Me Berishën, Raportuesi për Ballkanin në Bundestag: Jemi të shqetësuar nga zhvillimet e fundit në Shqipëri!

Pas takimit me Kryetarin e Partisë Demokratike, Sali Berisha, ku u informua me situatën në vend, Raportuesi për Ballkanin në Bundestagun gjerman, Peter Beyer, tha se jemi të shqetësuar nga zhvillimet e fundit në Shqipëri ndërsa e bëri të qartë se Gjermania mbështet një PD të fortë në rrugën europiane.

“Sapo patëm një bisedë shumë frytdhënëse dhe konstruktive. Diskutuam për procesin e integrimit europian të Shqipërisë, një vend që shpeshherë përmendet si një nga vendet kryesuese në rrugën drejt integrimit në Bashkimin Europian. Megjithatë, nga këndvështrimi i Berlinit, ne shohim gjithashtu disa sfida dhe zhvillime të fundit në këtë vend, veçanërisht sa i përket çështjeve që lidhen me sistemin e drejtësisë.
Unë personalisht e kam shoqëruar ministrin e Jashtëm të Gjermanisë gjatë vizitës së tij në Shqipëri në muajin nëntor. Gjatë asaj vizite ne vizituam edhe SPAK-un dhe zhvilluam biseda me disa përfaqësues të tij, si edhe me anëtarë të qeverisë.
Kjo vizitë që po zhvillojmë këto ditë, unë kam mbërritur këtu të dielën në mbrëmje dhe do të largohem nga ky vend i bukur, Shqipëria, nesër, është në fakt një mision zyrtar vijues pas vizitës së ministrit të Jashtëm gjerman në këtë vend,” tha deputeti gjerman i CDU duke saktësuar se në diskutimet e zhvilluara
janë trajtuar disa nga sfidat që ekzistojnë.

“Si qeveri gjermane, edhe pse unë personalisht nuk jam pjesë e qeverisë, por i përkas partisë së kancelarit, ne gjithashtu i përkasim familjes politike të Partisë Popullore Europiane, EPP. Kjo do të thotë se kemi një marrëdhënie të gjatë bashkëpunimi.
Unë përgëzoj Partinë Demokratike të Shqipërisë që qëndron fort për vlerat dhe parimet themelore, si dhe për kriteret e Kopenhagës. Këto kritere nuk janë shpikur për të detyruar apo për të ushtruar presion mbi askënd, por për të qenë shumë produktive dhe shumë të dobishme për shoqërinë dhe për qytetarët e Shqipërisë.
Këto ishin disa nga pikat kryesore të diskutimit që patëm. Një Parti Demokratike e fortë dhe një opozitë e fortë janë thelbësore për të ardhmen e demokracisë në këtë vend.
Prandaj ne shtrijmë një dorë bashkëpunimi dhe ofrojmë mbështetjen tonë. Diskutuam gjithashtu se çfarë mund të bëjmë më shumë për të siguruar një perspektivë shumë të mirë dhe një të ardhme të mirë për Shqipërinë, për popullin shqiptar dhe për sistemin politik të këtij vendi.
Kjo, sigurisht, lidhet edhe me nevojën për një qasje shumë të qartë, transparente dhe të hapur sa i përket sistemit të drejtësisë në këtë vend. Për këtë kemi folur dhe kemi shqyrtuar se çfarë mund të bëjmë më shumë së bashku për përmirësimin dhe për të mirën e qytetarëve shqiptarë,” tha Raportuesi për Ballkanin në Bundestag, Peter Beyer, duke bërë të ditur se javën e ardhshme do të mirëpret në Berlin disa nga deputetët e Parlamentit të Shqipërisë, mes tyre edhe demokraten Jorida Tabaku.

Ndërsa Kryetari i Partisë Demokratike, Sali Berisha tha se gjatë takimit ka informuar raportuesin për Shqipërinë në CDU për situatën në vend ndërsa konfirmoi se qëndrimet  e opozitës janë të qarta dhe se, qëndrojmë të vendosur në projektin e integrimit të Shqipërisë në Europë.

“Zhvillova një takim deputetin Peter Beyer një njohës i thellë i Shqipërisë dhe i rajonit tonë. Unë e falënderova dhe shpreha mirënjohjen më të thellë zotit Peter Beyer, Bundestagut, CDU-së dhe qeverisë, për interesin e tyre dhe për mbështetjen e madhe që i kanë dhënë Shqipërisë dhe shqiptarëve dhe interesin e tyre për zhvillimet në Shqipëri,” tha Sali Berisha duke përfunduar:

“E informova dhe paraqita pikëpamjet e opozitës lidhur me këto zhvillime dhe e sigurova se ne, qëndrojmë të vendosur në projektin e integrimit të Shqipërisë në Europë, si projekti më i mirë, projekti për të ardhmen më të mirë të Shqipërisë dhe shqiptarëve.

Natyrisht e njoha edhe me pengesat e mëdha, serioze, shumë të mëdha, me gjendjen e bllokimit të plotë të sistemit të drejtësisë, kartelet e drogës dhe fuqinë e tyre shumë të madhe për shkak të lidhjeve të niveleve më të larta dhe vështirësi të tjera me të cilat ne përballemi, por edhe vendosmërinë tonë për të vazhduar përpjekjet në këtë vend që të realizojmë projektet që kemi.”