Kosovë, Ministrja e Industrisë dhe Tregtisë: Çmimi i naftës nuk mund të kalojë 1.54 € për litër

Ministrja e Industrisë, Ndërmarrësisë dhe Tregtisë, MINT, Mimoza Kusari, ka njoftuar se nga sot çmimi maksimal i naftës në treg nuk mund të tejkalojë 1.54 euro për litër, ndërsa për benzinën çmimi maksimal është 1.36 euro për litër.

“Sipas të dhënave të importit të sotëm, çmimi për litër i derivateve ka shënuar rënie: nafta 1.40 €/l, ndërsa benzina 1.22 €/l. Bazuar në vendimin në fuqi për marzhën e fitimit, çmimet maksimale në treg do të jenë: Nafta: 1.54 €/l dhe Benzina: 1.36 €/l,” shprehet Ministrja e Industrisë, Ndërmarrësisë dhe Tregtisë, MINT, Mimoza Kusari.

Përmes një reagimi në rrjetin social Facebook, ministrja Mimoza Kusari u bëri thirrje qytetarëve që çdo parregullsi në tregun e derivateve ta raportojnë në numrin pa pagesë 0800 11000, ndërsa shtoi se bashkëpunimi i qytetarëve është kyç për të siguruar një treg më të drejtë dhe transparent për të gjithë.