Reshje të dendura bore, në Kukës, Dibër dhe Korçë, disa akse të bllokuara! ARRSH: Pastrimi vazhdon!
Reshjet e dendura të borës dhe ulja e ndjeshme e temperaturave ka shkaktuar vështirësi në qarkullim në qarqet Kukës, Dibër dhe Korçë, ndërsa kërkohet kujdes i shtuar me përdorimin e gomave të dimrit në Rrugën e Kombit dhe Rrugën e Arbritsi dhe akset Kukës-Peshkopi dhe Qukës-Qafë Plloçë, ndërsa ndalohet lëvizja e kamionëve edhe në Qafë Thanë.
Ndërkohë Autoriteti Rrugor Shqiptar, ARRSH, raporton se të gjitha akset janë të hapura dhe qarkullimi vijon normalisht ndërsa vijon pastrimi i akseve rrugore dhe shpërndarja e kripës për të evituar ngricat, por, drejtuesit të mjeteve u kërkohet të pajisen me goma dimërore dhe zinxhir.
Por, pavarësisht këtij idealizmi shtetëror, në Rrugën e Kombit reshjet e borës vazhdojnë ashtu si dhe pastrimi i autostradës ndërsa autoritetet paralajmërojnë qytetarët që të shmangin udhëtimet e panevojshme dhe të tregojnë kujdes të shtuar në këtë aks, pasi kushtet atmosferike mbeten të rrezikshme.
Drejtuesve të automjeteve u kërkohet të përdorin goma dimërore, të respektojnë sinjalistikën dhe të mos udhëtojnë pa pajisjet e nevojshme në kushte të tilla dimërore.
Rruga e Arbrit gjithashtu është problematike, për momentin është bllokuar nga tunelet e fshatit Shkallë e deri tek tuneli Murrizit, në segmentin e Xibrit në Klos. E njëjta situatë paraqitet edhe në anën e Tiranës ku ka prani të dëborës në fshatin Bastar Murrize e për pasojë automjetet janë bllokuar pa hyrë në tunel.
Nuk raportohet bllokim i qarkullimit nga Ura e Vashës deri te Shkalla e Tujanit, por pranë tunelit Qafë Buallit dhe në segmentin Qafë Buall – Peshkopi, nuk mungon akulli por kripa.
Rruga e Arbrit është bllokuar për momentin për shkak të pranisë së borës në segmentin e Xibrit në Klos.
Reshje të konsiderueshme bore vazhdojn në Lurë, Kalanë e Dodës, Selishtë, Zall-Dardhë, Zall-Reç, Sllovë, si edhe në Trebisht, Ostren dhe zonën e Martaneshit.
Policia Rrugore u bën apel drejtuesve të mjeteve që të qarkullojnë me goma dimërore dhe zinxhirë, pasi reshjet e borës vijojnë me intensitet të lartë.
Në Korçë, problematikë me qarkullimin e mjeteve raportohet në aksin Qukës-Qafë Plloçë ndërkohë ndalohet lëvizja e kamionëve edhe në Qafë Thanë.
Sa i përket doganës së Qafë Thanës, raportohet se është ndaluar qarkullimi i kamionëve për shkak se po punohet me borëpastruese në segmentin hyrës drejt Maqedonisë, situatë që ka sjellë ndalimin e kamionëve por me përfundimin e ndërhyrjes nga borëpastrueset u tha se do të rinisë qarkullimi edhe për mjetet e tonazhit të rëndë.
Në akset Korçë–Ersekë dhe Zëmblak–Goricë–Bilisht–Miras, gjatë natës ka pasur reshje bore ndërkohë rekomandohet qarkullimi me goma dimërore dhe zinxhir.
Prefektura raporton për probleme me furnizimin me energji elektrike, ndërsa situatë e ngjashme është edhe me rrugët.
ARRSH: SITUATA NË AKSET RRUGORE
Gjatë natës ka pa pasur reshje shiu me intensitet mesatar dhe ka filluar dëbora në të gjithë zonën veriore dhe juglindore të vendit.
Të gjitha akset janë të hapura dhe qarkullimi vijon normalisht.
Reshje dëbore ka pasur:
Në Rajonin Verior
Bajram Curri-Valbonë, Ura Bujan-Qafë Morinë, Bujan-Qafe Morinë (doganë),Sopot-Kerrnaj,Qafe Mejdan -Tropojë-Buçaj, Fierzë-Bajram Curri, Bulqizë-Peshkopi, Kukes-Shishtavec, Kukës-Bushtricë, Kukës-Krumë, Bogë-Theth, Dedaj-Razëm.
Në Rajonin Qendror
Trau Dajt – Qafë Priskë – Qafë Mollë.
Në Rajonin Jugor
Qafë Thanë-Kapshticë, Qukës-Qafë Plloçë, Maliq–Kufi Gramsh, Korçë-Voskopojë, Boboshticë-Dardhë, Ersekë-Leskovik-Tre Urat dhe në Muzinë.
Kontraktorët me mjete dhe punëtorë janë në terren pa ndërprerje kanë bërë pastrimin e akseve rrugore dhe shpërndarjen e kripës për të evituar ngricat.
Drejtuesit e mjeteve të kenë kujdes të shtuar gjatë drejtimit të mjetit, të pajisen me goma dimërore dhe zinxhir kur udhëtojnë drejt akseve rrugore me prezencë dëbore.
