18 vjet shtet, sot feston Kosova!

Sot Republika e Kosovës shënon 17 vjetorin shpalljes së pavarësisë shtet të pavarur dhe sovran. Dhe, është viti i dytë që kjo ditë festohet edhe në Veri, i cili tashmë është çliruar nga bandat kriminale serbe, dhe liria e lëvizjes është e garantuar.

Në këtë ditë festive, mëngjesi filloi me ngritjen solemne të Flamurit të Republikës së Kosovës për të vazhduar me mbledhjes festive të Qeverisë së Republikës së Kosovës ku Kryeministri Albin Kurti tha suksesi i Kosovës është amanet i dëshmorëve.

Pas ngritjes solemne të Flamurit Presidentja Vjosa Osmani, tha se në këtë përvjetor të shtetit tonë të ri, i cili tashmë po hyn në moshën e pjekurisë, përkujtojmë të gjithë ata që sakrifikuan gjithçka në mënyrë që ne sot ta gëzojmë shtetin.

“Shprehim respektin më të thellë për rrugën, vizionin dhe kontributin e presidentit tonë historik, Atit të Pavarësisë dhe arkitektit të saj, doktor Ibrahim Rugova. Për sakrificën e familjes Jashari, në krye me komandantin legjendar Adem Jashari. Për mijëra dëshmorë e heronj të Ushtrisë Çlirimtare të Kosovës”, tha Presidentja e Kosovës Vjosa Osmani ndërsa Kryetarja e Parlamentit, Albulena Haxhiu, tha se sot kujtojmë me nderim dhe respekt të gjithë ata që dhanë jetën e tyre për pavarësinë që ne e gëzojmë.

“Po ashtu, sot nderojmë edhe figurat e larta që kontribuan, në rrethana dhe periudha të ndryshme, për çlirimin, lirinë dhe pavarësinë e Republikës së Kosovës. Pavarësinë e nderojmë duke punuar me institucione funksionale, që veprojnë me integritet dhe profesionalizëm.”

Ndërsa Kryeministri i Kosovës, Albin Kurti, tha se para 18 vitesh pavarësia e Republikës së Kosovës u arrit falë shumë brezave veprimtarësh, ndër breza të panumërt të popullit tonë.

“Sot festojmë, por njëkohësisht nderojmë edhe rezistencën paqësore dhe kryengritjet e armatosura, të cilat kulmuan me luftën e drejtë të Ushtrisë Çlirimtare të Kosovës,” tha Albin Kurti i cili vazhdoi agjendën me mbledhjen solemne të Qeverisë së Kosovës.

“Në këtë ditë feste dhe reflektimi, nuk mund të harrojmë se disa prej përfaqësuesve që morën pjesë në shpalljen e pavarësisë së Republikës sonë sot ndodhen padrejtësisht në Hagë. Kontributi i tyre për pavarësinë është i çmuar,” tha Albin Kurti duke theksuar se sot nderohen të rënët për lirinë e Kosovës.

“Shteti i Kosovës është ndërtuar dhe qëndron mbi vlerat e lirisë dhe demokracisë, barazisë dhe drejtësisë, prosperitetit dhe gjithëpërfshirjes. Secili qytetar, pavarësisht gjuhës, etnisë, fesë apo përkatësisë, është i barabartë para ligjit,” tha Kryeministri i Kosovës, Albin Kurti, i cili përmendi njohjet ndërkombëtare, që tani numërojnë 121 vende, lëvizjen e lirë pa viza dhe hapat konkret drejt integrimeve evropiane, përfshirë aplikimin në Bashkimin Evropian dhe në Këshillin e Evropës, konsolidimin e institucioneve demokratike dhe sundimin e ligjit, ndërtimin e një ekonomie të qëndrueshme dhe në rritje, forcimin e ushtrisë dhe kapaciteteve mbrojtëse, sukseset ndërkombëtare në sport, art dhe kulturë, duke i cilësuar si arritje që na bëjnë krenarë të gjithë.

Agjenda festive ka vazhduar me nderime te Monumenti i të Pagjeturve si dhe te Monumenti i Fëmijëve të vrarë gjatë luftës në Kosovë.

Në orën 11:30, edhe këtë vit me shumë emocion pritet parakalimi i Forcave të Sigurisë së Kosovë dhe Policisë së Kosovës që sot e bëjnë krenar çdo shqiptar në botë

Ndryshe, më 17 shkurt të vitit 2008 në ora 15:39 Parlamenti i Republikës së Kosovës miratoi Deklaratën e Pavarësisë duke shpall Kosovën shtet të pavarur dhe sovran.

Ja dhe Agjenda e aktiviteteve për shënimin e 18 vjetorit të Pavarësisë së Kosovës:

7:00 –   Ngritja e Flamurit të Republikës së Kosovës (Oborri i Qeverise)

7:20 –   Mbledhja solemne e Qeverisë së Republikës së Kosovës (Ndërtesa e Qeverisë)

7:30 –   Nderime te Monumenti i të Pagjeturve (Sheshi “Ibrahim Rugova”)

7:35 –   Homazhe te Pllaka Përkujtimore e Fëmijëve të Vrarë (Oborri i Presidencës)

8:00 –   Homazhe te varri i ish-Presidentit Dr. Ibrahim Rugova (Varrezat në Velani)

8:10 –   Homazhe te varri i veprimtarit Adem Demaçi (Varrezat në Velani)

9:00 –   Homazhe në Kompleksin Memorial “Adem Jashari” në Prekaz (Prekaz)

10:30 – Seancë solemne e Parlamentit të Republikës së Kosovës (Kuvendi i Kosovës)

11:25 – Nderime te Monumenti Heroinat (Rr. Luan Haradinaj)

11:30 – Parakalimi i Trupave të Forcës së Sigurisë së Kosovës dhe Policisë së Kosovës (Rr. Luan Haradinaj)

17:30 – Pritje shtetërore nga Presidentja, Kryetaria  e Kuvendit dhe Kryeministri i Republikës së Kosovës

20:00 – Koncert solemn i Filharmonisë së Kosovës (Salla e Kuqe – Pallati i Rinisë)