Kurti: Glauk Konjufca mandatar i dytë për Kryeministër të Kosovës
Kryetari i Lëvizjes Vetëvendosje, Albin Kurti në mbledhjen e Këshillit të Përgjithshëm të LVV-së e ka propozuar Nënkryetarin Glauk Konjufca për mandatar të dytë për kryeministër të Kosovës.
Glauk Konjufca është mandatari i ri për kryeministër nga Lëvizja Vetëvendosje. Propozimi erdhi nga kryetari i Lëvizjes, Albin Kurti, i cili, si mandatar i parë, kishte dështuar t’i siguronte votat e nevojshme për krijimin e qeverisë “Kurti 3”.
Megjithatë, Albin Kurti para anëtarëve të Këshillit të Përgjithshëm theksoi se ky nuk është propozim për të bërë lëshim politik.
“Sepse rregulli i demokracisë thotë se subjektet vendosin vetë, dhe për LVV-në as nuk vendos, as nuk do të vendosë ndonjë subjekt tjetër,” tha Kurti.
Sipas tij, propozimi për emrin e nënkryetarit të partisë, Glauk Konjufca, erdhi si rezultat i vlerësimit dhe besimit të madh që ai dhe partia kanë për Ish-kryetarin e Parlamentit.
“Këtë propozim e bëj për shkak të vlerësimit dhe besimit të madh që e kam dhe që e kemi të gjithë te Glauku, si dhe për të shmangur mbajtjen e dy palë zgjedhjeve – në dhjetor dhe në prill. Le të vazhdojmë me të njëjtin kabinet që kam propozuar,” tha Kurti, duke shtuar se me Konjufcën veç do t’i ndërrojnë vendet.
“Unë marr vendin e Glaukut, e ai timin, siç jemi dakorduar mbrëmë në kryesi. Le të votohet më pas buxheti i shtetit dhe buxhetet komunale, të miratohet Plani i Rritjes së BE-së për fondet e vlefshme, të kryhen disa punë të domosdoshme, e pastaj të shkojmë në zgjedhje,” shtoi Kurti.
Kreu i LVV-së u bëri thirrje partive të tjera parlamentare që, siç tha ai, të mos e humbin këtë mundësi.
“Ja pra, po ia japim mundësinë opozitës që t’ia kursejë vendit dy palë zgjedhje, sepse mjafton në prill, kur të hapet çështja e presidentes. Ne do të shkojmë përpara me tentimin e dytë, me mandatarin e dytë, Glauk Konjufcën, me dëshirën më të mirë për shtetin dhe vendin. Shpresoj të mos e keqpërdorin dhe të mos e humbin edhe këtë mundësi.
Ne si LVV jemi gati për zgjedhje – qoftë sot, në dhjetor apo në prill të vitit të ardhshëm – por po e japim këtë mundësi si zgjidhje për këtë bllokim të kotë, të shkaktuar nga kokëfortësia, inati dhe kalkulimet e gabuara,” tha Kryetari i LVV duke iu drejtuar në përmbyllje, opozitës me një thirrje të drejtpërdrejtë:
“Opozitarëve u them: ju lutem, mos u betononi në pozitën e bllokuesit. Ja ku e keni shansin. Mos e lejoni t’i ikë edhe ky shans Republikës së Kosovës.”
Para mbledhjes së Këshillit të Përgjithshëm, raportohet se Albin Kurti ka zhvilluar një takim me Presidenten e Kosovës, Vjosa Osmani, megjithëse detajet e këtij takimi ende nuk janë bërë publike.
Ndryshe, më 26 tetor, Albin Kurti, në cilësinë e kryeministrit në detyrë, kishte dështuar t’i siguronte 61 votat e domosdoshme për formimin e qeverisë së re. Ai mori 56 vota për, 52 kundër dhe katër abstenime.
