Prevot: Rruga evropiane e Kosovës meriton vëmendjen dhe mbështetjen tonë
Ministri i Jashtëm i Belgjikës, Maxime Prevot, në fund të vizitës së tij dyditore në Kosovë, rikonfirmon mbështetjen e shtetit belg për perspektivën evropiane të Kosovës dhe proceset e brendshme politike.
Rikthimi në Prishtinë, tha ai, këtë herë në cilësinë e kryediplomatit belg, ka qenë një kënaqësi e vërtetë, duke kujtuar edhe vizitën e mëparshme si Kryetar i Namurit.
Gjatë qëndrimit në Kosovë, Prévot ka zhvilluar takime me ushtruesen e detyrës së presidentes Albulena Haxhiu, kryeministrin Albin Kurti dhe ministrin e Punëve të Jashtme, Glauk Konjufca.
Ai ka vlerësuar angazhimin e Belgjikës në Kosovë, përfshirë kontributin në siguri përmes misionit KFOR dhe projekteve të Këshillit të Evropës, duke theksuar vazhdimësinë e mbështetjes belge.
Në deklarimet e tij, Prevot ka nënvizuar se Belgjika mbetet e përkushtuar për forcimin e dialogut politik dhe zgjerimin e bashkëpunimit në fushën e policisë, migracionit dhe kapaciteteve penitenciare, ndërsa ka bërë thirrje për zgjidhjen e bllokadës institucionale në Kosovë dhe stabilizimin e situatës politike, me theks të veçantë në uljen e tensioneve në veri të vendit.
“E inkurajoj Kosovën që të gjejë një zgjidhje për bllokadën aktuale institucionale dhe të punojë për një stabilizim të shpejtë të situatës së brendshme politike, përfshirë vëmendjen e vazhdueshme ndaj uljes së tensioneve, veçanërisht në veri,” shprehet Prevot përmes rrjetit social X ndërsa për integrimit evropian thekson se rruga e Kosovës drejt Bashkimit Evropian duhet të mbështetet në progres të besueshëm dhe ka kërkuar njohje më të gjerë të përpjekjeve të vendit nga BE-ja.
Maxime Prevot ka rikonfirmuar se Belgjika do të mbetet një mbështetëse e qëndrueshme e perspektivës evropiane të Kosovës ndërsa ka folur dhe për rëndësinë e vazhdimit të dialogut Prishtinë-Beograd dhe zbatimit të marrëveshjeve të Brukselit dhe Ohrit duke përfunduar:
“Kjo rrugë evropiane duhet të shkojë paralelisht me riangazhimin në dialogun Prishtinë – Beograd, si dhe me progres të prekshëm në zbatimin e Marrëveshjeve të Brukselit dhe Ohrit. Kjo është thelbësore për stabilitetin rajonal.”
