Ardi Veliu në krye të KAYO-s, Flamur Noka: Ju përfaqësoni Troplinët, NATO-n kurrë!

Duke kritikuar ashpër emërimin e Ardi Veliut në krye të KAYO-s, deputeti i PD-së, Flamur Noka i tha ministrit të Mbrojtjes, Pirro Vengu, në Komisionin për Çështjet e Brendshme dhe të Mbrojtjes, se ai është një figurë e lidhur me krimin dhe mafien shqiptare.

“Duhet të ishte një ndërmarrje, shëmbëlltyra e dinjitetit të shtetit. Sepse po flitet për një vend anëtar të NATO-s. Por të vendosësh në krye të KAYO-s, Ardi Veliun, një njeri i ardhur nga skutat e mafies shqiptare. Një njeri që partnerët nuk e qasin askund, sepse është i zhytur në krim. Në krim dhe në prishje të provave, në vrasje dhe në afera kriminale,” tha Flamur Noka duke i argumentuar ministrit Pirro Vengu pse emërimi i Ardi Veliut dëmton imazhin e Shqipërisë përpara NATO-s

Me këtë rast, Flamur Noka i rikujtoi ministrit Mbrojtjes dhe anëtarëve të Komisionit për Çështjet e Brendshme dhe të Mbrojtjes ngjarjet kriminale të lidhura me Ardi Veliun, duke përmendur rastin e vjedhjes së 600 mijë eurove në Vlorë.

“Nuk mund t’i shkosh NATO-s ti me Ardi Veliun që kur ishte drejtor në Vlorë, drejtor i policisë bashkiake, flitet se iu vodhën 600.000 euro në shtëpi. Dhe ju, një njeriu që, një nëpunës i nivelit të tretë, siç ishte ai në bashki, i vidhen 600.000 euro dhe ju e merrni vetëm me ngritje, ngritje, pse? Aferat kriminale.”

Me konkluzionin se nuk ka asnjë shtet që harton skema të tilla mafioze dhe ia shet NATO-s si arritje, deputeti i PD, Flamur Noka, tha se kjo qeveri nuk përfaqëson Shqipërinë në NATO-s por troplinët ndërsa përfundoi:

“Skemë mafioze! Këto skema bëhen vetëm në kompanitë e plehrave nga mafia siçiliane. Nuk ka asnjë shtet që harton skema të tilla mafioze dhe ia shet NATO-s si arritje. Vetëm narkosi ka këto gjëma, sepse narkosi shkon paralelisht me mafien kudo. Dhe ja ku jemi në këtë situatë. Prandaj mos u përpiqni të gënjeni NATO-n. Nuk jeni ju për të shkuar dhe për të përfaqësuar Shqipërinë në NATO. Ju përfaqësoni troplinët tuaj, por NATO-n jo kurrë.”